Aba Filipi 4:8 - Ulufingo Ulupya

⁸ Mwee bakamu bane, pabumalilo inkubabuzya ukuti mubikayepo umoyo pavintu vyosi vivyo vyiza nkani, sona ni vichindamu ivi: Ivyanaloli, ni vichindamu, ni vigholosu, ni vizelu, ni vighaniwa, sona ni vyamuchizi.

IBAYIBOLO 2024

⁸ Mwee bakamu bane, pabumalilo nkubabuzya ukuti mubikayepo umoyo pavintu vyosi vivyo vyiza nkani, sona ni vichindamu ivi: Ivyanaloli, ni vichindamu, ni vigholosu, ni vizelu, ni vighaniwa, sona ni vyamuchizi.

Aba Filipi 4:8 Iomraidhean Croise

Matayi 22:16

Po bakatuma kwa Yesu abamanyili babo bamo poka na bantu bamo aba mukabukatila aka Helodi. Bakati, “Wee Mumanyisi, tuzimenye ukuti ukunena ubwanaloli. Ukumanyizya izila iya Chala pakasi pa bantu ukuyana nu bwanaloli, ukusita ukunyila inyinong'ono izya bantu pakuti utakwennya icheni icha muntu.

Maliko 6:20

U Helodi akamunyilagha u Yohani pakuti akazimanya ukuti u Yohani akaba muntu umwiza nu muzelu, po akamusunga akiza. Po nanti u Helodi ivwa amazyu agha Yohani atakabanga nu mutende mumoyo wache; loli pope bulo akighana pakumuteghelezya.

Luka 16:15

U Yesu akanena nabo akati, “Mwighanite pakwinena mwebene ukuti mwe bagholosu pamaso pa bantu, loli u Chala aghamenye amoyo ghinyu. Pakuti chicho abantu bakuti chapamwanya nkani, pamaso pa Chala chite ni mbombo nayimoyimo.

Luka 2:25

Pakabalilo kalakala kukabako umuntu yumo yuyo akaba we Simiyoni, yuyo akikalagha mu Yelusalemu. Akaba mugholosu, sona umuntu uwakumunyila u Chala. Akalindililagha akabalilo kako u Chala akwiza pakubapoka aba Izilayeli, sona u Muzimu Umuzelu akaba nawe.

Luka 23:50

Kukabako umuntu yumo yuyo akaba we Yosefu, weka uwakabukatila aka balongozi. Akaba muntu mwiza sona mugholosu.

Yohani 7:18

Umuntu yuyo akunena nu bulaghili ubwache nu bwache, akwilondela mwene ubuchindamu bwache. Loli umuntu yuyo akumulondela ubuchindamu yuyo akantuma, wanaloli, po ubuzimbuli butalimo mumwache.

Imbombo 10:22

Bakamula bakati, “Usongo u Kolineliya atutuma. Umwene muntu mugholosu, yuyo akumwiputa u Chala, sona achindikiwe nkani naba Yuda bosi. Uwantumi uwa kumwanya uwa Chala akamubuzya ukuti akwitizye awe ukuti ubuke kunyumba yache, ukuti ivwe zizyo ukulonda pakunena.”

Imbombo 22:12

“Mukaya akakulu nkani mula mukabamo umuntu yumo yuyo akaba we Ananiya, umuntu uwakumwiputa u Chala, yuyo akakonka Indaghilo zyitu, sona akachindikiwa nkani naba Yuda bosi babo bakikalagha mulamula.

Imbombo 6:3

Polelo bakamu bitu, musale abantu seveni mumwinyu, babo bizuye nu Muzimu Umuzelu na mahala, sona aswe tukwiza pakubapa imbombo yiniyi.

Aba Loma 13:13

Zagha tulanjizye inkalo inyiza ukuyana na bantu babo bakwenda mu lukozyo ulwa musanya. Tutakabe bantu bapafu pamo baching'wela, tutakabe bamalaya pamo bapopo, tutakabe balombwa pamo bakabini.

Aba Loma 13:3

Abalaghili batakuboghofya abantu babo bakubomba inyiza, loli abantu babo bakubomba ububibi. Nkimba ukulonda pakuba muntu yuyo atakubanyila abalaghili? Bomba chicho chiza, po bakwiza pakukupala,

Aba Loma 14:18

Sona nanti umuntu akumubombela u Kilisitu bunubu, akumuhobosya u Chala, sona nukupaliwa na bantu.

