Joshua 22:5 - ŊWÀʼ NYÙY

⁵ Kù dzə̀ cáʼ ji vèn kú a yen ji á yúnín á nsər se Mooser woo ŋgaà lìm Nyùy Tàr‑iì foon e vèn, a yu ntir sə́, a kòŋ Nyùy Tàr woo Nyùy won, a ghan e wun mbòv, a yunín nsər sə́, a bar e wun wùn, a lìm fo fo shilív shidzə̀m, e fò kitú kén shó kidzə̀m.»

Joshua 22:5 Iomraidhean Croise

Nsùyrì Nyùy 106:3

Bòŋ ké wìr ve á yii kinyo là kiloʼ, jumrì a dzə̀ liì wo juŋ ghán sidzə̀m.

Nsùyrì Nyùy 78:7

Á kiiyì, aá ku nèn a tiír vifií e Nyùy wùn, a kuumé lim sə́, a yunín nsər sə́ ghán sidzə̀m,

Ŋwàʼ Fəə 15:26

Wù‑uù sùúy jii, «Dzə̀ mo Nyùy Tàr, wo wù fer ayàsí vén. A vèn yiì a yu mo, a yiì vinyo vee tìítiy, a lèm nsər sém, a yiì vinyo ve m tiirin e věn wùn vidzə̀m, bo m yòʼ yíi màʼ ŋgeʼ yàsí e věn kitu ye mò‑oò màʼàn e wír veé Ejiví kitu.»

Ŋwàʼ Fəə 20:6

Yii bèy, a m din koŋ yém e wóné, e ŋgwàʼ sí ŋgwàʼ si, e dù, e meé nsə̀kì, bìʼ koŋ ye atàr véví koŋ mo, lem nsər sém.

Ŋwàʼ Fəə 23:13

«Vèn lem vinyo vìn vi vidzə̀m ve mo woo Nyùy Tàr suuyin e vèn. Lá wìr yòʼ a ghvəm anyùy ámóʼó. Lá á yòʼ fə̀m yù, a wìr gáʼ yír sév fo wun shuù.

Ŋwàʼ Fəə 23:25

Vèn kú a ghvəm a dzə̀ mo woo Nyùy Tàr woo Nyùy won, é m wìy a səə̀vì ven e viyíkìr vi, à mendzə́v mè, e kfə̀n a kìŋ sa ven fó ayàsí.

Ŋgàn 4:23

Kìm kitú ké ki fó yiì ye bií, ku kìm, bìʼ fo yíi wìri kù lo a dzə̀ fó kinyò ke wù kwàʼtìn.

Aysaya 55:2

Yiì ka, é bo vèn wáa tòn mbàm e vifa, a bó ví yòʼ kúr bvəm? Vèn ghàn é le, e bóo ndzə̀ʼnìn, e kav mbàm, e lì, a yun vifá sho, a bó yòʼ dzə̀ ví sə̀ ven? Vèn yuúrí kinyo ke m suuy ki, é m din fo a dzə̀ vèn kòóy vifá ve yi ve juŋ vi. Vifá ve yi, a vèn ló yi, e yu búʼ.

Jeremia 12:16

Vitúm vìn vi dzə̀, a ví‑iì dànèr wír vém, á wáa kàn a dzə̀ nyùy woo *Baal. Yii bèy, aáwune kùvsín lèn, a jùmrì liì wìr vém, a yiì mo wù dzəə̀n, a kàn a dzə̀ yír yém ji Nyùy Tàr dzə̀ shó e tin, bo áwune sí yìi tuúy e wír vémé mvəm.

Matio 22:37

Jesus bìnèr jii, «Yì dzə̀ jii, ‹Wìr wáa kòŋ Nyùy Tàr woo Nyùy və shilív shidzə̀m, e fò kitú kfə́ shó kidzə̀m, e tìír vifií a dzə̀ é wùn wó.›

Matio 4:10

Jesus wám jii, «Satan, kóʼtí fo mǒ ghaŋ. Vé‑eè sàŋ é Ŋwàʼ Nyùy jii: « ‹Wìr wáa ghvəm a dzə̀ Nyùy Tàr woo Nyùy və, a yu a dzə̀ fo wun cáʼ.› »

Matio 6:24

«Bó yòʼ dzə̀ wìr wàa lìm atàr abaà. A wù lò, a lìm bèy, bo wù yíi a bàn wùmòʼ, a kòŋ wùmòʼ, a yu kinyo ke wùmòʼ woo wír, a kay wùmòʼ. Bó yòʼ dzə̀ vèn wàa lìm fo Nyùy, e kfə̀n a lìm fo mbàm si.

