Joon 1:1 - ŊWÀʼ NYÙY

¹ Yì‑iì dzə̀, é bo ndzə wìy a kèʼ, a Jínyùy‑iì sì. Wù‑uù dzə̀ wùn Nyùy, a wù dzə̀ sá ji Nyùy.

Joon 1:1 Iomraidhean Croise

Kèʼlo 1:1

Yì‑iì dzə̀ fó mbìy, Nyùy‑iì bòm yúv wùn à nsay.

Nsùyrì Nyùy 45:6

Á dzə̀ Nyùy, a sáʼ rəə́ kù wíy a tiy a fo, e dù, e jòʼsì. Sáʼ rə́ vifòne dzə̀ á sáʼ yee là kiloʼ.

Aysaya 7:14

Mo á tenen ne fóo lon kisəəm fo Nyùy Tàr, bo wúnwun woo Nyùy Tàr lo, e dìn a kisəəm aáwune. Á yuúrí á kijuŋ, wánlè ŋgòn woo shó wíy tiím a bvəm, e dzəə́ wán lumèn, dzəə, é wù shu á yír ji Immanuel.

Aysaya 9:6

Kí dzə̀ jii, vèsən kòóy ne wán. Á fò ne vèsən wán lumèn. Wù wíy a saʼ vifon. Á wíy a yòŋ wun jii, Ŋgaà Ntir wo ghaʼán, Nyùy wo kuʼùn, Tàr wo wù gòʼòn kàŋ mòʼón, Wan Fòn woo Ŋgaà Nyaáŋ.

Matio 1:23

«Wánlè ŋgòn wùmòʼ wíy tiím bvəm, a bó wù yóʼ ne kìíy lumèn, e dzəə́ wán lumèn, aá wíy a yòŋ ji Emmanuel.» A nsàv yìr rən dzə̀ jii, «Nyùy sì vèsən áwune.»

Ŋwàʼ Luk 24:53

Á dù, a rəsí a dzə̀ é lav cù, a sùyrì Nyùy ghán sidzə̀m.

Joon 1:14

Á mo Jínyùy‑iì wìyìn, e lì mbom wìr, a dzə wùn à wíri, a kòŋ áwune féyì, a dìn rú mo Nyùy dzəə̀n, vèr wáa yen vikuʼùy və́. A kù dzə̀ vikuʼùy vé Tàr wov, bìʼ fo kù jòʼsìn wun wo dzəə̀n Wan Nyùy.

Joon 1:18

A bó wìr yòʼ‑oò yiì ne yèn sí Nyùy. Kù jòʼsì màyshó Wàn Nyùy və̀n wo wù dzə́ e Tàr wóv ghaŋ, wo wù dìnèn e wíri mo Nyùy dzəə̀n.

Joon 1:2

Wù wáa dzə wùn Nyùy, é bo ndzə wìy a kèʼ bèy,

Joon 16:28

Mo mò‑oò loòn fo Tàr wor, e bóo wìy e ndzə fèn, m kfə̀n sí lo fo ndzə fèn, e kfən fo Tàr wór wùn.»

Joon 17:5

Tàr wor, ku kfə̀n fò mo vikuʼùy vém viy lèn wo m tíy e wò si və̀n, vikuʼùy ve mò‑oò sí kér wòsò, é bo ndzə wìy a dzə.

Joon 20:28

Tomar ku nèn sùúy suuyín jii, «Dzə̀ wò Tàr wor, aà dzə̀ Nyùy wom.»

Joon 8:58

Jesus bìnèr jii, «Vèn wáa kiíy rúrú jii, bo á wáa dzəə́ Abraham, a m sì.»

Ŋwàʼ woó Rom 9:5

aá ràm a dzə̀ fo wír ve vé‑eè súŋnin wùn à Nyùyi. Jesus Kristu woo *Mfə̀ə́r wìy wìy, e lì mbom wìr, á dzəə́ wun a dzə̀ aáwuné ram, a dzə̀ wun wo Nyùy lèmèn lèn ji vitú ve saʼ. Á ku nèn a burí Nyùy ghán sidzə̀m. Amen.

Efesor 3:9

Kí kfə́n a dzə jii, m naari kinyo kìn, é wìr dzə̀m kiíy á ji Nyùy sí li wír ve bó yòʼ dzəə̀n veé Isray sa lèn ji və́ vee wír. Kù‑uù sìysì wun woo Nyùy wo wù‑uù bomen vifá vidzə̀m kinyo kìn fo ŋgùʼ, e lìtì, la wìr yòʼ kìíy, e shem lèn.

Filipi 2:6

Mo wù fə̀m‑eè dzəə̀n réŋréŋ ji Nyùy, bó wù yòʼ‑oò ló a tàŋèn ji wun kú a ker kilíŋ ke Nyùy kee shooy.

Kolosia 1:15

Kristu woo Wan Nyùy dzə̀ wúntí Nyùy wo bó wìr yòʼ yii shóv e si. Wù kfə́n a dzə ji kitú fo vifa ve vé‑eè bomen vidzə̀m.

Kolosia 1:17

Wù nèn a dzə, é bo vifá vìn vi wìy a kèʼ, a tátí wun vifá vìn vidzə̀m, a yiì, bo ví wáa lìm, a shemsín.

1 Timoti 3:16

A dzə̀ vèsən wàa binsí ji kinyo ke toʼon Nyùy, é bo vèsən kiíy mo dzə̀ á ghvə̀m wun kìn kí dzə̀ rú kinəə́nén. A kí dzə̀ jii: Kristu‑uù wìy, e lì mbom wìr, Kiyoy ke Ranén kí bínsí wun, nshèelav se Nyùy si kfən yèn wun. Á wáa fìʼtì woŋ sidzə̀m mo wù dzəə̀n, wíri wáa way shilív é wùn wó virə́ʼ vidzə̀m. Nyùy kfən lì wun, e kòʼór e wùn ghaŋ.

