Joon 3:11 - ŊWÀʼ NYÙY

¹¹ Kú a kiíy rú jii, vèr súŋnin vinyo vìn a dzə̀ ve wíri kiìn mo ví dzəə̀n, kfə̀n fer ve á yén mo ví kooyì, a bó ven vee aŋgàa yeʼéyi yòʼ biíme kinyo ke vèr fiʼtì.

Joon 3:11 Iomraidhean Croise

Aysaya 50:2

Mò‑oò wìy ji m luŋer ven, yiì ka, la wìr yòʼ a dzə wóo yuurí? Yì‑iì yiì ka, é bo m wáa suúy kinyo, é la wìr mòʼón yòʼ a bìnèr fo věn mvəm? Vèn kwaʼ ji bó m yòʼ kér mbòv wóo tin ven shó fo vikwàn, a bó m yòʼ kér kitar kée bòyìr ven shó à? A dzə̀ m sùŋnín suŋnín, rìbà ndzə̀v yùm, ndzə́v sí yùm, sə́ si toòŋé kilòŋ ke yumén kí, e kpùkír.

Aysaya 53:1

Yii bèy, wìr dzə̀ shó wo wù biimen ntum ye vèr tiísi a? Wìr dzə̀ shó wo wù yenen vitaáví vé Nyùy Tàr é kinyò fèn, e səə̀m a?

Aysaya 55:4

Rúrú, m yiì ne, wun woo Davir wáa dzə ji njen, a fìʼtì mo m dzəə̀n e vitúm vi, a m lèm ne wun ji kilìmbìy, wù wáa saʼ vitúm.

Aysaya 65:2

Fə̀m mo wír veé Israyi‑iì sə́ kóy vèr áwune, m kù‑uù rə́si shiy áwune ji m mán vinyo vév. Áwune kù yii a dzə̀ vinyo ve kisaŋ vi, kù tíy e kinyò a dzə̀ ke kí gheen áwune.

Matio 11:27

Jesus nèn kfə̀n sùúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bó yòʼ dzə̀ sá wír, wù kìíy Tàr wor, kù jòʼsì mo woo Wán wùn à wír ve Wàn shoʼtin ji wun din Tàr wov shóo.

Matio 23:37

Jesus nèn lò, e yòŋ jii, «Éè Jerusalem, éè Jerusalem, à yúyri aŋgàa ntum Nyùy, tsə́mri wír ve Nyùy túm fo wò adzə̀m e tíyí, aá kpúkirì. M mùm ne akàŋ anín ji m báʼtí wón vé mo yeè ŋgvəv kùʼtí wón é sar vàv, la à yòʼ a biimé.

Ŋwàʼ Luk 10:22

Jesus kfə́n a suúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bo yòʼ dzə̀ sá wìr kìíy Tàr wor və̀n, kù jòʼsì mo woo Wán wùn à wír ve Wàn shoʼtin ji wun din Tàr wov shóo.»

Joon 1:11

Wù‑uù wìy, e dù a dzə̀ e wír ve wù‑uù shoʼon ji vəə́ wòŋ, la áwune yòʼ a yen wun gheéy.

Joon 1:18

A bó wìr yòʼ‑oò yiì ne yèn sí Nyùy. Kù jòʼsì màyshó Wàn Nyùy və̀n wo wù dzə́ e Tàr wóv ghaŋ, wo wù dìnèn e wíri mo Nyùy dzəə̀n.

Joon 12:49

Bó m yòʼ fiʼtì kinyo ji fiʼtì mo. M kù fiʼtì kinyo a dzə̀ ke Tàr wor wo wù tumen mo tiisin ji m wáa fìʼtì.

Joon 14:24

Wìr wo wù yòʼ koŋ mo, yòʼ lem kinyo kém. A bó kinyo ke vèn yú fo mò kí yòʼ fə̀m dzə̀ kém. Dzə̀ ké Tàr wor wo wù tumen mo.

Joon 3:12

Mo m fer vinyo a dzə̀ ve ví kooy e nsay fèn, a ví gháʼ fo vèn biímé, a m lò, a fèr a dzə̀ veé yuv, bo bó yòʼ dzə̀ vèn kìíy mo ví dzəə̀n.

