Joshua 7:11 - ŊWÀʼ NYÙY

¹¹ Isray jày ne, áwune shòʼór ne nsər ye mò‑oò foon aáwune. Áwune bòʼtí kimboʼtì, e shòŋ vifá ve nshwì vímóʼ ví, e wày aáwuné mvə̀m vifa, aá kì yíi laàr.

Joshua 7:11 Iomraidhean Croise

2 Afòn 18:12

Vinyo vìn vi‑iì kooy bèn bìʼ fo wír veé Israyi yòʼ‑oò ló a yunín Nyùy Tàr woo Nyùy wov. Áwune‑eè shòʼór *mensaŋ me Nyùy Tàr, e shòʼór nsər sidzə̀m se Mooser woo ŋgaà lim Nyùy Tàr‑iì foon aáwune. Áwune yòʼ‑oò ló a yu kinyo, a bo áwune yòʼ‑oò ló a yiì mo nsər dzəə̀n.

2 Afòn 5:24

Á meé é kitu ke gwan, Gehasi sə́ vifá vìy fo áwune, e lèm e lav, e nèn tsəə̀né áwune, á wáa dù.

Aysaya 24:5

Wír ve á dzə́ e kitu ke nsayi yiì ne kitú ke nsay ki bír birín kidzə̀m. Áwune ŋwày ne yéʼéy Nyùy, e bìvír kitú ke nsay. Á jwìvrì ne sáʼ Nyùy, e yàʼáy *mensaŋ me wù‑uù gwàrìn wùn áwune ji mè kù wíy a tiy fo.

Jeremia 31:32

A bó mee shoon mè yòʼ dzəə́ wìy a dzə moo me mò‑oò gwàrìn vèr aàtǎr ram véví é ghan se mò‑oò gharin áwune e kiwó kém kí, e fə̀ə́r fo wòŋ woo Ejiv. Áwune‑eè bìvír mee shooy, fə̀m mo mò‑oò dzəə̀n tàr wov. Suuy mo woo Nyùy Tàr.

Hosea 6:7

Yii bèy, wír vémé kù‑uù ŋwày *mensaŋ mem moo Adam, kù laarì a dzə̀ sí, e làa yòʼ a tiy e mǒ wùn.

Cù 5:15

a wìr shòʼór nsər Nyùy ji wù yoʼ fò á kifá ke nsər din ji wù kì yíi fo ji cu e Nyùy Tàr, bo wù yíi làʼ njò yee shooy. Wù yíi wìy e kiyáʼ kee là nsem ki, aá kù fiʼ káv kiyaʼ réŋréŋ mo *shekel wo dzəə̀n wo cù yii dzə́. Dzə̀ cu njò yee bìʼ kifá ke wù kì yíi fo e Nyùy.

Habakuk 2:6

Vitúm vidzə̀m ve wír veé Babilone koon vi wíy lò, a sheʼ áwune, a yòŋ jii, «Lòné dzə̀ wó wìr ve á li kifá ke bó yòʼ dzəə̀n kév. Áwune kù wíy sùm vifá ve wíri ben, e dù, e jòʼsì à? Á kù wíy a sùm kéŋ aŋgaà vév kaa, e dù, e jòʼsì à?

Sekariya 5:4

Nyùy Tàr woo Taà Mànjòŋ yoŋ jii, ‹M wíy tsənsí lòn é wòŋ, é wú nəə́ áàshóŋé melav, e nə̀ə́ sa e wír ve á bóʼti kimboʼtì, kan yír yém kisáŋé lav. Wú nəə bèy, é wú goʼ fó, e laàr kifá kidzə̀m, à vicí vé lav vi, à tíyí shó.› »

Matio 22:21

Á bìnèr jii, «Dzə̀ ké Fòn woó Rom, a yírí kù dzə̀ rə́.» Jesus nèn sùúy jii, «Kifá ke dzə̀ vèn kù fò e Fòn woó Rom, vèn wáa fo sho, a fo ké Nyùy e Nyùy.»

Lim Aŋgàa Ntum 5:9

Pita nèn kfə̀n dzə̀r jii, «Vèn lum wò yòʼ kì kwàʼ ji ka féyì, e bóo wìy, a mùm Kiyoy ke Nyùy Tàr? Yú mo wíri giv nsən e shùu lav. Dzə̀ nsən se wìr ve á duùn ne, e dzəə̀mè lum wò, a kfən, aá kù beʼèy sa wò lèn, e dù, e dzəə̀mè.»

Remrí 17:2

«A kí lò, e kòóy ji lùmèn, kìn wiíy e věn ŋkàlaʼ yìmòʼ lo, a yiì vinyo ve bi ví e Nyùy Tàr, e shòʼór *mensaŋ me Nyùy Tàr woo Nyùy won,

Hibru 4:13

A bó kifá kímóʼ kí yòʼ dzə̀ shó e ndzə ye Nyùy bomen rə̀n e dzə̀m ke dzə̀ kí lìtì kinyo fo wun gheéy. Wù yén vinyo vév vidzə̀m, a ví néŋ tèéter, kiránén, a vèsən kù kér fó bìnèr a dzə̀ shó.

Joshua 23:16

A vèn wìy a dzə, e làa yòʼ a tiy e *mensàŋ me Nyùy Tàr woo Nyùy won me wù‑uù yòŋèn ji vèn wáa tiy sho, e dù, a ghvəm a dzə̀ anyùy ámóʼó, a tsəm aáwuné si, bo Nyùy Tàr wíy shwiíy kilòŋ vèn áwune. Wù shwiiyì, é wù maʼ ŋgeʼ e věn kitu, é vèn wìy rèŋ cércér fo nsay ye juŋ ye wù‑uù foon e vèn.»

Joshua 7:1

Yii bèy, la wír veé Israyi yòʼ yùnín nsər Nyùy Tàr yee kùm vifá ve nshwì. A kí dzə̀ jii, wìr woó ram Juda wùmòʼ, a yírí dzə̀ ji Akan‑eè lì vifá ve nshwì vímóʼ ví. Nyùy Tàr nèn shwìíy kilòŋ wùn à wír veé Israyi. Akan‑eè dzə̀ wan Karmi, a Karmi‑iì dzə̀ wan Sabdi, a Sabdi‑iì dzə̀ wan Sera, a dzə̀ kfə́ə Juda.

Joshua 7:10

Nyùy Tàr yòŋ e Joshua jii, «Lò é yuv. À gbù, e tsə̀m sí fo nsay ji ka?

Atǎr Nsaʼ 2:20

Á bèy, dòʼshwiiy Nyùy Tàr ŋáʼáy kùm wír veé Isray e dzəə ye biibí, wù suúy jii, «Mo wír vìne yaʼayin ne *mensaŋ me mò‑oò gwàrìn vèr aàtàr véví, e tèn fó yunín jí yem,

1 Samuel 14:38

Saul toóy vilìmbìy ve rər ji á wiy, aá tar á ji wùn áwune sà jày ka lán a?