Joon 17:3 - ŊWÀʼ NYÙY

³ A dzəʼə̀m yee là may rə̀ne dzə̀ jii, wìr kiíy wò, wo kù jòʼsìn wò Nyùy wo rù, e kfə̀n kìíy sa mo woo Jesus Kristu wo wò‑oò tumen é ndzə fèn.

Joon 17:3 Iomraidhean Croise

1 Wòŋ 28:9

«Wówò Solomon woo wán wom, kiíy Nyùy wo tàr won ghvə́mé. Á ghvəm vèn à shilív shé shi shidzə̀m, à kwaʼtì yée e dzə̀m, bìʼ fo Nyùy Tàr yii tar melív medzə̀m, a wù kfə̀n yii kiiy kwaʼtì e dzə̀m ye yí dzəə̀n e wìr vifii. Aà yiì a tàʼ wun, áà wáa yen. Yii bèy, à maʼay wun, bo wù yíi bìn ndzə̀m e wò, e màʼày wò ŋkuuŋkùŋ.

2 Wòŋ 15:3

Ghán símóʼ sí‑iì dàrnìn se Isray yòʼ‑oò ló a cù Nyùy wo ru. Taà cù woo ji wun yéʼéy áwune yòʼ‑oò dzə̀. Bìʼ bey, la áwune yòʼ dzə́ə a jùmrì nsər Nyùy.

Nsùyrì Nyùy 9:10

Éè Nyùy Tàr, wír ve kiìn wòo tiir vifií a dzə̀ e wò wùn, bìʼ fo à yoʼ bìn ndzə̀m e wír ve á taʼ wòo.

Ŋgàn 8:35

Wìr wo wù taʼ mo, yéné, ŋgaàŋ yíi a ker dzəʼə̀m ye dáa, é Nyùy Tàr wáa leéy wun, a kòŋ.

Aysaya 48:16

Vèn kóʼtí e mǒ mentsə̀m, e yuùrí kinyo ke m suuy ki. Kèʼ fo kèʼ, bó m yòʼ‑oò lò a suúy kinyo e kilìr. Vinyo ve mò‑oò yòŋèn ví‑iì lo, ví wàa koóy, a m kù dzə̀ fó si.» Á mo Nyùy Tàr suuyin. Ké lèn ki, Nyùy Tàr woo Taà Ndzə tsə̀nsí ne mo ji m yii lim rə́, e fò mo Kiyoy kfə́.

Aysaya 53:11

Wù wíy yen ŋgeʼ, yì mayì, lóo yen vijuŋ ve yì wìyìn shó, kiiy nsàv, é shilív sə́ shí neem é nsay. Nyùy Tàr suuy jii, «Rúrú, ŋgaà wom lìm wíy yiì, aá mayir ajay wìr anín, bìʼ fo wun wo wù yòʼ kér jay wíy bèʼèy ajay wìr anín.

Aysaya 61:1

Kiyoy ke Nyùy Tàr woo Taà Ndzə ki shiy mo, bìʼ fo Nyùy Tàr yoʼon ne mo, e tùm ji m wáa fiʼtì sáʼka wo juŋ e vé ŋgeʼe. Wù‑uù tùm mo ji m rəər wír ve melív mev mè seèmèn ne, a tiisí e wír ve á koon é shùu rərí ji á yíi bòyìr áwune fó vikwàn, a tiisí e vé sháŋé ji á sí lo, e fəə́r áwune fó lav sháŋ.

Jeremia 10:10

Yii bèy, dzə̀ wò Nyùy Tàr, Nyùy wo ru. Dzə̀ wò Nyùy wo tin, a vifon vé ví wíy shaàrì. Aà shwìíy kilòŋ, kitú ke nsay ki sə̀ʼsì, dòʼshwíiy wò kóʼ, la vitúm vi yòʼ tìím.

