Nehemia 9:5 - ŊWÀʼ NYÙY

⁵ Wír veé ram Levi vee ji Jeshua wùn à Kadmiel, à Bani, à Hashavneya, à Sherebia, à Hodia, à Shebania, e lì Petahia, á nèn yòŋ jii, «Vèn lo lèn, a burí Nyùy Tàr woo Nyùy won, wun wo wù‑uù siìn, a wù kù wíy a dzə ghán sidzə̀m. Á kú a burí yír rə́ ye yí kùʼùn, e shaà mo a dzə̀ wìr kwà, e kfə̀n shòŋrì.»

Nehemia 9:5 Iomraidhean Croise

1 Afòn 8:14

Fòn Solomon ló, e bìnkìr, e lèéy wír veé Isray adzə̀m, aá kù tíy fo, e nèn a lon ji Nyùy ku səə̀vì a áwune,

1 Afòn 8:15

a suúy jii, «Búríi wáa dzə fo Nyùy Tàr woo Nyùy wìr veé Isray wo wù yiìn ne kinyo ke wù‑uù kàʼàn tàr wor Davir sho. Wúnwun kitú kfə́‑əə̀ lo yòŋ jii,

1 Afòn 8:22

Fòn Solomon nèn dù, e tìím e mbìy kiy cù Nyùy Tàr, a wír veé Israyi yéné, e nàn wó rə́, e kìʼ yúv shó,

1 Afòn 8:27

«Rúrú, Nyùy, a dzə̀ wò à dzə̀ʼə̀m é kitu ke nsay a? Yúví yoʼ fə̀m kùʼ ye dzə̀ wú keèrí wò. Bo lav cù rə̀n yòʼ fə̀m mèé e gha, ye dzə̀ yì keèrí wò.

1 Wòŋ 16:36

Á wáa burí Nyùy Tàr, Nyùy wìr veé Isray. Á wáa burí wun, viyá viyá là may.» Wìr dzə̀m nèn bìnsí jii, «Amen.» Bínsi bèy, búri Nyùy Tàr.

1 Wòŋ 29:11

Feyì, feyì, Nyùy Tàr, à dzə̀ e gháʼtín. À tàv é ŋàŋ, e kfə̀n kùʼ e ŋàŋ. À yii só soón, a vifon vé vi dzə̀ ve wiy ví. Kér wò vifá vidzə̀m veé yuv, à veé nsay vi. Rúrú, Nyùy Tàr, kù sáʼ wò vifon, a kifá kidzə̀m ki kù néŋ a dzə̀ e wò sar.

1 Wòŋ 29:13

Nyùy wor, vèr beerì wò lèn, kfə̀n búri yír yé ye kuʼùné.

1 Wòŋ 29:20

Davir nèn sùúy e wìr dzə̀m wo wù‑uù baʼtin jii, «Vèn wáa burí Nyùy Tàr woo Nyùy won.» Wìr dzə̀m wo wù‑uù baʼtin fó nèn a burí Nyùy Tàr woo Nyùy atàr vév. Vé‑eè tsə̀m ndzəə́, e làʼ kitú e nsay, e ghvə̀m Nyùy Tàr, e nèn fò sá ghvə́m e fòn.

2 Wòŋ 20:13

Wír veé Juda adzə̀m wùn à vikìy véví, à wón véví, à wón ve bóri kù‑uù tíy e Nyùy Tǎr si, e shùu lav cù.

2 Wòŋ 20:19

Á bèy, wír veé ram Levi ve dzəə̀n kfə́ə Kohat wùn à vee kfə́ə Koràa nèn lò e yuv, a sùyrì Nyùy Tàr woo Nyùy wìr veé Isray, a nàn jí kitávín.

Esra 3:11

Vé‑eè yov, suyrì Nyùy Tàr, beerì wun, kooy jii: «Nyùy Tàr dzə̀ e juŋ, a koŋ ye wù koŋ wír vəə́ yòʼ wíy mày.» Wìr dzə̀m nèn a ndzəʼ kitaátávín, a burí Nyùy Tàr bìʼ kinsə̀ŋ ke lav cù ke á wayin ne.

Nehemia 9:4

Wír veé ram Levi ámóʼó‑oò tíy e kirə̀ʼ ke seʼtìn kí, tóŋ e Nyùy Tàr woo Nyùy wov kitávín. A vé‑eè dzə̀ jii, Jeshua wùn à Bani, à Kadmiel, à Shebania, à Bunni, à Sherebia, à wùmòʼ woo Bani, e lì Kenani.

Nehemia 9:6

Á nèn a bùnrì jii: Kù dzə̀ wò wo à dzəə̀n Nyùy Tàr. Yì‑iì bòm wò yúv wùn à ntoò yùv, à kifá kidzə̀m ke kí dzəə̀n fó ki. Bòm wò kitú ke nsay wùn à kifá kidzə̀m ke kí dzəə̀n shó ki. Ku bòm wò rìbà ndzə̀v wùn à vifá ve ví dzəə̀n shó vi. Kù fó wò dzəʼə̀m e vifá vi vidzə̀m. Vifá veé yuv vidzə̀m vi gvə́ʼti e wò si, ghvə́m wò.

