Joon 3:16 - ŊWÀʼ NYÙY

¹⁶ «Nyùy kòŋ ne wír veé ndzə adzə̀m e ŋàŋ, e fò màyshó Wan və ji wìr dzə̀m wo wù wáy shilív é wùn wó luŋ, a ker dzəʼə̀m yee là may, e làa yòʼ nəə́ e ŋgeʼ yee là may.

Joon 3:16 Iomraidhean Croise

Kèʼlo 22:12

Wù suúy shó jii, «Lá à yòʼ màʼ kiwó ké e wǎn kitu. Lá à yòʼ yiì kinyo e wun. M kìíy ne lèn ji à fan a Nyùy, bìʼ fo à yoʼ lò kìm wan wò, màyshó wan wò, fo mò woo Nyùy.»

Kèʼlo 22:2

Nyùy suúy shó jii, «Lì wan wò, màyshó wan wò Aysi, wo à koŋè, e dù sho e nsay Moria, e tòn, e cù mo shó, e gwan wo m yíi dìn e wò.»

Aysaya 9:6

Kí dzə̀ jii, vèsən kòóy ne wán. Á fò ne vèsən wán lumèn. Wù wíy a saʼ vifon. Á wíy a yòŋ wun jii, Ŋgaà Ntir wo ghaʼán, Nyùy wo kuʼùn, Tàr wo wù gòʼòn kàŋ mòʼón, Wan Fòn woo Ŋgaà Nyaáŋ.

Matio 9:13

Wù kfən sùúy jii, «Vèn du, e yèʼéy nsàv kinyò ke vé‑eè saŋen é Ŋwàʼ Nyùy ji Nyùy suuy a jii, ‹Ke m koŋ ki dzə̀ ji wìr wáa sham wùmòʼ woo wír, e shaà fó a rəsí, a seerí a dzə̀ nyám si, a cù mo shó.› Mo Nyùy suuy bèy, kém kí nén a dzə, a bó m yòʼ wìy ji m kfə́n a bi wír ve á yén vitú vév ji vé Nyùyi. M wìy ji m bí a dzə̀ vé jayi.»

Maak 12:6

Wìr wo wù‑uù jòʼsìn e wùn kiwo cáʼcáʼ nèn a dzə wán və, a wù‑uù kòŋ é ŋàŋ. Fo bàm, wù gér wán və̀y, e tsə̀nsí, a wù‑uù kí ji á yíi a ghvəm a wán və.

Ŋwàʼ Luk 2:14

«Á wáa burí Nyùy wo wù dzəə̀n é ntoò yùv. Wù fò ne nyaáŋ é nsay fo wír ve wù koŋe adzə̀m.»

Joon 1:14

Á mo Jínyùy‑iì wìyìn, e lì mbom wìr, a dzə wùn à wíri, a kòŋ áwune féyì, a dìn rú mo Nyùy dzəə̀n, vèr wáa yen vikuʼùy və́. A kù dzə̀ vikuʼùy vé Tàr wov, bìʼ fo kù jòʼsìn wun wo dzəə̀n Wan Nyùy.

Joon 1:18

A bó wìr yòʼ‑oò yiì ne yèn sí Nyùy. Kù jòʼsì màyshó Wàn Nyùy və̀n wo wù dzə́ e Tàr wóv ghaŋ, wo wù dìnèn e wíri mo Nyùy dzəə̀n.

Joon 1:29

Yì rán kibvəə́shí, Joon yén Jesus, a wù wiyì, e nèn a dìn e wíri jii, «Vèn yén wír wo wù mán vinyo ve wír veé ndzə adzə̀me jáyí. Wù dzə̀ moo wan njiì wo Nyùy seé, e taŋrí wíri shó.

Joon 10:28

a m fó dzəʼə̀m yee là may aáwune. A bó yòʼ dzə̀ áwune dzəə nə̀ə́ e lòn, a bó yòʼ dzə̀ wìr faàsì áwune fo mǒ kiwo gheéy.

Joon 3:15

é wír ve á wáy shilív é wùn wó adzə̀me luŋ, a ker dzəʼə̀m yee là may.

Joon 3:18

Wír wo wù wáy shilív e Wàn Nyùy wùn bòy ne fo lòn. Wìr wo wù tén fó way lì ne lòn, bìʼ fo wù leeyin wír wo dzəə̀n Wan Nyùy ntéŋ, a bó wùmòʼ yòʼ kfə̀n dzə̀.

