Joshua 7:21 - ŊWÀʼ NYÙY

²¹ vé‑eè lóo tòn ŋkàlaʼ, m tó é ndzə̀y yeé Babilon yìmòʼ, e kfə̀n yèn *kisha ke mbàm ke fəvír kí *ashekel ghii baà, à kóŋ kishà ke mbàm ke baar kí, shekel mtàn, e nèn a ker shií shó feyì, e nèn wòvír. Á yíi yen a m dzəə́mé e mǒ kibàn, à kisha ke mbàm ke fəvír kí shó, a kí dzə̀ fó sar.»

Joshua 7:21 Iomraidhean Croise

Kèʼlo 10:10

Virə́ʼ ve Nimrod‑iì tòmbìy kèʼ, a saʼ vi‑iì dzə̀ Babel, Erek wùn à Akkad. Virə́ʼ vin vidzə̀m vi‑iì dzə̀ é wòŋ Shinar.

Kèʼlo 3:6

Wiíy leéy kicí kiy, e yèn, a kí bóŋ féyì fó kfər, e kfə̀n yèn, a kí kiʼ kijuujùŋ, a kòŋ feyì fóo kfər, a ker vifií. Wù nèn kòy, e kfə̀r, e kfə̀n fò lúm və, wù kfə́r sá.

Kèʼlo 34:27

Á yúyrí wíri, e màysì, e nèn nə̀ə́ e ŋkàlaʼ, a tayrí vifá ve wíri ji á siir á ŋkfə́tir joònè wo vé‑eè yiìn e jèmèr yev.

Kèʼlo 6:2

Wón Nyùy ámóʼó yén, a wón wíri vee vikìyí bóŋkír é ŋàŋ, yén ve á toon sí yév, á kù nèn a lì liìn ji vikìy vév.

2 Samuel 11:2

Wáa dzə e ŋkuùr wùmòʼ, Fòn Davir ŋáʼáy fo wù‑uù meemè, e kòʼ, a ghan e kikfəv ke lav. Wù lòo màʼ sí, e yèn wiíy wùmòʼ, a wù su wún, a wù bóŋ é ŋàŋ.

2 Afòn 7:8

Vé shìvnsay vìyi meé é ghaa kilaʼáy bey, e kù nèn nə̀ə́ e tàv wúmóʼó, e yì vifá, e nò ve noón ví. Áwune kfən kùúy *kisha ke mbàm ke baar kí wùn à ke fəvír kí, à ndzə̀y sí, e nèn dù, e lìtì. Á lìtì bèy, e nèn siì kfə̀n é bàm, e nə̀ə́ e wúmóʼ woo táví, e kùúy sa vifá fo fo, e dù, e lìtì.

Ŋwàʼ Jov 31:1

«Mò‑oò yì ne kilìʼ, e sə̀ntì, dzə̀ m kfə̀n ghàn é le, e bó a leéy wánlè ŋgòn e sí yímóʼó.

Nsùyrì Nyùy 119:37

Teér sí yémé fó vinyò ve kisaŋ vi. Kìm dzəʼə̀m yémé, é m fíʼ a dzə sho, a ghan e wò mbòv.

Ŋwàʼ Fəə 20:17

«Lá wìr yòʼ siìmé kifá ke dzəə̀n ké wìr wùmòʼ. Lá wù yòʼ siìmé wiiy ŋgaàŋ, kìn kwàn və́ woo lumène, kìn woo wiíyi, kìn nàʼ və, kìn kimbèʼbìy kfə́, kìn ka ke dzəə̀n ké ŋgaàŋ.»

Ŋgàn 1:19

Á mo ké wìr ve á kooy séʼ mensə ki dzəə̀n. Séʼ wov kù yíi bìnkìr, e laàr dzəʼə̀m yév.

Ŋgàn 23:31

Lá à yòʼ a leéy meluʼ ji bìʼ fo mè kiʼ kijuŋ, líynin e bàr bèn, sə́y e kilòŋ kijuŋ.

Ŋgàn 28:22

Ŋgaà vikaàmè kù yii búʼ kfə́ ji wun kuʼ cér, a bó wù yòʼ kì ji wun kù yíi jòʼsì a dzə̀ é kitàn.

Ŋgàn 4:23

Kìm kitú ké ki fó yiì ye bií, ku kìm, bìʼ fo yíi wìri kù lo a dzə̀ fó kinyò ke wù kwàʼtìn.

Aysaya 28:15

Vèn dzəv nsaŋ ji vèn‑eè yiì ne kilìʼ vèn à kpúu, e yiì nsìysì vèn à woŋ aŋkfəə, kwaʼ ji a kinyo ki fə̀m meè moo ndzə́v, a sùm virə́ʼ, bo bó yòʼ dzə̀ kí kùm ven. Oomboò, vèn sévti ji kimboʼtì kén kí yíi kìŋsìn ven, é ŋkàʼmé won kimboʼtì téʼtín ven fó ŋgeʼ.