Ŋwàʼ Jov 1:21

«Mò‑oò fəə́ fo yè wór bvə̀m, a m yòʼ kér kifá, a m wíy lòo kpu, e làa yòʼ lì kifá. Nyùy Tàr fò ne kifá kidzə̀m e mò, e kfə̀n sə̀. Búríi wáa dzə fo Nyùy Tàr.»

Nsùyrì Nyùy 106:2

A dzə̀ fèr la viŋgaʼnìn ve vinyò ve Nyùy Tàr yii? A dzə̀ bùrí la wun mo kì dzə̀ á bùrí?

Nsùyrì Nyùy 134:1

Ven vee aŋgàa lìm Nyùy Tàr, ven ve á tíy e Nyùy Tǎr lav vitsə́ʼ, vèn wáa burí Nyùy Tàr wír adzə̀m.

Nsùyrì Nyùy 145:2

M yíi a burí wò kishiíy kidzə̀m, a wùʼsì yír yé, e wìy dù, e jòʼsì.

Nsùyrì Nyùy 145:5

M wíy a suŋnín kùm vikuʼùy vé ve ghaʼán ví, a ruvtí viŋgaʼnìn vé ve lìm, a kwàʼtì sho.

Nsùyrì Nyùy 146:2

M kù wíy a burí Nyùy Tàr, e dù, e meé mo m wíy kpu. Mo m dzəə̀n e tin, m kù yíi a yòv luŋ, a burí Nyùy sho.

Nsùyrì Nyùy 16:2

M shivìr feyì e Nyùy Tàr jii, «Dzə̀ rú wò, wo à sáʼ mo, a vijuŋ vém vidzə̀m vi lo a dzə̀ fo wò.»

Nsùyrì Nyùy 66:2

Á wáa yòv, a taŋ vikuʼùy və́. Á wáa burí wun, a koʼór yír rə́.

Nsùyrì Nyùy 99:3

Á kú a burí yír rə́ ye ghaʼtíné, yír ye wìr yú, tímé kpù, e rə̀. Nyùy Tàr dzə̀ e ránén.

Ŋwàʼ Fəə 15:11

«Éè Nyùy Tàr, dzə̀ la moo wò aànyùyí mvəm? À dzə̀ ké Ŋgaà wo Ranén, a vikuʼùy vé vi dzə̀ jeéy. A dzə̀ yiì la viŋgaʼnìn ve vinyò ve ví kér viwìr moo wò?

Ŋwàʼ Fəə 15:6

«Éè Nyùy Tàr, kóy wó yìyí kér vitaáví ve wiy ví. Éè Nyùy Tàr, kóy wó yìyí tee vé vibàné.

Daniel 2:20

Wù wáa burí, a suúy jii: «Búríi wáa dzə fo Nyùy, e dù, e jòʼsì. Kù kér wun vifií, a kér wun vitaáví.

Matio 11:25

Jesus lò e ghan see shooy, e yòŋ Nyùy jii, «Éè Tàr wor, sáʼ wò yúv wùn à nsay. M beerì wò, bìʼ fo wò‑oò lìtìn kinyo ke ru kí fo wír ve á din vifií, e lìtì fo akiíyí, e dìn a dzə̀ áàmbúʼú.

2 Korin 4:6

Yì‑iì mvə̀ʼ Nyùy vifií vér, é bo vèr yén rán, a kiíy Jesus. A kù dzə̀ wun woo Nyùy wo wù‑uù suuyin fó shuù ji ndzə rán, yì nèn ràn. Vèr nén a yen mo vitaáví vé Nyùy vi lim e Kristu wùn, a kiíy mo wun woo Nyùy ghaʼan.

Remrí 28:58

Mooser nèn yòŋ jii, «Vèn ku wìy a yunín yéʼéy Nyùy Tàr rən, a ŋeèvì nsər se sí dzəə̀n é ŋwàʼ fèn sidzə̀m, a yiì mo sí dzəə̀n. A vèn dzə̀ là fó a ghvəm yír Nyùy Tàr woo Nyùy won, a wù dzə̀ e gháʼtín, e kfə̀n a dzə e beémén,

1 Pita 1:3

Vèsən ku nèn a beèrì Nyùy woo Tàr à Taàtá wòsən Jesus Kristu. Wù‑uù rə̀r ne mendzən fo vèsən é ŋàŋ, e yiì, vèsən wáa dzə wír və́ bìʼ Jesus Kristu. Mo Kristu‑uù kpuun fo vèsən, e kfə̀n fəə̀ fó kpu, vèsən nén a dzə wír ve á dzəə̀n afíy. A vèsən sí dzə́ lèn, njeʼ feyì, leey a dzə̀ fó mbìy ji

Atǎr Nsaʼ 13:18

Nshìylav Nyùy Tàr bìnèr sho jii, «À dzə́r yír yém bìʼ ka? Dzə̀ yír, a yí dzə̀ e ghaʼán, a bó yòʼ dzə̀ à kìíy.»