Joshua 6:17 - ŊWÀʼ NYÙY

¹⁷ «Vèn kù kér fóo laàr ŋkàlaʼ wùn à kifá ke kí dzəə̀n shó ki kidzə̀m. Kifá kidzə̀m ki yíi a dzə nshwǐ Nyùy Tàr, a vèn yíi laàr laàrìn kidzə̀m, é may Rahav woo sàkì wùn à wìr dzə̀m wo wù dzəə̀n e wun lav ve á yíi bòy, bìʼ fo wù‑uù lìtìn vé ŋkiyi ve vèsən‑eè tumen.

Joshua 6:17 Iomraidhean Croise

Kèʼlo 12:3

M wíy a səə̀vì wír ve á ghvə́m wò, a shov wír ve á roʼ wò. M wíy shaà fo wò, e səə̀vì rám yeé kitu ke nsay e dzə̀m.»

Esra 10:8

Wìr wo wù yíi gòʼ, e làa yòʼ wìy e mvə̀m vishìíy vee vitaár, bo á yíi koo a vifá və́ vidzə̀m, e fəə́r wun a fo wír vəə́ kintatì. Á mo atǎr saʼ wùn à vilìmbìy vi yòŋèn.

Aysaya 34:6

Rúrú, Nyùy Tàr kér nyùy rə̀r é kiwo, a yì dzə̀ mensə́ mensə́, a dzə fóm fóm. Mensə́, a dzə̀ me wón njiì, à me bvəy mè, fóm, a dzə̀ sé kiyaʼ seé shintay. Á mo Nyùy Tàr lo, e yiì cu e Bosra. Wù yíi yuyrí wíri Edom e dzə̀m.

Jeremia 46:10

Á bèy, kishiíy kin ki dzə̀ ké Nyùy Tàr woo Taà Mànjòŋ, wun woo Taà Ndzə. Dzə̀ kishiíy ke wù siir ŋkfə́tír áàŋgaà və́ vibàné. Nyùy rə rə̀r wíy laàr áwune ŋkuuŋkùŋ, kù moo koosàʼ, wo wù laarì, wù nò mensə́, e kù nò, e meé mo buù və‑ə́ə̀ kpú. Rúrú, Nyùy Tàr woo Taà Mànjòŋ, wun woo Taà Ndzə yíi yiì cu rə́ lán. Wù yíi yiì e wòŋ kùyi, e ghaa ndzəv yee Yufret.

Esiker 39:17

«Fo ké ki, wàn wìr msòŋ, ke suuy mo woo Nyùy Tàr woo Taà Ndzə ki dzə̀ jii, jàŋ menə́n mè kfəə́ e dzə̀m, e jàŋ nyám seé kwaʼ si sidzə̀m. Yòŋ ji áwune wàá bánén, e wìy, e kaàrí, a yi a kiŋkàʼ ke m báʼti bìʼ áwune. Kù dzə̀ á ké cù, a dzə̀ ke wiy kí, a kí dzə̀ áàgwan veé Isray, aá yíi kfər nyám, e no mensə́.

Cù 27:21

Wíy lóo dzə e Kiya ke Nsiìr Vifa, é súm woo shooyi kfə́n ji kifá ke Nyùy Tàr ŋkuuŋkùŋ, a dzə ji nshwì və́, aá fó áàtàá cùu ji kéŋ yév.

Mayka 4:13

Nyùy Tàr nèn sùúy jii: «Wír veé Jerusalem, vèn ŋáʼáy, e dù, a buʼ aŋgaà vén vibàné, mo á bùʼ sáŋ. Vèn ŋáʼáy, bìʼ fo m yíi tavír ven, é vèn wáa dzə moo mbòŋ wo wù kér loŋ a dzə̀ sé kishà si. M yíi fo ven mfay, a dzə̀ see kisha ke *brons si, é vèn bvə́ʼə́y vitúm vìn moo kíŋ, é ví du é vimbvəʼ. Vèn yíi kuúy séʼ wo áwune‑eè faàsìn fo wíri, e fo e mò woo Nyùy Tàr. Vèn yíi lì bùʼ wov e dzə̀m, e fo e mò wo m kér kitú ke nsay kidzə̀m.»

Matio 25:40

Á dzə́r bèy, é wun woo Fon nèn bìnèr jii, ‹Vèn‑eè yii vinyo vee shoon a dzə̀ áàfə́r vémé. Mo vèn‑eè yii aàfə́r vém víne, a ŋgaàŋ fə̀m dzə̀ ghéʼ é le, bo vèn‑eè yii a dzə̀ e mò.›

1 Korin 16:22

a tir ven jii, a wìr dzə̀ làa yòʼ a kòŋ Tàr wòsən Jesus, bo lǒn Nyùyi dzə̀ á e ŋgaàŋ kitu. M nén a lon ji Tàr wòsən Jesus ku kfə̀n á cér.

1 Korin 2:7

A vifií ve vèr fiʼtì vìn vi dzə̀ kinyo ke kí‑iì dzəə̀n é kilìr, kfə́n a dzə kinyo ke Nyùy‑iì sìysìn fo wùn vifii, é bo ndzə wìy a kèʼ ji wun wíy lì vèsən, e way e wùn mvə̀m vijùŋ.