Aba Loma 2:29

Loli umu Yuda uwanaloli we yula yuyo mu Yuda mumoyo wache. Ukusilimula ukwanaloli, ko kusilimuliwa kwa moyo, kuko kukubombiwa nu Muzimu Umuzelu, ni Ndaghilo awe zizyo zisimbiwe. Umuntu yunuyu atakupaliwa na bantu, loli nu Chala.

1 Aba Kolinti 4:5

Polelo mutakamulongaye nayumo umuntu, bo na kabalilo akiza katafikite. Mulindililaye mupaka u Mwene ize. Umwene akwiza pakuvumbula pabuzelu ivintu vivyo vifisiwe muchisi. Akwiza pakuvumbula sona inyinong'ono izya bantu. Pakabalilo kalakala umuntu wesi akwiza pakupokela amapalo agha Chala.

2 Aba Kolinti 13:7

Loli tukwiputa kwa Chala ukuti mutakabombe nachimochimo ichibibi, kute kokuti tuboneke ngati po tupotizwe, loli ukuti mubombaye chicho chigholosu, napapo tungaboneka ngati po twapotwa.

2 Aba Kolinti 6:8

Twalanjizya ukwendela mu buchindamu nu musamu; ukwendela mu ntuko na mapalo, loli pope bulo tukunena ubwanaloli.

2 Aba Kolinti 8:18

Tukumutuma poka nu mukamu witu, yuyo ivipanga vyosi vikumupala pachifukwa icha mbombo yache iyakulumbilila Amazyu Amiza.

2 Aba Kolinti 8:21

Ifundo yitu yakuti tubombe chicho chigholosu, pate po pamaso pa Mwene pene, awe, loli na pamaso pa bantu bulo.

Aba Galatiya 5:22

Loli ivikomwa ivya Muzimu Umuzelu zyo izi: Ulughano nu buhobosu, nu mutende, nu bufisalyoyo, ni chisa, nu bwiza, nu busubiliwa,

Aba Efeso 4:25

Polelo muleke pakutamanta. Umuntu wesi anenaye ubwanaloli nu mupalamani wache, pakuti twebosi twe vigaba ivya mubili ghoka.

Aba Efeso 5:9

pakuti ivikomwa ivya lukozyo zyo zizyo zikwaghiwa muvintu vyosi vivyo vyiza, ni vigholosu, sona ni vyanaloli.

Aba Efeso 6:14

Po mwimaye nkani, bo mwavwala ubwanaloli bubo we lamba mumisana yinyu. Vwala ubugholosu ubwa Chala pakuba chilwilo chinyu icha chela icha pachifuba.

Aba Filipi 3:1

Pabumalilo, bakamu bane, nkunena ukuti, “Muhobokaye mwa Mwene.” Chitakunditisya napo panandi pakupyanizya sona amazyu ghagho nasimba kale, pakuti chintu chimo chicho chingabavwa ukuti mutakilamwe.

Aba Kolosi 4:5

Mubanje na mahala bo mukwangala na bantu abakuzi, nukulubombezya akiza ulusako losi lulo muli nalo.

1 Aba Tesalonika 4:12

Bunubu abantu abakuzi bakwiza pakubachindika, po sona mutakwiza pakumusubila nayumo umuntu pavintu vivyo mukusobelwa.

1 Timoti 2:2

Pakuti umu mo mumo tubaghiye tubiputilaye aba mwene, sona na balaghili bosi umwakuti twikalaye nubumi ubwakufwasa nu mutende, nukumuchindika u Chala muvintu vyosi, sona ni nkalo inyiza.

1 Timoti 3:11

Umwakuyana bulo, bope na bachi babo babanje ni nkalo inyiza, sona batakabanje ni yebo, awe. Batakakolwanje, sona babanje basubiliwa muvyosi.

1 Timoti 3:4

Amanyaghe pakulongozya akiza inyumba iyache ni yache nukwenelezya akiza ukuti abana bache bakumwivwila nu muchizi nkani.

1 Timoti 4:12

Patakabepo umuntu uwakukusula pachifukwa chakuti we mulumendo, loli ubanje we chifwanikizyo icha bitiki mukanenele, na munkalo, na mulughano, na mulwitiko, sona na mubumi ubwiza.

