Joshua 2:24 - ŊWÀʼ NYÙY

²⁴ Á suúy e Joshua jii, «Ké ru kí, Nyùy Tàr wày ne woŋ woo shooy e dzə̀m e vèsə́n kiwo. Jòkìnyàʼ, a kindzə́m kí kù gwar wir dzə̀m woo fó gwárin bìʼ vèsən.»

Joshua 2:24 Iomraidhean Croise

Ŋwàʼ Fəə 15:15

Wúné wíy beemé afon veé Edom, vilìmbìy veé Moav vi wíy a yàʼ. Melív mè wíy seèm wír veé Kanan, aá weey.

Ŋwàʼ Fəə 23:31

M wíy fèr bìíy yen, e kèʼ fo Rìbà Ndzə̀v wo Baar, e dù, e meé e Rìbà Ndzə̀v woó Filistia, e kfə̀n kèʼ fo woʼ, e dù, e meé e ndzəv yee Yufret. A m wíy yiì, áàŋgàa nsayi gbu ven, é vèn jum áwune, e fə̀ə́r.

Ŋgàn 25:13

Wìr woo jwáʼ lo ntum, shilív shé ŋgaà ntum shi rə̀sìn, moo wír wo wù kavin vifá, e ndzə̀ʼnìn, e nò mendzə́v me rəə̀n mè, wúné rə́sín. Wù yii, a shilív shé tàr wov lìm shi rəsìnè.

Joshua 1:8

Lá à yòʼ wìy yàr fó a yòŋ Ŋwàʼ Nsər və̀n. Á yòŋ, a rə̀tì e shùy wùn à vitsə́ʼə́. Kú a yen ji à wáa yunín a kinyo kidzə̀m ke kí dzəə̀n shó, é dzə́ə sé si nèn a ran, é vinyo vé vi wáa ghan kijuŋ.

Joshua 2:23

Vilum vee abaà víyi nèn sə̀y fó agwan, e tùm ndzə́v, e kfə̀n é bàm, e dù yèn Joshua woo wan Nun, e fèr kinyo kidzə̀m ke kí‑iì kooyin áwune.

Joshua 5:1

Á bèy, afon veé mbìv Jordan yee fo shùy yii nəə adzə̀me lòo yu mo Nyùy Tàr tinen ndzə́v yee Jordan, yí tiím, e mèé mo wír veé Israyi‑iì tumen e mày, tím yéví kpú, wún wóví seèm, la áwune yòʼ kfə̀n a ker vitaáví vée fùnèn wír veé Isray. Aàfon vee shooyi‑iì dzə̀ veé Amor wùn à veé Kanane, a veé Kanane‑eè dzə̀ kév a dzə̀ é ghaŋ se rìbà ndzə̀v.

Joshua 6:2

Nyùy Tàr yiì lò, e sùúy e Joshua jii, «Yuúrí, e yù, m wày ne ŋkàlaʼ yee Jeriko rə̀n e wò kiwo, à fòn, à vé rərí, a kù dzə̀ antav ve ghaʼtíné.

Joshua 8:1

Nyùy Tàr nèn yòŋ Joshua, e sùúy sho jii, «Lá à yòʼ a fàn, lá à yòʼ a yàʼ. Lì vé rər veé Israyi adzə̀m, é vèn áwune kóʼ, e tòn Ay. M wày ne fon woó Ay e wò kiwo, à wír vəə́, à ŋkàlaʼ rə, à nsay rə.

Atǎr Nsaʼ 1:2

Nyùy Tàr bìnèr jii, «A dzə̀ kù tòmbìy dù rám Juda. M wày ne nsay wìr veé Kanan aáwuné kiwo.»

Atǎr Nsaʼ 18:10

Vèn yíi meé fo, aá yén wír ve á dzə́ dzəʼə̀m yév là kindzə́m. Dzə̀ kirə́ʼ, a kí kùʼ feyì, a Nyùy fò ne kirə́ʼ kee shooy e vèn. Kirə́ʼ, a bó kifá keé kitu ke nsay kímóʼ kí yoʼ bùŋ fó fo.»

Atǎr Nsaʼ 7:9

Kú a dzə vitsə́ʼ e kishiíy fóo fèy, Nyùy Tàr suúy e Gidiyon jii, «Ŋáʼáy, e sə̀y é kilaʼáy fo wír veé Midiane baʼtin, e ghìʼ áwune e rə́r sí, bìʼ fo m wayin ne áwune e wò kiwo.