Joon 3:13

Wìr wùmòʼ yòʼ‑oò yiì ne kòʼ e Nyùy wòŋ woó yuv, kù mày ŋgaà wo wù loòn fó fo, wo yírí dzəə̀n *Wanwìr.

Joon 3:3

Jesus bìnèr jii, «Kú a kiíy rúrú jii, bó yòʼ dzə̀ wìr shòv sáʼ Nyùy e si, a bó á kfən dzə̀ə́ ŋgaàŋ dzəə́n ji wír wo fíy.»

Joon 3:5

Jesus bìnèr jii, «Kinyo ke m suuy kìn ki dzə̀ ke ru kí. Aá dzə̀ là fó dzəə́ wír fo mendzə̀v, é Kiyoy ke Nyùy ki kfən dzə̀ə́ ŋgaàŋ, bo bó yòʼ dzə̀ ŋgaàŋ nə̀ə́ e Nyùy mvə̀m saʼ.

Joon 5:43

M wìy ne lèn, a suúy ji tùm Tàr wor mo, la vèn yòʼ a yuurí kinyo kém gheéy. Vèn lóo yìi yen, a wìr wùmòʼ wíy, a suúy kinyo ji suuy wun, é vèn nèn a yuurí.

Joon 7:16

Jesus lò, e sùúy jii, «Kinyo ke m yéʼey kìn ki yòʼ lò fo mò, dzə̀ ké ŋgaà wo wù tumen mo.

Joon 8:14

Jesus bìnèr jii, «A fə̀m naarì mo kitú kém, bo kinyo ke m suuy ki dzə̀ rú. M kì fo m loòn, a m kì fo m du, a bó vèn yòʼ kì.

Joon 8:26

A kì dzə̀ m wàa suúy vinyo vinín, a sayrí vinyo vén. Yii bèy, a m fiʼtì kém kinyo e wír veé ndzə fène a dzə̀ ke mò‑oò yuun fo ŋgaà wo wù‑uù tumen mo, a vinyo və́ ví kù yii dzə́ ve ru ví.»

Joon 8:38

M fiʼtì vinyo a dzə̀ ve mò‑oò yenen e Tàr wór laʼ, a vèn yii kén vinyo a dzə̀ ve vén vee atàrí‑iì dànèn ven shó.»

Lim Aŋgàa Ntum 22:18

m yén Jesus, a wù suuy e mò jii, ‹Lò cér fo Jerusalem fèn, bìʼ fo wír vee féne yòʼ wíy biimé kinyo ke à fiʼtì kùm mo.›

2 Korin 4:4

Ké wír vìn ki dzə̀, a sə̀tí Satan woo nyùy wo wù kér ndzə rə̀n lèn vifií vév fo á biíme sáʼka Nyùy wo juŋ. A bó yòʼ dzə̀ áwune yèn rán ye sáʼka Nyùy wìyìn shó, a kiíy mo Kristu dzəə̀n. Kristu, wo wùn Nyùy dzəə̀n kikúv kimòʼón.

Ŋgaà Yen 1:5

A m kfə̀n lón fo Jesus Kristu wo kù yii din wun kinyo ke dzəə̀n ke ru kí e vèsən. Dzə̀ wun wir mbìy wo wù‑uù kèʼèn, e fəə̀ fó kpu, a kér wun afon ve á sáʼ nsay adzə̀m. Vèsən kú a burí wun wo wù kòŋèn vèsən, e cùtì mensə́ mvə, vèsən bóy fo vèsə́n lǒn vinyò ve bi ví.

Ŋgaà Yen 3:14

Wìr və̀y kfən sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Ladisia. A wú dzə̀ jii: «Kinyo kìn ki sùúy mo wo á yoŋ ji Amen. Kù yii din mo kinyo ke dzəə̀n ke ru kí, là kiloʼ. Nyùy‑iì mbaà a dzə̀ mo, e bóo bom vifá ve wù‑uù bomen vidzə̀m.