1 Timoti 5:10

Abanje wakuti imbombo zyache nyiza. Abanje mukolo wakuti asungitepo akiza abana bache, apokelelagha akiza abayeni, yuyo akasukuzya inyayo izya bantu abazelu aba Chala, akubavwa abantu babo bali muntamyo, sona nukwiyipa mwene pakubomba zyosi imbombo inyiza.

1 Timoti 5:2

Abakolo abasongo wikalaye nabo ngati po banyoko, sona abalindu wikalaye nabo ngati po bayemba bako nu moyo ghosi umuzelu.

Titi 1:8

Loli abanje muntu uwakupokela abayeni, nukuchighana chicho chiza. Abanje wakwilema, nu mugholosu, nu muzelu, sona nu wankalo inyiza.

Titi 2:14

Akiyipa mwene pachifukwa icha sweswe ukuti atusatule ku bubibi bwitu bosi nukuti tubanje bantu bache abazelu, babo balweke pakubomba imbombo inyiza.

Titi 2:2

Ubamanyizye abanavuli abachasongo ukuti batakakolwanje, babanje bantu abamahala na bakwilema; babanje bantu abamaka mulwitiko, na balughano, sona na bololo.

Titi 2:7

Muvintu vyosi, awe ubanje we chifwanikizyo icha nkalo inyiza. Bo ukumanyizya, umanyizyanje nu moyo uwanaloli, sona nu muchizi.

Titi 3:14

Abantu bitu bamanyilaye ukwiyula pakubomba imbombo inyiza, umwakuti bangabavwa babo bakusobelwa, sona nukuti batakabanje nubumi ubusita ivikomwa.

Aba Hebeli 11:2

U Chala akahoboka nkani na banyenya bitu pachifukwa icha lwitiko lwabo.

Aba Hebeli 13:18

Mutwiputilaye pakuti tuli nu bwanaloli ubwakuti umabyebye witu mwiza, pachifukwa chakuti tukulonda pakubomba chicho chigholosu akabalilo kosi.

Yakobo 1:27

Ichiputo ichanaloli, chicho chite ni chilema pamaso pa Chala u Tata cho ichi: Ukubasungilila abana abalanda na bakolo abafwilwe muntamyo zyabo, sona nukwisungilila wemwene ukuti utakinyazyanje ni vintu ivya muchisu ichapasi.

Yakobo 3:17

Loli amahala agha kumwanya, ichakwanda mazelu, na ghamutende, na mololo, sona na ghabumanyani. Ghizuye nu lupazikizyo, sona imbombo zyache nyiza, ghatakwennya icheni, sona ghate mazimbuli, awe.

1 Pitala 1:22

Pakuti ilelo mwiswefya mwebene pakwivwila ubwanaloli, umwakuti mukubaghana abitiki abamwinyu. Po mughananaye mwebene nu moyo winyu ghosi.

1 Pitala 2:12

Inkalo yinyu pakasi pa bantu abakuzi yibanje nyiza nkani, umwakuti bo bakubatamantila ukuti mwe bantu ababibi, bazyaghannye imbombo zyinyu inyiza. Po bakwiza pakumuchindika u Chala pisiku ilya kwiza kwache.

1 Pitala 4:8

Pamwanya pa vyosi mughananaye mwebene nu lughano ulwakufikapo, pakuti ulughano lukuzikupikila imbibi inyinji nkani.

2 Pitala 3:1

Mwe bamanyani bane abaghaniwa, inkubasimbila ukalata uwabubili uyu. Mubakalata bane babili aba nalondagha pakubakumbusya ukuti mubanje ni nyinong'ono izyanaloli.

1 Yohani 3:18

Mwee bana bane, ulughano lwitu lutakabanje ulwa pa mulomo pene, awe. Loli lubanje lwanaloli, lulo lukwilanjizya lwene mumbombo.

1 Yohani 3:3

Umuntu wesi yuyo ali nu lusubilo ulu, akwiswefya mwene bulo, ukuyana na mumo u Kilisitu umwenecho musita chilema nachimochimo.

1 Yohani 4:1

Mwee bamanyani bane abaghaniwa, mutakabasubilaye abantu bosi babo bakuti bali nu Muzimu Umuzelu, loli mubayezyanje ukuti mumanye nanti naloli umuzimu ghugho bali nagho uwa kwa Chala. Pakuti abalaghuzi abamyasi binji nkani muchisu chosi ichapasi.