Joshua 24:19 - ŊWÀʼ NYÙY

¹⁹ Joshua suúy lèn e wíri jii, «Bó vèn yòʼ dzə̀ ve dzə̀ á cù Nyùy Tàr. Nyùy Tàr dzə̀ Nyùy wo ranén, a wù kíyri ven é ŋàŋ. Bó yòʼ dzə̀ wù làysìn jay wìr ve á méŋ wun, táv a dzə̀ kitu.

Joshua 24:19 Iomraidhean Croise

2 Wòŋ 36:16

Nyùy Tàr‑iì tsə́nsi aŋgàa ntum və́ bey, a wír veé Judàa shéʼ áwune shéʼén, keŋ kèŋèn, nèn ŋwáy jí se wun woo Nyùy. Kù bey, e dù, e meé mo dòʼshwiiy Nyùy Tàr‑iì ŋaʼayin, e kìʼ áwune vee wír və́, a kifá ke dzə̀ kí sə̀r wun ki yòʼ dzə̀.

Nsùyrì Nyùy 99:3

Á kú a burí yír rə́ ye ghaʼtíné, yír ye wìr yú, tímé kpù, e rə̀. Nyùy Tàr dzə̀ e ránén.

Nsùyrì Nyùy 99:5

Á wáa koʼór Nyùy Tàr woo Nyùy wòsən. Á wáa gvəʼtí e wun ghaa kàvàʼ, a ghvəm wun. Wù dzə̀ e ránén.

Nsùyrì Nyùy 99:9

Á kú a koʼór Nyùy Tàr woo Nyùy wòsən. Á wáa cù wun e wun gwan wo ranén. Nyùy Tàr woo Nyùy wòsən dzə̀ féyì e ránén.

Ŋwàʼ Fəə 20:5

Lá vèn yòʼ a ghvəm, lá vèn yòʼ a cù mebvə̀m mee shooy, bìʼ fo mo woo Nyùy Tàr woo Nyùy won dzəə̀n Nyùy wo wù kíyri ven é ŋàŋ. M yii maʼ ŋgeʼ e wóné wùn à wón woné, à wón wón woné, bìʼ ban ye atàr véví ban mo.

Ŋwàʼ Fəə 23:21

Vèn wáa ghvəm wun, a yunín wun. Wù súŋnin e mǒ yir ji kitú kém, a bó yòʼ dzə̀ wù làysìn jay wìr wo wù káy wun.

Ŋwàʼ Fəə 34:14

Bó yòʼ dzə̀ vèn wìy a ghvəm nyùy wùmòʼ gheéy. Mo woo Nyùy Tàr dzə̀ Nyùy wo wù kíyri ven é ŋàŋ, a bó m yòʼ taʼ e yen vèn à nyùy wùmòʼ.

Ŋwàʼ Fəə 34:7

A m din koŋ yém e wíri, ŋgwàʼ si ansə̀kì ansə̀kì, laysìn vinyo ve á buʼtì, kfə̀n laysìn shóʼór ye á shóʼor nsər sém, su njò yev. Yii bèy, a bó yòʼ dzə̀ m màʼtì ŋgaà jay, é wù boy. M fó ŋgeʼlàʼ e wóné bìʼ jay atàr vév, kfə̀n fó e wón woné, à wón wón woné.»

Aysaya 2:9

Á bèy, wìr msòŋ kfə̀n ne ji kifá ke kisaŋ ki. Wìr dzə̀m sèn ne kitú kfə́, a neŋ neŋén é nsay. Nyùy Tàr, lá à yòʼ kfə̀n nàn áwune.

Aysaya 27:11

Sí sooyì, tám se vici sí yúm, béʼkirì, é vikìy wáa wìy, a siv ji meŋkaʼ. Rúrú, wír vìne ter fo vinyò e kúmé, a Nyùy Tàr wo wù‑uù bomen áwune yòʼ wíy sham áwune. Wun wo wù‑uù bomen áwune yòʼ wíy dìn shammèndzə̀n aáwune.

Aysaya 30:11

Vèn bin ndzə̀m é kinyò ke vèn wayin ji á yii. Vèn maʼti dzə́ə ye vèn yii vinyo sho. Lá vèn yòʼ dzə́ə a lì vinyo ve Ŋgaà wo Ranén woó Isray, a ghiʼ ver shó.»

Aysaya 30:15

Ke Nyùy Tàr woo Tàr wor, wun woo Ŋgaà wo Ranén woó Isray suuy ki dzə̀ jii: «A vèn kfə̀n fo mǒ wùn, e dzə̀ʼə̀m ji nyaáŋ, bo m yíi bòyìr ven. A vèn neèm e mǒ sar, e yèʼtí e mǒ wùn, bo m yíi tavír ven. Yii bèy, a bó vèn yòʼ fə̀m taʼ, e yiì bèy.

