Joon 2:11 - ŊWÀʼ NYÙY

¹¹ Jesus‑eè yiì kinyo kìn e Kaana woó Galeli foo fèy, a dzə̀ kiŋgaʼnìn ke kinyò ke mbìy ki ke wù‑uù dìnèn, wíri wáa yen vitaáví ve Nyùy foon shó. Mo wón və́ lìme yenen, e nèn màysì, e wày shilív é wùn wó.

Joon 2:11 Iomraidhean Croise

1 Afòn 17:24

Wiíy və̀y suúy e Elija jii, «M kìíy ne lèn ji à dzə̀ wir Nyùy, a jì ye yì fəə́ fo wò shuù dzə̀ rú jí Nyùy.»

Nsùyrì Nyùy 72:19

Á wáa burí yír rə́ ghán sidzə̀m. Vikuʼùy və́ ví ku rùn kitú ke nsay. Amen, Amen.

Nsùyrì Nyùy 96:3

Á kú a fìʼtì vikuʼùy və́ e vitúm vi vidzə̀m, a fèr viŋgaʼnìn ve lìm ve wù yii, é wíri yú adzə̀m.

Ŋwàʼ Fəə 14:31

Mo wír veé Israyi‑iì yenen kiŋgaʼnìn ke kinyò ke Nyùy Tàr yiìn, e laàr wír veé Ejiv bèy, á nèn a fàn Nyùy Tàr, e wày shilív e wun wùn, e kfə̀n wày sá e Mooser woo ŋgaà lìm və́ wùn.

Ŋwàʼ Fəə 4:9

Yii bèy, aá dzə̀ làa yòʼ fə̀m biimé viŋgaʼnìn ve vinyò vee vibaà vin, kìn á tèn fóo yu jí yè, à sèr mendzə́v fó ndzəv yee Naay, e sə̀r fo nsay, é mendzə́v me à serin fó ndzəv mee shooy mè binkir ji mensə́.»

Ŋgaà Tàrvìnyò 9:7

Kí nén a dzə jii, kú a yi viyíkìr vé vi, a yu vijuŋ vi, a no meluʼ mè, é wúné wáa bòŋ wò, bìʼ fo kin ki dzə̀ kinyo ke Nyùy kù yenen ji dzə̀ à wàa yiì.

Aysaya 40:5

Á bèy, é wíri nèn yèn vitaáví vé Nyùy Tàr. Wìr dzə̀m wíy yen, a ŋgaàŋ fə̀m soò fèé. Á mo Nyùy Tàr suuyin ji kí wíy a dzə.»

Malakay 2:2

A vèn dzə̀ là fó yu jí yem, e lì e shií, a ghvəm mo mo yír yémé dzəə̀n, bo m yíi màʼ lòn e věn kitu, e shov kisəəvì ke vèn kérí. Mo vèn yòʼ kér shií ji á ghvə́m mo, bo, e ké ru kí, m kù shòv ne ven.

Joon 1:14

Á mo Jínyùy‑iì wìyìn, e lì mbom wìr, a dzə wùn à wíri, a kòŋ áwune féyì, a dìn rú mo Nyùy dzəə̀n, vèr wáa yen vikuʼùy və́. A kù dzə̀ vikuʼùy vé Tàr wov, bìʼ fo kù jòʼsìn wun wo dzəə̀n Wan Nyùy.

Joon 1:17

Kinyo ke vé‑eè jumrì fo mbìy ki kù mày nsər se Nyùy‑iì foon e Mooser. Jesus Kristu nèn wìy kfə́, a kòŋ wíri, e yiì, á kiíy rúrú mo Nyùy dzəə̀n.

Joon 1:43

Ndzə kfən bvəə̀shí, e ràn é kishiíy kímóʼ kí, Jesus nèn wày ji wun du a e mbìv wòŋ yee Galeli. Wù lòo dù, e yèn wír wùmòʼ, aá yoŋ ji Filiv, e sùúy sho jii, «Wìyi, é wòsò wáa ghan.»

Joon 1:50

Jesus bìnèr jii, «À biìmé lèn bìʼ fo m toʼon cáʼcáʼ ji m kì kì ji à dzə́ é sar kici a? À wíy yen vinyo ve ghaʼán ví, e shaà kin.»