Hosea 6:3

Vèsən ku wày vifií a dzə̀ e Nyùy Tǎr wùn, e mùm kitávín ji vèsən kiíy wun kijuujùŋ. Rúrú, wù kù yíi wìy fo vèsən moo shúy ye yì tó kijàvndzə, a wù yòʼ‑óò ndzəy. Wù yíi rəə̀r vèsən moo wuú ye yí loon, nsay rə́, e kù rəə̀r moo wuú mbìyi yeé kimgbù ke wuu.»

Maak 9:37

«A wìr yén wán woo moo və̀n bèn ji wír bìʼ mo, bo ŋgaàŋ yén a dzə̀ mo. Wìr wáa yen mo, bo wù yén a dzə̀ ŋgaà wo wù‑uù tumen mo.»

Ŋwàʼ Luk 9:48

e sùúy aáwune jii, «A wìr yén wán və̀n ji wír bìʼ mo, bo ŋgaàŋ yén a dzə̀ mo. Wù wáa yen mo, bo wù yén a dzə̀ ŋgaà wo wù tumen mo. Vèn wáa kiíy jii, wìr wo wù li kitú kfə́ fó tèr e věn mvəm, dzə̀ wo dzəə̀n wír wo kuʼùn.»

Joon 10:36

m wáa dzə kém wír wo Tàr wor Nyùy‑iì shoʼon, e tùm é ndzə fèn, vèn kfə́n a suúy ji m táŋ kilíŋ ke Nyùy, bìʼ fo m suuy ji m dzə̀ Wan Nyùy moó le?

Joon 11:42

A m kì jii, à kù yii yuúri kinyo kém ghán sidzə̀m. M nén a suúy kin a dzə̀ bìʼ wír ve á tíy fo ghaŋ vìn, aá fíʼ yìi biimé ji tùm rú wò woo Nyùy mo.»

Joon 14:26

Yii bèy, Tàr wor wíy tum Ŋgaà Sə wo dzəə̀n Kiyoy kfə́ fo vèn e mǒ yir, é wù wáa naàrì ven vinyo vidzə̀m, a yiì, é vèn wáa kuumé vinyo ve mò‑oò suuy e vèn vidzə̀m.

Joon 17:18

Mo wò‑oò tumen mo é ndzə fèn, m tùm ne sa áwune fo wír veé ndzəə.

Joon 17:21

A m lón jii, à ku yiì, aáwune tátí adzə̀m, a dzə ji kitú kimòʼón réŋréŋ mo wò woo Tàr dzəə̀n wòsò, a wòsò dzə̀ ji kitú kimòʼón. Ku yiì, aáwune wáa dzə sa e wòsò mvəm, é wír veé ndzə fène fíʼ biimé ji ntum ye mò‑oò loòn dzə̀ rú á ye.

Joon 17:23

Mo wòsò dzəə̀n kintatì, vèr áwune lóo dzə sa kintatì, aáwune nèn màysì, e tàtí ŋkuuŋkùŋ, a dzə ji kitú kimòʼón, é wír veé ndzə fène yén ji ntum ye mò‑oò loòn dzə̀ rú ye, e kfə̀n yèn sá ji à koŋ wír vìn réŋréŋ mo à koŋ mo.

Joon 17:25

Éè Tàr, kù yii yii wò kinyo kee réŋ, a bó wír veé ndzə fène yòʼ kì wò. Yii bèy, a mò‑oò kìíy ne wò, a wír vém víne kìíy ne rú ji mò‑oò lò ntum a dzə̀ ye.

Joon 17:8

Mò‑oò lo tiìsí vinyo ve wò‑oò tumen mo shó aáwune vidzə̀m, áwune biímé, e nèn kìíy rú ji m lò a dzə̀ fo wò, a yiì tùm wò mo.

Joon 3:17

A bó Nyùy yòʼ tùm Wán və é ndzə fèn ji wù wáy wíri a dzə̀ é lòn. Wù tùm ji wù yii, é wíri luŋ.

Joon 3:34

bìʼ fo wìr wo Nyùy tumen və̀n súŋnin a dzə̀ jí se dzəə̀n sé Nyùy, mo wù‑uù foon Kiyoy kfə́ shó là mfìʼ.