Aysaya 5:16

Nyùy Tàr woo Taà Mànjòŋ wíy tinén nsaʼ wìr və́ mo yì dzəə̀n, tínenè, aá bínsí ji wù dzə̀ á feyì e gháʼtín. Wun woo Nyùy wo ranén wíy lòo neèr vinyo a dzə̀ ve ru ví, aá yén rú ji wù dzə̀ á e ránén, tíy jeéy fo wìr msòŋ.

Cù 10:3

Mooser nèn yòŋ e Aaron jii, «Á kinyo ke Nyùy Tàr‑iì suuy e ghan se wù‑uù yòŋèn jii, ‹Fo wìr ve dzə̀ á wàa koʼtí e mǒ ghaŋ, m kù wíy a dìn mo m dzəə̀n jeéy, e ránén, a m wíy a ker ghvə́m e wìr dzə̀m si.› » Aaron yú bey, e kù nèn gòʼ kisə́sə.

Cù 11:44

Dzə̀ mo woo Nyùy Tàr wo dzəə̀n Nyùy won. Vèn ku fò vitú vén ji vém vee wír, a dzə aránén mo m dzəə̀n e ránén. Lá vèn yòʼ lòr vitú vén e kifá ke ŋaŋrìn kí,

Cù 11:45

bìʼ fo mo woo Nyùy Tàr, m fə̀ə́r ne ven fó wòŋ Ejiv, e bòyìr ven fó vikwàn ji m wáa dzə Nyùy won. Vèn kú a dzə aránén, bìʼ fo m dzəə̀n e ránén.

Cù 19:2

ji wù suúy á e wìr dzə̀m woó Isray jii, «Vèn wáa dzə aránén, bìʼ fo mo woo Nyùy Tàr woo Nyùy won dzəə̀n e ránén.

Cù 20:26

Vèn kú a dzə wír vém, aá dzə̀ aránén, bìʼ fo mo woo Nyùy Tàr dzəə̀n e ránén. M shàv ne ven fo vitúm ví mvəm ji vèn kú a dzə ji wír vém.

Cù 20:7

Vèn ku fò vitú vén ji vém vee wír, a dzə aránén, bìʼ fo mo woo Nyùy Tàr dzəə̀n Nyùy won.

Nahum 1:2

Nyùy Tàr dzə̀ ŋgaà ŋkiyrì, a bó wù yòʼ yii shéʼ. Wù lo, wù shwìíy kilòŋ, e màʼ ŋgeʼ e wìr kitu. Nyùy Tàr kù yii maʼ ŋgeʼ e wír ve á túŋ wúu rəə́, shwiiy kilòŋ fo aŋgàa vibàn vəə́ adzə̀m.

Habakuk 1:13

Nyùy Tàr, sí yée yòʼ dzə̀ kfə́ə si yé a yen yii ye bií, bó yòʼ dzə̀ féyì, à tìím, a leéy vé yiì ye bií. Abaày, a dzə̀ à ghàn é le, e bó a leéy wír ve á méŋ wò leéyín? Áwune laar wír ve á yúnin wò, aà dzə́ kisə́sə, bìʼ ka?

Matio 6:24

«Bó yòʼ dzə̀ wìr wàa lìm atàr abaà. A wù lò, a lìm bèy, bo wù yíi a bàn wùmòʼ, a kòŋ wùmòʼ, a yu kinyo ke wùmòʼ woo wír, a kay wùmòʼ. Bó yòʼ dzə̀ vèn wàa lìm fo Nyùy, e kfə̀n a lìm fo mbàm si.

Joshua 24:18

Nyùy Tàr‑iì jùm vitúm vidzə̀m fo vèsə́n mbìy, e jùm sa veé Amor ve vé‑eè dzə́ e nsay fèn. Bo vèr kù yíi a ghvəm sa a dzə̀ Nyùy Tàr, bìʼ fo kù dzəə̀n wun Nyùy wòsən.»

Joshua 24:23

Wù suúy aáwune jii, «Vèn fəə́r ri anyùy vitum ve vèn kéríi, e wày shilív shén a dzə̀ e Nyùy Tàr woo Nyùy woó Isray wùn.»

Ŋwàʼ Rut 1:15

Yii bèy, Naomi suúy e Rut jii, «Leéy ri mo kifə́sín ké ki kfənen ne e bàm ji wun du, a dzə wùn à wír véné, aànyùy véné. Kú a kfən e bàm wó.»

1 Samuel 3:14

Á bèy, m nen lìʼ ji bó cúu yòʼ dzə̀ shó, e wìy dù mày ye dzə̀ yí kwaày jay woo Eli lav.»

1 Samuel 6:20

Á nèn a ghaynín jii, «A dzə̀ tìím la e Nyùy Tǎr si, Nyùy wo wù ranen ben? Ŋkùv və fèn lo lò fo vèsən, é wù du a dzə̀ fo ala?»