Ŋwàʼ Luk 1:74

wun wíy fəə́r ver fo aŋgaà vér vibàné wo, é vèr wáa lìm fo wun là fan,

Joon 12:26

A wìr taʼ ji wun wáa dzə wán wom lìm, wù kù a ghan vèr wun. M lóo dzə fo m dzə́, é kú a dzə vèr wun. Wìr wáa lìm fo mò, bo Tàr wor wíy bùʼ ŋgaàŋ.»

Joon 14:15

«A vèn koŋ mo, vèn wàa lèm nsər se dzəə̀n sém.

Lim Aŋgàa Ntum 11:23

Wù dù, e mèé fo, e yèn mo Nyùy bùʼùn wír vìy e vijuŋ vi, wù wáa sheʼrí, a tir áwune ji á kú a tiy a wùn à Taàtá Jesus shilív shimòʼón.

Lim Aŋgàa Ntum 27:23

M suuy bèn, bìʼ fo Nyùy wo m bunrì, Nyùy wo wù kér mo kì tumen nshìylav rə vitsə́ʼ, yì wíy, e tìím e mǒ ghaŋ,

Ŋwàʼ woó Rom 1:9

M suuy bèn, a Nyùy wo m foon kitú kém shó, a fìʼtì sáʼka və wo juŋ woo kùm Wán və kì ji m suuy a rú. M yii lóo bùnrì ghán sidzə̀m, m kù a kuumé ven,

Ŋwàʼ woó Rom 12:9

Vèn wáa kòŋ wíri rú e shilív shí, lá vèn yòʼ a suúy a dzə̀ fó shuù. Vèn wáa leʼ kinyo ke bi kí, a ghar a dzə̀ ke juŋ ki.

Ŋwàʼ woó Rom 8:28

A vèsən kì jii, Nyùy yii sə́ vèsən ve á koŋ wun, yii, a vinyo ve ví kooy vèsən vidzə̀m vi binkìr fo vèsən ji ve juŋ vi. Dzə̀ vèsən vin ve Nyùy liìn ji wír və́, á wáa yiì vinyo ve wù‑uù sìysìn vidzə̀m.

Remrí 10:20

Vèn wáa ghvəm Nyùy Tàr woo Nyùy won, a lìm fo wun, e kù a yeʼtí e wùn wó, lóo yiì kilìʼ, vèn wàa kàn yír rə́.

Remrí 11:1

Mooser ku nèn a suúy e wír veé Israyi jii, «Vèn wáa kòŋ rì Nyùy Tàr woo Nyùy won, a yiì kinyo kfə́, a yu sáʼ rə́, a tiy e wun kinyò, a lèm nsər sə́ ghán sidzə̀m.

Remrí 11:13

«Vèn wáa lèm nsər se m fó e vèn lán, a dzə̀ ji vèn wáa kòŋ Nyùy Tàr woo Nyùy won, a lìm fo wun shilív shén shidzə̀m, e fò kitú kén shó kidzə̀m.

Remrí 11:22

«Bo dzə̀ ji vèn ku wìy a way ŋàŋ, a lèm nsər se m fó e vèn lán ji vèn wáa yiì, a kòŋ Nyùy Tàr woo Nyùy won, a tiír kiwuú kén, a fìʼ, a tàŋèn cáʼ a dzə̀ é wùn wó.

Remrí 13:4

Vèn ku wìy shèm a dzə̀ e Nyùy Tàr woo Nyùy wón bàm, a ghvəm wun, a lèm nsər sə́, a yunín wun, a lìm fo wun, e kù a tàŋèn a dzə̀ é wùn wó.

Remrí 4:29

A vèn wìy a dzə fo, a tàʼ Nyùy Tàr woo Nyùy won, bo vèn wíy yen wun, a vèn fen fò kitú kén shó kidzə̀m, a tàʼ wun shilív shén shidzə̀m.

Remrí 4:4

Yii bèy, ven ve á kù‑uù tíy a dzə̀ e Nyùy Tàr woo Nyùy wòsə́n wùné kù dzə̀ə́ sho atin, e wìy shem lán.