Titur 2:13

a shìy vijuŋ ve vèsən tiirin vifií shó, ji Jesus Kristu bvə́y, a wù sí kér vikuʼùy a dzə̀ veé yuv. Dzə̀ wun Nyùy wòsən wo ghaʼán wo wù luŋèr vèsən.

Hibru 13:8

Jesus Kristu və̀n yòʼ yii kúvsinè. Mo wù‑uu dzəə̀n é yooné, kù dzə̀ mo wù dzəə̀n lán, a kù dzə̀ mo wù wíy a dzə bèy, e dù, e mày.

Hibru 7:3

Bó wìr yòʼ kì fo Melkisedek və̀n‑eè loòn, a bó á yòʼ kì tàr wov wùn yè wov, a bó á yòʼ kì rám yév. Bó á yòʼ kì sá ghán se vé‑eè dzəən wun, a bó á yò kì se wù‑uù kpuun. Wù nén a dzə moo Wan Nyùy, a dzə̀ taà cù wo wù gòʼòn kàŋ mòʼón, e dù, e mày.

2 Pita 1:1

Ŋwàʼ və̀ne sàŋ mo woo Simon Pita. M dzə̀ ŋgaà lìm Jesus Kristu, e kfə̀n a dzə ŋgaà ntum və. A m sàŋ a dzə̀ fo vèn adzə̀m ve á tíy e kinyò kee shó ke ver vee aŋgàa ntume tíy sho. Dzə̀ kinyo feyì feyì, a wày sá Jesus Kristu e věn kiwo, bìʼ fo wù kù yii yii kinyo kfə́ réŋ. Dzə̀ wun Nyùy wòsən, kfə́n a dzə Ŋgaà Lùŋèr wòsən.

1 Joon 5:20

Wàn Nyùy‑iì lo wìy e nsay fèn, e mvə̀ʼ vifií vesən, vèsən wáa kiíy Nyùy woo rú, a vèsən sí dzə́ kintatì vèsən à Nyùy woo rú və̀n, bìʼ fo vèsən à Wan və Jesus Kristu suusin ne. A dzə̀ wun wo dzəə̀n Nyùy woo rú. A dzəʼə̀m yee là mayi dzə̀ a dzə̀ e wùn kiwo.

1 Joon 5:7

Vifá vi nén a dzə vitaár ve ví din ji Jesus‑eè ló a dzə e nsay fèn,

Ŋgaà Yen 1:11

suuy jii, «Sáŋ vinyo ve à yén e wò si vìn vi é ŋwàʼ, e tsə̀nsí e vintatì vee saàmbà ve ví dzəə̀n é ntèʼ see, Efesor, Simeena, Pegamum, Tiyatira, Sardis, Filadeefia, wùn à Ladisia.»

Ŋgaà Yen 1:17

Mo m yenen wír və̀y, e nèn gbù e si wo, a m sì moo kimkpú ke kifa. Wù màʼ kiwó kfə́ ké yìy kí e mǒ wùn, e sùúy jii, «Lá à yòʼ a fàn. Dzə̀ mo wo dzəə̀n Keʼ, e kfə̀n a dzə Kinjòʼsì,

Ŋgaà Yen 1:2

Wù sáŋ vinyo ve wù yenen vidzə̀m e ŋwàʼ fèn, a suúy feyì ji dzə̀ á kinyo ke kí‑iì loòn a dzə̀ fo Nyùy, a tòʼtí a Jesus Kristu e wun.

Ŋgaà Yen 1:8

Nyùy Tàr, wun woo Nyùy suuy jii, «M dzə̀ *Alfa, e kfə̀n a dzə *Omega, a dzə̀ ji Keʼ wùn à Kinjòʼsì kí.» Suuy wun woo Nyùy woo Ŋgaà Vitaàví Vidzə̀m, wo wù‑uù siìn, a wù dzə̀ lèn, a wù kù wíy a dzə.

Ŋgaà Yen 19:13

Wù‑uù màʼ kikúm, a kí kiʼ mensə́ mensə́, aá kfə̀n yoŋ yír rə́ yímóʼó ji Jínyùy.

Ŋgaà Yen 2:8

Wù nèn kfə̀n sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Simeena. A wú dzə̀ jii: «Kinyo kìn ki suuy mo wo m dzəə̀n Keʼ, e kfə̀n a dzə Kinjòʼsì. A dzə̀ mo wo mò‑oò kpuun, e kfə̀n fəə̀, a dzə e tin.

Ŋgaà Yen 21:6

Wù kfən sùúy e mò jii, «Nsìysì wom ghèén ne lán e dzə̀m. Dzə̀ mo *Alfa wùn *Omega, a dzə̀ jii, Keʼ wùn à Kinjòʼsì kí. M wíy a fo mendzə́v me dzəə̀n dzəʼə̀m yee là may e wìr wo kilòŋ kí yúm e dzə̀m, a mè fəə́ fo mǒ dàn ghán sidzə̀m, aá nó kisáŋ,

Ŋgaà Yen 22:13

Dzə̀ mo *Alfa wùn *Omega, a dzə̀ ji Mbìy wùn à Bámé, kfə́n a dzə ji Keʼ wùn à Kinjòʼsì kí.

Ŋgaà Yen 3:14

Wìr və̀y kfən sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Ladisia. A wú dzə̀ jii: «Kinyo kìn ki sùúy mo wo á yoŋ ji Amen. Kù yii din mo kinyo ke dzəə̀n ke ru kí, là kiloʼ. Nyùy‑iì mbaà a dzə̀ mo, e bóo bom vifá ve wù‑uù bomen vidzə̀m.