Joshua 1:7 - ŊWÀʼ NYÙY

⁷ Dzə̀ cáʼ ji à ku kùr a dzə̀ á tím, e wày ŋàŋ. Ku yèn ji à kú a yunín a kinyo kidzə̀m keé Ŋwàʼ Nsər wo Mooser woo ŋgaà lìm wom‑eè foon e wò, a yiì réŋréŋ mo kí dzəə̀n. Lá à yòʼ bìn ndzə̀m e yìmòʼ yee ntir, é dzə́ə sé si nèn a ran e kirə̀ʼ kidzə̀m ke à du sho.

Joshua 1:7 Iomraidhean Croise

1 Afòn 2:2

Wù‑uù tír, suuy jii, «M sí lo, a màʼtì kitú ke nsay. Kúr shilív shí, a dzə ji lumèn.

1 Afòn 2:3

Á yiì vinyo ve Nyùy Tàr woo Nyùy wò yòŋèn ví, a ghan e wun mbòv, a yu sáʼ rə́, a yunín nsər sə́. Kú a jùmrì vinyo ve wù tínen vi vidzə̀m, à ntò se vinyò si mo sí dzəə̀n é Ŋwàʼ Nsər wo Mooser‑iì saŋen, é vinyo vé vi wìy a ghan kijuŋ, a fə̀m dzə̀ ka, aà fə̀m dzə̀ feé.

2 Afòn 22:2

Josia‑aà yii vinyo ve ví wáa gheén Nyùy Tàr. Wù‑uù jumrì kinyo kidzə̀m a dzə̀ ké tàr wov Davir, ghán e wun mbòv, a wù yòʼ‑oò fəə́ fo ŋwàn.

1 Wòŋ 22:13

Aà lò, a yu sáʼ Nyùy Tàr, a jùmrì vinyo ve wù tinen, e fò e Isray, e shaà fo Mooser, bo vinyo vé vi yíi a ghan kijuŋ. Kúr tímé, e wày ŋàŋ. Lá à yòʼ a fàn. Lá à yòʼ a weèy.

2 Wòŋ 15:7

Kén kí nén a dzə jii, vèn wáa tiy a kitávín, é la melív men mè yòʼ a seèm, bìʼ fo lim yéné yíi a ker vilaámé.»

2 Wòŋ 26:5

Wù kù‑uù yú fo Nyùy e ghan se taà cù woo Sekariya‑aà dzə̀ə́ sho, a wù tír wun e vinyò ve Nyùy. Mo wù‑uù jumrì Nyùy Tàr bey, Nyùy Tàr nèn səə̀vì wun.

Ŋwàʼ Jov 1:8

Nyùy Tàr dzə́r shó jii, «À shoòshí ŋgaà lìm wom woo Jov, a kwàʼtì ké ji ka? Wìr yòʼ dzə̀ shó e kitu ke nsay, wo wù dzəə̀n là shilóm, tíy e suuyrú, ghvə́m mo, kfə̀n bin ndzə̀m é kinyò ke bi kí moo wun.»

Nsùyrì Nyùy 80:19

Éè Nyùy, wò woo Taà Mànjòŋ, ku kfə̀n tìír ver e věr shwin. Dìn shilív shé she juŋ shi e vèr, é vèr yiì lùŋ.

Ŋgàn 4:27

Kú a ghan a dzə̀ e Nyùy mbòv, a yen fóo bìn, e koy yìyí, kìn wó ŋkoòvìi. Kú a bàʼàr dzə́ə sé kisaŋ si sidzə̀m.

Ŋgàn 8:20

M yii yii vinyo vém tìítiy là nsem, tínen ve tinén ví là kiloʼ.

Daniel 10:19

Wù nèn yòŋ mo jii, «Wò, wo Nyùy kòŋèn é ŋàŋ, lá à yòʼ a fàn. Nyaáŋ wáa dzə vèn wun. Á dzə kitávín, ku tàv ben, e kòŋrí.» Wù súŋnín bey, vitaáví ví ku nèn wìy e mǒ wùn. M bìnèr jii, «Tàr wor, kú a suŋnín. À kù kì tàvír ne mo, wún wómé kfə́n fó.»

Kintaŋ 27:23

e nèn neèr wó rə́ é kitu wo, e lèm wun ji kilìmbìy ke wíri mo Nyùy Tàr‑iì yòŋèn e wun.

