Dokʉ̈ Jâan 5:10 - Mbëtï Ndjapä: TÄFO MADƗ̈

¹⁰ Käko akrə ndə̂ tche zâ su yê sə̈ Modô ndə̂ Ndjapä, pö ndə̂ Ndjapä tô rə̂ lâme kä tə̂ su yê la tə̂ yê. Praâbalë akrə ndə̂ tche zâbô su yê zâ sə̈ Ndjapä, tche mbö Ndjapä tə̂ earə̂ yepa, bëte tche gâmbabô pö ndə̂ Ndjapä tô rə̂ pâ Modô ndə̂ yê-a.

Dokʉ̈ Jâan 5:10 Iomraidhean Croise

Jâan 3:16

Bëte Ndjapä nyïndə̂ azü tchêbêche âtə tə̂ gbölösə̂nə̈, ânyë kə̈ zâ gbokôngô Modô ndə̂ yê, ndə̂kə̂ pa akrə balë balë ndə̂ tche za su yê sə̈ tchë, tchê tchuabô tee-a, praâbalë tche kä la tchîsûwu ndə̂ logbɛ̂ logbɛ̂.

Jâan 3:18

Akrə ndə̂ tche zâ su yê sə̈ Modô nə̈, ngbanga wâbo lə̂ küma yê-a. Praâbalë akrə ndə̂ tche zâbô su yê zâ sə̈ tchë, a wâ ngbanga lə̂ küma yê nə̂, bëte tche zâbo su yê sə̈ gbokôngô Modô ndə̂ Ndjapä-a.

Jâan 3:33

Akrə ndə̂ tche gâmba pö ndə̂ yê, tche nyïndə̂ nə̈ la su yê gbɛ̂ pä Ndjapä tö lëge pö.

Jâan 5:38

Pö ndə̂ yê wâbo tə̂ su nyê-a, bëte nyë zâbo su nyê sə̈ akrə ndə̂ tche wân tchë lâme-a.

Abadjângele 8:37

Fïlîpe tô rə̂ sə̈ tchë päkëdə̂: «Âdə mo âgamba rə̂ la su zə̈ gbɛ̂, mo wä ndə̂kə̂ gbo batɛ̂me ämbänə̈.» Akrə gö ndə̂ Etchiopï ndə̂ a wôn tchâtchâ yê lâme tô rə̂ päkëdə̂: «Më gâmba rə̂ nə̂, Jezü Krîsiti də̈ Modô ndə̂ Ndjapä.»]

Rômo 8:16

Kpɨ̂ki Yingö la tə̂ yê tö rə̂ sə̈ yingö ndə̂ azə̂ pä azə̈ wätə̂ abechë ndə̂ Ndjapä.

Gälâte 4:1

Pö ndə̂ më nyîndə̂ kə̂ to rə̂ wä kâkë: Âdə akrə ndə̂ tche wâ ndə̂kə̂ gbo rə ngbâ bha nə̈ ândə̂po tə̂ bechë, tche wâbo ngbî tə̂ ngbâa-a, tchetchë ndə̂ rə gbɛ̂ wâtə̂ andə̂ ye nə̈ lâme.

Gälâte 4:6

Nyë wätə̂ abechë ndə̂ yê tə̂ lëge nə̈, Ndjapä wän Yingö ndə̂ Modô ndə̂ yê lə̂ su azə̂ ndə̂ âon päkëdə̂: «Aba!», ndə̂ ânyîndə̂ kə̂ to rə̂ päkëdə̂: «Bha!».

Kölôse 3:3

Bëte nyë tchû nə̂ ânyë tchîsûwu ndə̂ nyê wâ nə̂ wü balë la andə̂ Krîsiti ndrotə̂ Ndjapä.

Aheborö 3:12

Arə̂mä, la nyê gbö-ê! Âwâbo pä ngâ akrə balë lə̂ gbâtə̂ nyê wa la ngbongbo su-a, kə̂ kosə̂ kə̂ za su yê sə̈ Ndjapä-a, ndə̂ âza köbo sə̈ tchë ndə̂kə̂ kosə̂ Ndjapä ndə̂ tche wâ la tchîsûwu-a.

Bïchuû Pîêre 1:19

Käko gbô azə̂ kä lakə̂ za su azə̂ pâ apö ndə̂ a-earə̂ ndə̂ma Ndjapä tô rə̂ alême, ädäka ndə̂kə̂ pa la nyê gbo pânə̈-ê: Äwä batə̂ lâmba ndə̂ âtcho lə̂ bübü tchô, ndjoa ndə̂kə̂ pa tchô kra tâ, ânyë ndjamunu tcho bhâlə̂ su nyê.

Dokʉ̈ Jâan 1:10

Âdə azə̂ âto rə̂ pä azə̈ mbôâbo ngbongbo rə, dëkë azə̈ mbö rə̂ pä Ndjapä watə̂ earə̂ yepa, pö ndə̂ yê wâbo lə̂ su azə̂-a.

Dokʉ̈ Jâan 5:1

Akrə ndə̂ tche nyîndə̂ nə̈ la su yê pä Jezü wätə̂ Krîsiti, akrə lâme də̈ bechë ndə̂ Ndjapä. Akrə ndə̂ tche nyîndə̂ ngâ bha, dëkë tche nyï ndjë ndə̂ abechë ndə̂ yê.

Apökälîbïchi 12:17

Gbölö mêrâ mbô gia ndə̂ tche wâ batə̂ mbölëngä lâme tə̂ ɛ̈chë nə̈, ânyë tche ê ndə̂kə̂ mbo kʉ̈ʉ̈ la adɨ̂ azü pâ mawo ndə̂ yê, andjanə̈ ndə̂ andjë kpê wa andïɛ̈ ndə̂ Ndjapä, ânyë kə̈ wâtə̂ azü ndə̂ andjë wûnsə̂ pö pâ Jezü, ânyë kə̈ mû rə̂.

Apökälîbïchi 2:17

«Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze! «Akrə ndə̂ tche rô lə̂ arə gbɛ̂ la gbôgbô, mê zadje mâne ndə̂ gbô rə̂ wâ lə̂ küwû nə̈ la grôgrô täme sə̈ tchë. A mbö ngâ täfo rə̈ ëpâ täme nə̈ lâme, ndə̂ ngâ akrə ndə̂ tche wûnsə̂ nə̈ sə̂âbo-a, praâbalë kütû akrə ndə̂ tche gbo rə̂ kä ndə̂ âwunsə̂ nə̈.»

Apökälîbïchi 2:28

«Batə̂ rə̂ ndə̂ mëmê ndjë gbɛ̂ më gbô kümändëmä tchânə̂ Bha mê, mê zadje ndjamunu sə̈ tchë.