Zekaliya 11:6 - IBAYIBOLO 2024

⁶ Pakuti ntakwiza pakuba ni chisa na bantu aba muchisu chilachila. Nkwiza pakumubika umuntu wesi munyobe izya mupalamani wache nu mwene wache. Bakwiza pakuchiyivya ichisu, sona ntakwiza pakubapoka munyobe zyabo.” U Mwene anena.

Zekaliya 11:6 Iomraidhean Croise

Masalimo 50:22

“Amwe mwe mumuluvyizye u Chala, muzyinong'onaye izi, lumo ningabazepulannya, po atalipo nayumoyumo umuntu uwakubapoka.

Yesaya 27:11

Nanti isamba zyache zyumila zikupyoka, sona abakolo bakuzitenya nukuzipela pakuba nkwi. Pakuti banaba bo bantu babo batakwivwa, po Umupeli wabo ate ni chililizi nabo, Umupeli wabo atakubapelela ichisa.

Yesaya 3:5

Abantu bakwiza pakukanyililana benebene, umuntu wesi nu muntu uyunji, umupalamani nu mupalamani uwamwabo. Abanandi bakwiza pakubasambukila abasongo, abantu abamwalwemwalwe na bachindamu.

Yelemiya 13:14

Nkwiza pakubakomezya imitu abawise nabana. Ntakwiza pakubapelela ichisa napo panandi sona ntakwiza pakubahobokela mupaka imbanangannye.’ ”

Nkuto 2:21

“Abanandi na baghosi bulo bali lambalala palufumbi mumisebo, abalumendo poka na balindu baghoghiwa nupanga. Ukabaghogha pisiku lilyo ukakalala, sona utakabapelela ichisa pakubaghogha.

Nkuto 5:8

Abazya bakutulaghila, sona atalipo nayumoyumo uwakutupoka munyobe zyabo.

Ezekiyeli 8:18

Polelo, ntakwiza pakubaleka bulo, ntakwiza pakubapelela ichisa pamo ukubaleka bumi. Napapo bakukolomoka mumakutu ghane, ntakwiza pakubateghelezya.”

Ezekiyeli 9:10

Po ntakwiza pakubapelela ichisa pamo pakubaleka bumi, loli nkwiza pakubatanizya pazizyo babombite.”

Hoseya 1:6

U Gomeli akamela sona ulwanda, nukupapa umwana umulindu. Po u Mwene akamubuzya u Hoseya akati, “Umwite ukuti we Lo Luhama, pakuti ntakwiza pakuba nichililizi sona naba Izilayeli ukuti imbahobokele.

Hoseya 2:10

Po nkwiza pakuyibika pabuzelu inkule yache, pamaso pa baghaniwa bache. Atalipo nayumoyumo umuntu yuyo akwiza pakumupoka munyobe zyane.

Mika 5:8

Abakusyalako aba Yakobo bakwiza pakwikala pakasi pa inko, pakasi pabantu abinji nkani, ngati nkalamu yiyo yili pakasi pa vinyanama ivya mumusitu, ngati mwana uwa nkalamu yuyo ali pakasi pa mudimo uwa ng'ozi, yuyo akuzikanyankila nukuzizepulannya mutuvigaba, sona atalipo nayumoyumo uwakuzipoka.

Mika 6:14

Ukwiza pakulya loli utakwiza pakwikuta, sona izala yikwiza pakukulema. Ukwiza pakubunganika, loli utakwiza pakusungapo nachimochimo, pachifukwa ichakuti vivyo wasunga, nkwiza pakuvinangannya pakabalilo aka bwite.

Hagayi 2:22

Nkwiza pakubawisya abamwene aba inko izinji na maka agha bumwene bwabo. Nkwiza pakuzing'anamulannya ingolo zyabo poka nabakwendezya babo, ni falasi sona naba kukwelapo babo nukughamala amaka agha inko injeni. Ifalasi zikwiza pakufwa, sona bope abakukwelapo bakwiza pakughoghana, umuntu wesi nupanga uwa mukamu wache.’

Zekaliya 11:14

Po nkapyola indisa yane iyabubili, yiyo yikwitiziwa ukuti Bupoka, pakumazya ubukamu pakasi pa Yuda nu Izilayeli.

Zekaliya 11:5

Abantu abakughula bakuzibola, loli bate ninongwa nayimo. Abantu babo bakuzighulizya bakuti, ‘U Mwene apaliwanje, ilelo naba ne mukabi!’ Abadimi babo bate ni chisa ni ng'ozi zyabo.

Zekaliya 11:9

Po nkati, “Ntakwiza pakuba sona ne mudimi winyu. Zileke zizyo zikufwa zifwanje, zizyo zikuzimila zizimilaye sona zizyo zikulyana zilyanaye.”

Zekaliya 14:13

Pisiku lilalila u Mwene akwiza pakubavulungannya abantu nubogha, umuntu wesi akwiza pakuyilema inyobe iya muntu uyunji nukwanda pakulwa.

Zekaliya 8:10

Bo akabalilo kalakala katakwanite, patakabapo nayumoyumo umuntu uwakukabapo umuvwalo pa mbombo pamo pachitekwa chimo. Patakabapo umuntu nayumo yuyo akaghula nukughulizya mumutende, pachifukwa icha balwani bache, pakuti nkamupela umuntu wesi pakuba mulwani uwa muntu uyunji.

Malaki 4:6

Akwiza pakubasayannya abawise na bana babo, lumo ningiza nukuchighuna ichisu.

Matayi 10:21

“Abantu bakwiza pakubabika abawamwabo ukuti baghoghiwe, sona na bawise bope bakwiza pakubabombela bunubu abana babo. Abana bakwiza pakubasambukila abapapi babo ukuti baghoghiwe.

Matayi 22:7

U mwene yula akakalala nkani, po akatuma abasilikali bache ababwite pakughogha abaghoghi bala nukocha akaya kabo.

Matayi 24:10

Abantu abinji bakwiza pakutagha ulwitiko lwabo pakabalilo kanako; bakwiza pakulongelelana nukubengana.

Yohani 19:15

Bakakolomoka nkani bakati, “Mughoghe! Mughoghe! Mukomele pachipinjika!” U Pilati akabalalusya akati, “Nkimba mukulonda ukuti ane imukomele u mwene winyu pachipinjika?” Abaputi abasongo bakamwamula bakati, “Tute nu mwene uyunji, loli u Kesale mwene.”

1 Aba Tesalonika 2:16

Bakayezya pakutuzigha ukuti tuleke pakulumbilila amazyu pakasi pabantu babo bate ba Yuda umwakuti bangapokiwa. Bunubu akabalilo kosi biyonjelezyanga bulo imbibi zyabo, umwakuti ubukali ubwa Chala bwabawila.

Aba Hebeli 2:3

Nkimba aswe tungapona bulibuli nanti tutakulemezya ubupoki ubukulu nkani bunubu? Akaba we Mwene yuyo akafumusya tasi ubupoki bunubu, bubo bukasimikiziwa kukwitu na bantu babo bakamwivwa.

Yakobo 2:13

Pakuti u Chala atakwiza pakulanjizya ichisa, bo akumulonga umuntu yuyo atakaba ni chisa. Loli umuntu wesi yuyo ali ni chisa atakwiza pakubunyila ubulongi ubwa Chala.