Joshua 7:24 - ŊWÀʼ NYÙY

²⁴ Joshua wùn à wír veé Isray adzə̀me nèn lì Akan woo wan Sera, e tàtí kishà ke mbàm ke fəvír kí, à ndzə̀y sí, à kisha ke mbàm ke baar kí, à wón və́ vee vilum, à vee vikìyí, e lì anàʼ wùn à vimbèʼbìy ví, à bvə́y si, à kibàn kí, e tàtí kifá kfə́ kidzə̀m ke wù‑uù kérí, e dù sho e Kiwoóy ké Akor.

Joshua 7:24 Iomraidhean Croise

Kèʼlo 18:25

Rúrú, bó yòʼ dzə̀ wò wo dzə̀ à yùyrí wír vee là jay wùn à vé jayi. Yòʼ dzə̀ kí kòóy bey. Bó yòʼ dzə̀ wò wo a dzə̀ à yiì bey. Aà yiì bèy, bo à sí maʼ ŋgeʼ aàlàjayi wùn à vé jayí kitu réŋréŋ. Mo tínen wò nsaʼ seé kitu ke nsay sidzə̀m, bo bó yòʼ dzə̀ à kù yiì a dzə̀ kinyo kee réŋ kí a?»

Ŋwàʼ Jov 20:15

Wù sum mbàm, kù mo wìr mèy vifá ve yi, a sí yòʼ yíi ndzə̀ytì e bvə̀m wo, Nyùy kù yíi yiì, é wù suʼ sidzə̀m.

Ŋwàʼ Fəə 20:5

Lá vèn yòʼ a ghvəm, lá vèn yòʼ a cù mebvə̀m mee shooy, bìʼ fo mo woo Nyùy Tàr woo Nyùy won dzəə̀n Nyùy wo wù kíyri ven é ŋàŋ. M yii maʼ ŋgeʼ e wóné wùn à wón woné, à wón wón woné, bìʼ ban ye atàr véví ban mo.

Ŋgàn 15:27

Wìr jum séʼ kiŋkùvrì, wù maʼ ŋgeʼ e wun lav, a wìr wo wù wíy shiíy dzə̀ wo wù ban kòyàr.

Ŋgaà Tàrvìnyò 5:13

M lèéy, e yèn kinyo ke bi kímóʼ kí ke kí kooy e sar shùy fèn, a kí dzə̀ jii, ŋgaà mbàm lo, wù wàa bonén, a lèm mbàm sə́, a sí lo, e nèn fo wun a dzə̀ nyár.

Aysaya 65:10

Mboʼ Sharon wíy gheén e ye á wáa lèm anjiì vév fó, é Kiwoóy ké Akor ki gheén sá feyì e ke á wáa dànèr nyám sév fó ki, é wáa dzə vijuŋ ve wìr vém ve vé‑eè yár jíŋ yem.

Hosea 2:15

M wíy siìr súm və́ vitiír vé vayin e wun, e bìnèr Kiwoóy ké Ŋgeʼ, é kí kfə́n ji dzə́ə ye yì du fo wù yoy, tiirì. Dzə̀ fó, fo m wíy yòŋrì wun, é wù biímé, a jùmrì mo, réŋréŋ mo wù‑uù jumrì e ghan sə́ sé viŋgòn, ghán, se mò‑oò fəər wun fo wòŋ woo Ejiv.

Joshua 15:7

Bìíy lò fo fo, e shaà e Kiwoóy ké Akor, e dù fəə̀sín e Debir, e nèn tèém, e shaà kuy kuy, e kìʼ Gilgal wo wù dzəə̀n é ŋkìʼnìn bam Adummim wo wù dzəə̀n tsə́n fó kiwoóy. Bìíy nen shaà bèy, a dù, e bàʼ aàdàn veé En‑Shemesh, e shaà mèé e En‑Rogel.

Joshua 22:20

Lá vèn yòʼ làysìn kinyo ke kí‑iì kooyin Akan woo wan Sera mo wù‑uù tenen fóo yunín nsər yee kùm vifá ve nshwì, ŋgeʼ wìy e kintatì keé Isray kí kitu kidzə̀m. Yòʼ‑oò lo kpù Akan cáʼ wo wù‑uù jayin.»

Joshua 6:18

Wìr kim kitú kfə́, a yen fóo màʼ kiwó e kifa ke nshwì, a fə̀m dzə̀ ka. Mo kí siìn nshwì, bo kí yíi sə̀ŋ lòn, e wìy sho e kibeèy, é kí bír, é ŋgeʼ ye tavín nəə́ wír veé Isray.

Joshua 6:21

Mànjòŋ nèn laàr kifá kidzə̀m keé ŋkàlaʼ e nyùy rə̀r, kifá kidzə̀m moo vilum wùn à vikìy, à wánlè, à ŋgàywìr, à nàʼ, à njiì, à vimbèʼbìy ví.

Joshua 7:1

Yii bèy, la wír veé Israyi yòʼ yùnín nsər Nyùy Tàr yee kùm vifá ve nshwì. A kí dzə̀ jii, wìr woó ram Juda wùmòʼ, a yírí dzə̀ ji Akan‑eè lì vifá ve nshwì vímóʼ ví. Nyùy Tàr nèn shwìíy kilòŋ wùn à wír veé Israyi. Akan‑eè dzə̀ wan Karmi, a Karmi‑iì dzə̀ wan Sabdi, a Sabdi‑iì dzə̀ wan Sera, a dzə̀ kfə́ə Juda.

Joshua 7:23

Á nèn lì, e wìy, e yèn Joshua wùn à wír veé Israyi shó adzə̀m, e nèn neèr vifá vee shooy e Nyùy Tǎr si.

Joshua 7:26

Á màysì, e nèn fùm vilán e wun kitu, a ví dzə̀ə́ fo e shem lán. Áwune yiì bèy, Nyùy Tàr nèn yàr kilòŋ ke shwiiyín kí. Kèʼ fo ghan fóo fèy, á nèn kù a yòŋ kirə́ʼ kee shooy ji Kiwoóy ké Akor, a dzə̀ ji Kiwoóy ké Lòn.