Aysaya 29:15

Lòné dzə̀ wó wìr ve á mum ji á liti ntir ye á kérí fo Nyùy Tàr. Áwune ve á bin, yii vinyo a dzə̀ fó mesənér, kwaʼ ji bó yòʼ dzə̀ wìr yèn áwune, kìn ji wù kiíy kinyo ke áwune yii.

Habakuk 2:9

Rúrú, lòné dzə̀ wó wìr ve á nəə e seʼ ŋgwaákínyé aáwuné melav, báʼti ji vikuʼùy vév ví fíʼ a kìŋsìn áwune, a teér kfə́ə yév fó kileemé.

Ŋwàʼ Luk 12:15

Wù nèn a suúy lèn e wìr dzə̀m jii, «Vèn wáa kìm vitú vén, a yen fó a tàʼ kifàʼ e dzəə sí dzəə sí. Dzəʼə̀m wìri yòʼ dzə̀ vifá ve wù kérí, a wù fə̀m kér bùʼ e le.»

Ŋwàʼ Luk 12:2

Vèn wáa kiíy ji kinyo ki yòʼ dzə̀ shó ke á sətin, ke bó kí yòʼ wíy yensín, kìn ke á lìtìn, ke bó á yòʼ wíy kiíy.

Efesor 5:3

Mo vèn siìn ji wír wun woo Nyùy, kí yoʼ fə̀m ghèén ji vèn wáa ker kwaʼtì yímóʼó shishàr ji tàm wìr fo vèn wù lò a yiì kinyo ke kisaŋ ki. Kìn dzə̀ ji wìr jaŋ kinjàŋ, kìn wù ghán a dzə̀ viŋkar, kìn wù yii liì kisaŋ woo ka, kìn wù taʼ a dzə̀ kifàʼ.

Efesor 5:5

Vèn wáa kiíy kijuŋ ji wìr wo wù jaŋ kinjàŋ, yii liì kisaŋ, kìn wù taʼ a dzə̀ kifàʼ yòʼ dzə̀ wù wìy shòv sáʼ ye dzəə̀n yé Nyùy wùn Kristu e wùn si gheéy. A wìr taʼ kifàʼ, bo wù lì ne vifá ve wù koŋ vee shooy ji Nyùy və.

Remrí 7:25

Vèn wíy tòn mebvə̀m mev me á semen ji anyùy e və́yí. Lá vèn yòʼ wìy kùm *kisha ke mbàm ke fəvír kí, kìn ke baar kí, ke á laʼtin e mebvə̀m mèn mè wùn. A vèn mùm, bo wíy a dzə kitám ke dzə̀ vèn lì shó, bìʼ fo mebvə̀m mee shooy mè dzəə̀n joonè e Nyùy Tàr woo Nyùy wón si.

Kolosia 3:5

Vèn ku nèn lì vitú vén ji á kpù ne a fo mbìv vinyò ve mensə́ men mè taʼ vidzə̀m. Lá vèn yòʼ a jàŋ kinjàŋ, a ghan viŋkar, a shii vinyo vee bey, kìn dzə̀ liì kisaŋ woo ka. Lá vèn yòʼ a way vifií é vinyò ve ví kér lóm, é la wìr yòʼ a tàʼ kifàʼ. Wìr wo wù taʼ kifàʼ lì ne vifá ve wù koŋ vee shooy ji Nyùy və.

Hibru 13:5

Wìr dzə̀m wáa sheʼrí a dzə̀ kifá ke wù kérí, e màʼtì shií woo kùm mbàm. Nyùy‑iì sùúy jii, «M yòʼ wíy màʼtì wò, a bó m yòʼ wíy màʼày wò e ghan símóʼ sí gheéy.»

Jeem 1:15

Shií və̀n távkirì, nèn fəə̀ kinyo ke bi kí. Kí ram, kí nèn bvə̀ysín a dzə̀ é kpu ye dzəə̀n lòn woo là may.

Joshua 7:20

Akan bìnèr jii, «Dzə̀ rú, m jày ne e Nyùy Tàr, Nyùy woó Isray. A kinyo ke m yiìn kí dzə̀ jii,

Joshua 7:22

Joshua ku nèn tsə̀nsí vilum ámóʼó, á léʼ, e dù e Akan kibàn, e yèn vifá ve nshwì viy, a ví dzə̀ rú fó vilitìn, a kisha ke mbàm ke fəvír kí dzə̀ fó sar.

2 Pita 2:15

Áwune màʼtì dzə́ə yee réŋ, e bìn e ye kisaŋ, a yiì mo Balaam woo wan Beor‑iì yiìn. Vé‑eè beè wun e kinyò ke bi kí, wù wáa kòŋ bìʼ mbàm se vé‑eè kàʼàn wun sho.