Remrí 4:6

Vèn wáa lèm, a yiì. Kee shooy ki yíi a dìn vifií wùn à kiíyi e vitúm vímóʼ ví. Á lóo yu nsər sìn sidzə̀m, aá wáa yòŋ jii, ‹Rúrú, kitúm ke kí dzəə̀n wír nyanyày, e kfə̀n tàv kin ki dzə̀ ben, a dzə̀ afií, aá kfə̀n kì vinyo.›

Remrí 4:9

«Kinyo kimòʼón ki nén a dzə jii, vèn kim vitú vén ví, a tiír kiwuú kén, a fìʼ, a yen fóo làysìn kinyo ke vèn‑eè yenen e sí yéné. Lá vèn yòʼ biìmé, é kí fəə́ fo věn meliv mo vèn wíy a dzə sho. Vèn naari kinyo kee shooy ki e wón véné, e naàrì e wón woné.

Remrí 5:10

Yii bèy, a m din koŋ yém e wír ve á koŋ mo, lem nsər sémé, e kù a dìn bèy, e dù, e meé mo ŋgwàʼ si wíy a koʼ, ansə̀kì ansə̀kì.

Remrí 6:17

Vèn ku wìy wày ŋàŋ, a lèm nsər se Nyùy Tàr woo Nyùy won, a yiì kinyo kfə́ mo wù dìnèn, e kfə̀n a yunín sáʼ rə́ ye wù foon e vèn.

Hibru 12:15

Vèn wáa yen fo wìr maʼay Nyùy, e ràn kilíŋ ke wù bùʼùn wun sho, a yen sa fo wìr wáa màʼ ŋgoòy kinyò ke bi kí, é kí ram e věn mvəm, e bìvír wír anín.

Jeem 1:12

Wír wo dzə̀ wù wàa sheʼrí dzə̀ wo wù tosin é mvə̀m ŋgeʼ, e làa yòʼ gbù fo kinyò kímóʼ kí, e to e jay. Mo kinyo ki mùmèn wun, wù só, wù wíy a ker vinə́ŋsí, a dzə̀ dzəʼə̀m yee là may ye Nyùy kàʼàn wír ve á koŋ wun sho.

Jeem 2:5

Afə̀r vem, vèn yuúrí, e yù. Wír ve Nyùy‑iì shoʼon ji á wáy shilív e Jesus Kristu wùn, a ker ghay wùn à Nyùyi kù dzə̀ wír ve á tan e ndzə fèn. A dzə̀ áwune ve á wíy nəə́ e wùn mvə̀m saʼ, a yu vijuŋ ve wù‑uù kàʼàn wír ve á koŋ wun sho.

Joshua 23:8

Vèn ku yèʼtí a dzə̀ e Nyùy Tàr woo Nyùy wón wùn mo vèn‑eè sí yii, e to lán,

Ŋgaà Yen 15:3

a kùm, a yòv luŋ Mooser woo *ŋgaà ntum Nyùy, e kfə̀n a yòv wó Wàn Njiì Nyùy. Aá yov jii: «Éè Nyùy Tàr, wò woo Nyùy woo Ŋgaà Vitaàví Vidzə̀m, vinyo ve à yii vi dzə̀ féyì, a wíri leey, kér gháʼ. À dzə̀ Fon wo wù sáʼ vitúm vidzə̀m, a sáʼ yée du tìítiy, là kiloʼ.

1 Samuel 12:20

Samuel bìnèr jii, «Lá vèn yòʼ a fàn. Fə̀m mo vèn yiìn kinyo ke bi kí ben, lá vèn yòʼ màʼày Nyùy Tàr. Vèn wáa ghvəm wun vèn à shilív shén shí shidzə̀m.

1 Samuel 12:24

Vèn kú a fàn a dzə̀ Nyùy Tàr, a lim fo wun kijuujùŋ vèn à shilív shén shí shidzə̀m. Vèn kuúmé vinyo ve ghaʼtín ví ve wù yiìn e vèn.

1 Samuel 7:3

Samuel nèn yòŋ wír veé Isray adzə̀m, e sùúy aáwune jii, «A vèn sí taʼ e kfən fo Nyùy Tàr, vèn à shilív shén shí shidzə̀m, vèn fə̀tí anyùy kisaŋe fo věn mvəm, bo taaka mebvə̀m me nyùy woo wiíy woo *Ashtoret, e fò vitú vén e Nyùy Tàr, a cù a dzə̀ wun. Vèn yii bèy, é wù nèn yiì fə̀ə́r ven fo wír veé Filistiàá wo.»