Remrí 11:8

«Bo dzə̀ jii, vèn sí lo, e liysín ndzə́v, e nəə́ e nsay ye vèn yíi sə. M yoŋ e vèn lán jii, a vèn lèm nsər sidzə̀m se m fó, bo kí yíi sə, é vèn távkír, e yòv nsay.

Remrí 12:32

«Kinyo kidzə̀m ke m yòŋèn e vèn, vèn ku wìy wày ŋàŋ, a lèm. Lá vèn yòʼ wìy dzə̀sì kifá sho, lá á yòʼ shòʼór.

Remrí 28:14

Lá vèn yòʼ wìy shòʼór nsər yìmòʼ fo se m fó e vèn lán si. Lá vèn yòʼ a bìnbìn, e dù, a ghvəm anyùy ámóʼó, a lìm fo áwune.

Remrí 29:8

e tòn bèy, e faàsì nsay yev, e jàv e rám Ruben wùn à yé Gadi, à kintoʼnìn ke yé Manassèe ji vitsə́ʼ vév.

Remrí 29:9

Kí nén a dzə jii, vèn wáy ŋàŋ ji á kú a lèm ntò se mensàŋ sìn sidzə̀m, é vinyo ve vèn yii vidzə̀m vi wìy a dù kijuŋ.

Remrí 31:7

Á bèy, Mooser nèn jàŋ Joshua, e yòŋ sho e wìr dzə̀m woó Isray si jii, «Kúr tímé, e wày ŋàŋ, bìʼ fo kù yíi tsəəné wò wír vìn, e dù sho e nsay ye Nyùy Tàr‑iì lìʼìn ji wun wíy fo aàtàr véví. À kù wíy toʼtí fó, e jàv, aáwune yov ji vitsə́ʼ vév.

Remrí 4:2

Vèn kú a lèm a dzə̀ nsər se Nyùy Tàr woo Nyùy wòsən se m yoŋ e vèn sí. Lá vèn yòʼ dzə̀sì kifá e vinyò ve m yoŋ e vèn, lá vèn yòʼ shòʼór kifá fo fo.

Remrí 5:32

Mooser kfə́n a yòŋ jii, «Wír veé Isray, kù dzə̀ cáʼ ji vèn ku wày ŋàŋ ji á wáa yiì a dzə̀ mo Nyùy Tàr woo Nyùy won yòŋèn e vèn. Lá vèn yòʼ shòʼór nsər rə yìmòʼ, e bàr ŋwàn.

Joshua 1:1

Mo Mooser woo ŋgaà lìm Nyùy‑iì kpuun, Nyùy Tàr yòŋ Joshua woo wan Nun, wun woo Joshua wo wù‑uù sə́ Mooser, e sùúy sho jii,

Joshua 1:8

Lá à yòʼ wìy yàr fó a yòŋ Ŋwàʼ Nsər və̀n. Á yòŋ, a rə̀tì e shùy wùn à vitsə́ʼə́. Kú a yen ji à wáa yunín a kinyo kidzə̀m ke kí dzəə̀n shó, é dzə́ə sé si nèn a ran, é vinyo vé vi wáa ghan kijuŋ.

Joshua 1:9

Kí m lo yòŋ e wò ji à kúr tím, e wày ŋàŋ. Lá à yòʼ a fàn, lá à yòʼ weèy. Nyùy Tàr woo Nyùy won dzə̀ vèn wun kirə́ʼ ke à du sho kidzə̀m.»

Joshua 11:15

Joshua‑aà lo yiì réŋréŋ mo Nyùy Tàr‑iì yòŋèn e Mooser woo ŋgaà lìm və, é bo wù yoŋ e wun ji á mo wù yii. Bó wù yòʼ‑oò lo yàr kinyo là yii fo vinyò vidzə̀m ve Nyùy Tàr‑iì yòŋèn e Mooser.

Joshua 23:6

Kí ku nèn a dzə jii, vèn kú a tiy kitávín, e wày ŋàŋ ji vèn kú a yiì kinyo kidzə̀m ke kí dzəə̀n kisáŋén é Ŋwàʼ Nsər Mooser. Lá vèn yòʼ rə̀ʼə́m fo fo, a kfən e koy yìyí, kìn é koy ŋkoòvìi,