Joon 5:44

A bó yòʼ dzə̀ vèn wày shilív e mǒ wùn, bìʼ fo vèn koŋ fó a yiì vinyo a dzə̀ ve wáa binsí wíri, e làa yòʼ a leéy ji wáa binsí Nyùy wo kù jòʼsìn wun ji Nyùy.

Joon 6:57

M dzə́, a kù yii vitaáví vé Tàr wor wo wù tumen mo, bo m wáa dzə, wun woo Tàr wor wo wù kù dzə́ a dzə̀ fo wùn vitaaví. Dzə̀ réŋréŋ sá mo vém vee vitaáví ví yii, bo wìr wo wù yí wún wóm wáa dzə.

Joon 7:29

Kù kì mo ŋgaàŋ, bìʼ fo m loòn fo ŋgaàŋ wùn, a tùm ŋgaàŋ mo.»

Joon 8:19

Á ku nèn sàyín jii, «Tàr won wo à yoŋ və̀n dzə̀ feé?» Jesus bìnèr jii, «Vèn yòʼ kì mo m dzəə̀n, a bó vèn yòʼ kì sá Tàr wor. A vèn kì kì mo m dzəə̀n, vèn nèn kìíy sa Tàr wor.»

1 Korin 15:34

Vèn maʼti kiyúŋsì ki, e lèʼ fó bǎm vinyò ve bi ví. M yén ji wír vén ámóʼó yòʼ kì á Nyùy gheéy. A m suuy bèn, é vèn fíʼ a woomé.

1 Korin 8:4

Kee kùm yí ye wìr wáa yi nyám ye á cuùn anyùy sho ki dzə̀, a vèsən kì kijuŋ ji kifá ke á cu kìn ki yòʼ dzə̀ nyùy wùmòʼ gheéy. Nyùy kù mày e mòʼón, a bó wùmòʼ yòʼ dzə̀ shó.

2 Korin 4:6

Yì‑iì mvə̀ʼ Nyùy vifií vér, é bo vèr yén rán, a kiíy Jesus. A kù dzə̀ wun woo Nyùy wo wù‑uù suuyin fó shuù ji ndzə rán, yì nèn ràn. Vèr nén a yen mo vitaáví vé Nyùy vi lim e Kristu wùn, a kiíy mo wun woo Nyùy ghaʼan.

Filipi 3:10

M nén a tàʼ cáʼ jii, m maysi, e suùsín vèr Kristu, e kìíy wun kijuŋ, a yu mo vitaáví və́ ví lim e mǒ wùn, wun wo wù‑uù fəən fó kpu. A m kfə̀n taʼ ji m biímé sá ŋgeʼ se wù‑uù biimen, a yu a dzə̀ fo Nyùy, e fò kitú kém, e kpù mo wù‑uù foon kfə́,

Filipi 3:8

A bó yòʼ jòʼsì kee shooy cáʼcáʼ. M sí yén vifá vidzə̀m ji kilày ji m fíʼ a ker ke kuʼùn kí, a dzə̀ á ji m maysi, e nəə̀nín vèr Tàr wòsən Jesus Kristu, e kìíy wun kijuŋ. M nen màʼày vinyo vìn vidzə̀m a dzə̀ bìʼ wun woo Kristu, a yen lèn, ví wáa koʼóy koʼoyín ji m fíʼ a tiy a dzə̀ á vèr wun,

1 Tesalonika 1:9

Wìr dzə̀m kù‑uù sí fer mo vèn‑eè keerin ver é ghan se vèr‑iì wìyìn, e ghàn ven, kfə̀n fer mo vèn‑eè màʼtìn anyùy kisaŋe, e bìnkìr, e kfə̀n fo Nyùy wo wù dzəə̀n rú e tin, a yu a dzə̀ fo wun.