Joon 10:41

Wíri wáa wìy anín, a yen wun fo. Á lo, á wàa suúy jii, «Joon‑eè dzə̀ kfə́, a bó wù yòʼ‑oò ló a yiì a kiŋgaʼnìn ke kinyò kímóʼ kí ke kí wáa dìn vitaáví vé Nyùy. Yii bèy, a vinyo ve wù‑uù suuy kùm wír və̀n vidzə̀m vi‑iì ló a dzə rú.»

Joon 11:15

a kí bòŋ mo bó m yòʼ kì dzəə̀n fó, é vèn fiʼ wìy wày shilív e mǒ wùn. Vèsən du ri fo.»

Joon 11:47

Vitú ve atàá cù wùn à wír vee Farasi vee shooyi nèn kùm vé wòŋe adzə̀m. Á dzə̀ʼə̀m, a ghay jii, «A dzə̀ vèsən yèe, e bóo sə̀r wír və̀n. Wù ghán, shóʼ virom ve vinyò vinín,

Joon 12:37

Wíri siíy, e làa yòʼ fə̀m biimé kinyo kfə́, a wù‑uù sí ghán aáwuné mvəm, yii vinyo vinín ve ví din vitaáví vé Nyùy.

Joon 12:41

Aysaya wáa yòŋ kinyo kìn a dzə̀ kùm Jesus, bìʼ fo wù‑uù lo yèn Jesus e mvə̀m vikùʼùy ve dzəə̀n vé Nyùy.

Joon 14:13

Kí nén a dzə jii, a vèn lón ka fo Nyùy, lón a dzə̀ e mǒ yir, m kù nèn yiì kíwun, é wíri fíʼ a yen kinyo ke mo woo Wan Nyùy yii, a burí a dzə̀ Tàr wor.

Joon 16:27

Tàr wor sí koŋ ven, bìʼ fo vèn‑eè sí koŋ mo, biíme ji m lò rú a dzə̀ fo wun woo Tàr wor.

Joon 16:30

Vèr kìíy ne lèn ji à kì vinyo vidzə̀m, a bó shií yòʼ dzə̀ə́ wo wìr rə́sí, a sòv wò sóvin, a vèr biìmé ne lèn ji wò‑oò lò rú fo Nyùy.»

Joon 2:1

Kishiíy kí shaà, ndzə bvəə́shí, e ràn, á wáa ker vijín é ntèʼ yee Kaana e Galeli foo fèy, yìy à Jesus dù fo,

Joon 2:23

Jesus ku nèn a dzə e Jerusalem e ghan sé Ŋkǎʼ Yáʼayshaà sìn, a yiì viŋgaʼnìn ve vinyò, ví wáa dìn vitaáví vé Nyùy. Wír aníne wáa yen, a way shilív é wùn wó.

Joon 3:2

Wù nèn wìy lò vitsə́ʼ vímóʼ ví, e dù, e yèn Jesus, e yòŋ jii, «Ŋgaà Yèʼey, vèr kì ji tùm Nyùy wò ji à wiy, a yeʼéy ver. Bó yòʼ dzə̀ wìr wàa yiì viŋgaʼnìn ve vinyò ve à yii vìn, a bó túm Nyùy ŋgaàŋ.»

Joon 4:3

Jesus yú ji leŋ woo shooyi dù ne, e mèé a fo wír vìyi, wù nèn lò fo wír veé Judàá mbìv wòŋ foo fèy, a kfən e mbìv Galeli.

Joon 4:46

Wù kfən ghàn, e dù, e mèé e ntèʼ yee Kaana fo wù‑uù bìnèrìn mendzə́v é melùʼ e Galeli foo fèy. Wáa dzə e ghan see shooy, a wìr wo kuʼùn wùmòʼ dzə̀ é ntèʼ yee Kapeenahum, a wan və woo lumèn joy e ŋàŋ.

Joon 4:54

Mo Jesus yiìn kin kee kinyo, ke kí wáa dìn vitaáví vé Nyùy, wáa dzə ve ví meen vibaà ve wù ku lò fo wír veé Judàá mbìv wòŋ, e wìy, e yiì e Galeli.

Joon 5:23

é wìr dzə̀m fíʼ a ghvəm Wán və réŋréŋ mo á ghvə́m wun woo Tàr. A wìr dzə̀ là fó a ghvəm Wan Nyùy, bo bó ŋgaàŋ yòʼ ghvə́m sa Tàr wov wo wù tumen wun.