Galatia 3:10

Vèn wáa kiíy ji wìr dzə̀m wo wù leey ji dzə̀ wun ghèén fo Nyùy ji bìʼ fo wù lem nsər kù li a dzə̀ á lòn. A kí dzə̀ bey, bìʼ fo kí dzəə̀n é Ŋwàʼ Nyùy jii, «Lòné dzə̀ wó wìr wo bó wù yòʼ ŋeevì vinyo vidzə̀m ve vé‑eè saŋen é Ŋwàʼ Nsər, yii mo ví dzəə̀n.»

Galatia 3:12

A bó wìr wo wù jumrì kfə́ dzə́ə a dzə̀ fó nsər ji wun fiʼ wìy lùŋ, yòʼ wáy shilív e Nyùy wùn gheéy. Wù tíy kfə́ a dzə̀ é kinyò ke vé‑eè saŋen jii, «Wìr wo wù ŋeevì nsər sidzə̀m, yii mo sí dzəə̀n, wíy lùŋ.»

Remrí 20:17

Vèn ku wìy laàr wir dzə̀m woó Hit, à woó Amor, à woó Kanan, à woó Peris, à woó Hiv, à woó Jebus réŋréŋ mo Nyùy Tàr won yòŋèn e vèn.

Hibru 11:31

Wiíy wùmòʼ wáa dzə fo, a dzə̀ sàkì, aá yoŋ ji Rahav, vé ŋkiyi wìy wìy e Jeriko, wù səə́sí, e lìtì e wùn lav. Á wìy tòn fó, wù nèn bòy, e làa yòʼ dzə́ə kpu moo kibér ke wìr ve vé‑eè méŋ Nyùy, táv kitú, á yúyrí.

Hibru 6:10

Bó Nyùy yòʼ yii lóʼ wír. A bó yòʼ dzə̀ wù làysìn mo vèn rə́si lim e wùn kinyò. Wù yoʼ làysìn mo vèn koŋ wír ve dzəə̀n və́ adzə̀m, sə́ áwune. A vèn lim a dzə̀ fo wun réŋréŋ mo vèn kù yii, e shem lèn.

Jeem 2:25

Kù dzə̀ sá mo ké Rahav wo yì‑iì dzəə̀n sàkì ki dzəə̀n. Kinyo ke kí din ji wù‑uù wáy rú shilív e Nyùy wùn kí dzə̀ ke wù‑uù yiìn. Wù‑uù səə̀sí aŋgàa ŋkiy ve wír veé Israyi‑iì tumen, e dìn dzə́ə ye sən, áwune léʼ.

Joshua 2:1

Joshua woo wan Nun nèn tùm wír abaà fó Shittim fo vé‑eè bee ji á du á bám bám, e kìy á woŋ. Wù suúy aáwune jii, «Vèn du, e shwèʼ woŋ Kanan, bo taaka ŋkàlaʼ yee Jeriko.» Wír vìyi nèn lò, e dù mèé e ŋkàlaʼ fèy, e nə̀ə́ e sàkì wùmǒʼ lav, aá yoŋ ji Rahav, e beè fo.

Joshua 2:22

Vé ŋkiy vìyi ló, e dù aàgwan, e dzə̀ʼə̀m fo vishiíy vitaár, e meé mo vé‑eè yenen ji á jwìm á ne áwune ntéŋ, e kfə̀nkír. A vé‑eè lo jwìmér áwune vitóŋtóŋ vidzə̀m, e làa yòʼ yen.

Joshua 7:1

Yii bèy, la wír veé Israyi yòʼ yùnín nsər Nyùy Tàr yee kùm vifá ve nshwì. A kí dzə̀ jii, wìr woó ram Juda wùmòʼ, a yírí dzə̀ ji Akan‑eè lì vifá ve nshwì vímóʼ ví. Nyùy Tàr nèn shwìíy kilòŋ wùn à wír veé Israyi. Akan‑eè dzə̀ wan Karmi, a Karmi‑iì dzə̀ wan Sabdi, a Sabdi‑iì dzə̀ wan Sera, a dzə̀ kfə́ə Juda.

1 Samuel 15:3

Dù lèn, e nə̀ə́ wír veé Amaleki e rə́r sí, e laàr áwune wùn à kifá kév kí kidzə̀m. Lá à yòʼ bàvtí kifá fo. Yúyrí vilum wùn à vikìy, à wóné, à wón ve bóri. Yúyrí sá anàʼ wùn aànjìi, aàkameri, à vimbèʼbìy ví.› »

1 Samuel 15:6

Saul tsə́nsí ntum e wír Kene ji áwune fəə́ á fo wír veé Amalekí mvəm, fo wun yiì lòo laàr wír vee fó, e laàr a áwune. Áwune wàá lo á, bìʼ fo atàr véví‑iì dìnèn á koŋ e wír veé Israyi é ghan se vé‑eè kóʼ fo Ejiv. Wír veé Kene nèn fəə̀ fo wír veé Amalekí mvəm.