2 Tesalonika 1:8

A Jesus wíy wìy a dzə̀ é mvə̀m kiliìmé ke və̀y, e nèn màʼ ŋgeʼ e wír ve á méŋ Nyùyi, e kfə̀n màʼ e wír ve á tenen sáʼka Nyùy wo juŋ woo kùm wun woo Taàtá wòsən Jesuse.

Hibru 3:1

Afə̀r vem, mo vèn siìn wír Nyùy, a lì wun ven ji və́ vee wír, vèn kú a kuumé wír wo dzəə̀n Jesus. Dzə̀ wun wo Nyùy‑iì tumen, wù wáa dzə taà cù wòsən wo kuʼùn fó kinyò ke Nyùy ke vèsən tíy sho.

2 Pita 1:2

M nén a lon jii, vèn kú a kiíy a Nyùy wùn Tàr wòsən Jesus Kristu, a dù duùn fó mbìy, aá maysi, a leéy fo vèn, a yiì, é melív men mè wáa dzə nyaáŋ.

2 Pita 1:3

Dzə̀ Taàtá wòsən və̀n wo wù‑uù yiìn, é bo vèsən kiíy Nyùy wo wù‑uù liìn vèsən ji wír və́, aá fiʼ nə̀ə́ e wùn mvə̀m vijùŋ, a ker liì a dzə̀ və́ə. Mo vèsən kiiyin ne wun, wù nen fò vitaáví və́ ve ghaʼán ví e vèsən, á kiíy mo dzə̀ á wàa tiír kiwuú dzə́ə sidzə̀m, a ghan moo wír və́.

2 Pita 1:8

A vèn lò, a yiì vinyo vìn vidzə̀m, a dù duùn fó mbìy, é vèn nèn màysì, e kìíy dzəʼə̀m Taàtá wòsən Jesus Kristu, a wàrkìr, a yiì vinyo a dzə̀ ve ví gheen Nyùy.

1 Joon 1:2

Á mo Nyùy‑iì yiìn, é bo wíri yén dzəʼə̀m yee là may. Mo vèr yenen wun wo wù fó dzəʼə̀m yee shoon, e nèn a fìʼtì e wíri. Ku nèn a dzə kíwun ke m fer e vèn lèn. A ŋgaà dzə̀ʼə̀m woo shooy‑iì dzə́ a dzə̀ wùn Nyùy woo Tàr wòsən. Ghán sí wìy ghèén, Nyùy dìn wun e vèr.

1 Joon 1:3

Kí nén a dzə jii, kinyo kidzə̀m ke vèr‑iì yenen, e kfə̀n yù, a dzə̀ vèr fèr sá, é vèn yú. Mo vèn yuun, é vèn nèn tàtí sa, é vèsən wáa yuurí kinyo kee shó kimòʼón. A vèr tàtí a dzə̀ vèr à Tàr wòsən Nyùy, à Wan və wo dzəə̀n Jesus Kristu.

1 Joon 2:23

A wìr káy Wan Nyùy, bo ŋgaàŋ káy sa Nyùy. Wìr wáa yu Wan Nyùy, bo wù yú sa Nyùy.

1 Joon 4:6

Mo vèsən dzəə̀n késən wón Nyùy, wìr dzə̀m wo wù kiìn Nyùy nén a yuurí sa vinyo vesən, a bó wìr wo yòʼ dzəə̀n wan Nyùy yòʼ yuúri. Á nén a kiíy wír wo wù kér Kiyoy ke Nyùy ke kí yii suuy a dzə̀ kinyo ke ru kí, e kfə̀n a kiíy wír wo wù jumrì kfə́ a dzə̀ kimboʼtì.

1 Joon 5:20

Wàn Nyùy‑iì lo wìy e nsay fèn, e mvə̀ʼ vifií vesən, vèsən wáa kiíy Nyùy woo rú, a vèsən sí dzə́ kintatì vèsən à Nyùy woo rú və̀n, bìʼ fo vèsən à Wan və Jesus Kristu suusin ne. A dzə̀ wun wo dzəə̀n Nyùy woo rú. A dzəʼə̀m yee là mayi dzə̀ a dzə̀ e wùn kiwo.