Joon 6:14

Wíri yén kinyo ke Jesus yiìn, a kí din vitaáví vé Nyùy, á nèn a suúy jii, «Wìr və̀n dzə̀ rú *Ŋgaà Ntum Nyùy wo vé‑eè shiy ji wù wiy é nsay fèn.»

Joon 6:2

Màŋgòŋ báʼtí fó e gháʼán, a ghan e wùn bàm, bìʼ fo vé‑eè yén viŋgaʼnìn ve vinyò ve wù‑uù yii e vé yàsií wùn.

Joon 6:26

Jesus kòr a dzə̀ lám aáwune jii, «M suuy ven kinyo ke ru kí ji bó vèn yòʼ ghán, taʼ mo ben ji bìʼ fo vèn‑ee yenen ji vinyo ve m yii vi din vitaáví vé Nyùy. Vèn wiy a dzə̀ bìʼ fo vèn‑ee yiin kibán, kí‑ii gháʼ ghaʼán.

Joon 6:30

Á nèn a dzər jii, «Kinyo ke à yii, ke kí din vitaáví vé Nyùy, é bo vèr yén, e wày shilív e wò wùn kí dzə̀ ka?

Joon 7:31

Yii bèy, a wír ámóʼó kù yòʼ wáy shilív e Jesus wùn anín, suuy ji Mfə̀ə́r sà wíy wìy, é wù yii vinyo ve ví din vitaáví vé Nyùy, e shaà ve wìr və̀n yii a.

Joon 9:16

Wír Farasi vìy ámóʼó nèn sàyín jii, «Bó Jesus və̀n yòʼ dzə̀ wír wo wù lo ntum Nyùy gheéy, wù shóʼor nsər kishìíy ké bam.» Aámóʼó dzə́r kév jii, «A dzə̀ wír, a bó Nyùy yòʼ kì wun, wù wàa yiì viŋgaʼnìn ve vinyò vee ben à?» Á bìʼ bèy, e bvəə̀rí.

2 Korin 3:18

Vèsən adzə̀m nén a dzə lèn, a bó Kiyoy kee shooy ki yòʼ dzəə́ laynìn fo vèsə́n si, vitaáví vé Nyùy vi wáa yensín e vèsə́n wùn ghán sidzə̀m. Kiyoy ke Tàr wòsən kin ki kfə́n a lìm e vèsə́n wùn, a yiì, vèsən wáa kuvsín, a dzə moo wun woo Kristu, a dù duùn fó mbìy, a ker vitaáví ve dzəə̀n vé Nyùy.

2 Korin 4:17

A ŋgeʼ se vèr yén fo shintàm fèn sìn si náŋsin ver náŋsín, é vèr wìy nə̀ə́ e Nyùy mvə̀m vijùŋ ve ghaʼán ví, ve bó yòʼ dzə̀ ví mày, a bó yòʼ dzə̀ wìr kìíy móo fìʼ.

2 Korin 4:6

Yì‑iì mvə̀ʼ Nyùy vifií vér, é bo vèr yén rán, a kiíy Jesus. A kù dzə̀ wun woo Nyùy wo wù‑uù suuyin fó shuù ji ndzə rán, yì nèn ràn. Vèr nén a yen mo vitaáví vé Nyùy vi lim e Kristu wùn, a kiíy mo wun woo Nyùy ghaʼan.

Remrí 5:24

Á kóʼtí bey, a suúy jii, ‹Nyùy Tàr wo dzəə̀n Nyùy wor dìn ne vikuʼùy və́ wùn à vitaáví və́ ví e vèr. Vèr yù ne kisúŋnìn kfə́ fó mvə̀m və̀y. Vèr yèn ne e kishiíy ké lán ki mo Nyùy Tàr suŋnin e wìr msòŋ, fə̀m mo wù suŋnin bey, ŋgaàŋ góʼ e tin.

1 Joon 5:13

Mo m sáŋ vinyo vìn vidzə̀m bèn, m sáŋ a dzə̀ fo vèn ve á wayin ne shilív e Wàn Nyùy wùn, é vèn fíʼ kiíy ji vèn sí kér dzəʼə̀m yee là may.