Joon 3:36

Wìr wo wù wáy shilív e Wàn Nyùy wùn sí kér dzəʼə̀m yee là may. Wìr wo bó wù yòʼ yú kinyo kfə́ yòʼ wíy a ker dzəʼə̀m yee shooy gheéy. Lǒn Nyùyi kù gòʼ ne e ŋgaàŋ kitu ghán sidzə̀m.

Joon 6:40

A Tàr wor sìysì ne ji wìr dzə̀m wo wù wiy, yén Wán və, wáy shilív é wùn wó wáa ker dzəʼə̀m yee là may. A kí dzə̀ jii, m wíy fəə́r ŋgaàŋ fo kpu e ghan sé bàm sí.»

Ŋwàʼ woó Rom 5:10

Kí kfə́n a dzə jii, vèsən‑eè dzə́, yii vinyo ve bi ví, ban Nyùy bánen. Mo wù‑uù yiìn, Wan və kpú, e màn vinyo vee shooy, vèsən wáa dzə ŋkar sə́ lèn, bo dzə̀ vèsən wàa kiíy sa jii, mo Wan və fəən ne fo kpu, a wù kù yíi a dzə sho, bo wù kù wíy yiì sa, é vèsən luŋ, a dzə a vèsən à Nyùy.

Ŋwàʼ woó Rom 5:8

Mo Nyùy‑iì tumen Jesus Kristu, wù kpú a dzə̀ fo vèsən vee aŋgàa vinyò ve bi ví, kí nén a dìn mo wù koŋ vèsən é ŋàŋ.

Ŋwàʼ woó Rom 8:32

Wun woo Nyùy kù wíy màysì, a yiì vinyo vìn e vèsən. Mo wù‑uù foon Wán və, wù kpú fo vèsən, e làa yòʼ a bavtí, bo vèsən kì ji wù yòʼ wíy kìm kifá kímóʼ kí fo vèsən gheéy.

Efesor 2:4

Yii bèy, Nyùy kú a kòŋ vèsən é ŋàáŋàŋ, a rər mendzən fo vèsən ghán sidzə̀m.

2 Tesalonika 2:16

Vèr ku nèn a lon fo wúnwun woo Taàtá wòsən Jesus Kristu wùn Tàr wòsən Nyùy jii, á kú a bayrí melív men, a tavír ven, é vèn wáa suúy, a yiì a dzə̀ vinyo ve juŋ vi. A Nyùy wo vèsən lón fo fo və̀n‑eè lo dìn ji wun koŋ vèsən. Wù‑uù shàm vèsən, e yiì, melív mèsən mè wáa lùm ghán sidzə̀m, e kfə̀n yiì, vèsən wáa shìy a dzə̀ vijuŋ ve wù‑uù kàʼàn vèsən shó.

Titur 3:4

Yii bèy, Nyùy wo wù luŋèr vèsən nèn wìy lò, e dìn mo wù koŋ vèsən, rə́r mendzən fo fo,

Hibru 2:9

Ke vèsən yén lèn ki dzə̀ Jesus wo wù sáʼ vifá vìn vidzə̀m. A Nyùy‑iì lo lèm wun fo nshèelav sə́ sí mbìv tsə̀n e bǎm shintàm. Wù‑uù lèm bey ji Jesus kpú á fo wìr dzə̀m mo wun woo Nyùy‑iì shamen áwune, e sìysì. Wáa dzə lèn, a Nyùy búʼ ne wun, e fò vitaáví vé saʼ sho ji á wáa ghvəm, a yu fo fo, bìʼ fo wù‑uù biimen ŋgeʼ, e kpù fo wíri.

1 Joon 3:1

Vèn ku yèn búʼú mo Nyùy koŋ vèsən, yoŋ ji wón və́. A bó wù yòʼ yoŋ a dzə̀ fó shuù, vèsən dzə̀ rú wón və́. A bó wír veé nsay fène yòʼ kì, bìʼ fo bó á yòʼ kiìn sá Nyùy.

1 Joon 4:19

Vèn kuúmé ji vèsən koŋ Nyùy, kfə̀n koŋnìn lèn, bìʼ fo yì‑iì kèʼèn wun woo Nyùy, a kòŋ vèsən.

Ŋgaà Yen 1:5

A m kfə̀n lón fo Jesus Kristu wo kù yii din wun kinyo ke dzəə̀n ke ru kí e vèsən. Dzə̀ wun wir mbìy wo wù‑uù kèʼèn, e fəə̀ fó kpu, a kér wun afon ve á sáʼ nsay adzə̀m. Vèsən kú a burí wun wo wù kòŋèn vèsən, e cùtì mensə́ mvə, vèsən bóy fo vèsə́n lǒn vinyò ve bi ví.