Zefaniya 3:19 - IBAYIBOLO 2024

¹⁹ Pakabalilo kalakala nkwiza pakubafunda babo bakabayivyanga. Nkwiza pakubapoka abalemazu, nukubabungannya babo banyampanite. Nkwiza pakubapala nukubachindika muchisu chosi ichapasi mumo bakakoziwa isoni.

Zefaniya 3:19 Iomraidhean Croise

Yesaya 26:11

Wee Mwene, wakwezya inyobe yako, loli abene batakuyennya. Abantu banaba bakoziwanje isoni, ubalanjizyanje namumo ubaghaniye, leka bennye ulweke lwako, numoto ghugho ubasungiye abalwani bako, ghubalunguluzye.

Yesaya 33:1

Chighune kukwako we mughoghi, we utananganikitepo! Wee muzimbuli, chighune kukwako, nayumo yuyo atakuzimbuyepo nalumo. Nanti wamalizya pakunangannya, nawe bakwiza pakukunangannya, nanti waleka ubuzimbuli, nawe bakwiza pakukubombela izya buzimbuli.

Yesaya 60:14

Abana babo bakukukanyilila, bakwiza pakukufughamilila pantazi papako, bosi babo bakukuyivya bakwiza pakukufughamilila, sona bakwiza pakukwitizya pakuba we kaya akakulu nkani aka Mwene, u Ziyoni akaya aka Muzelu uwa Izilayeli.

Yesaya 60:18

Ivyongo vitakwiza pakwivwikamo muchisu chako, pamo ukunangannya nukupankulannya mumpaka zyako, loli mukwiza pakughitizya amalinga ghako ukuti mupoki, imilyango yako ukwiza pakuyitizya ukuti amapalo.

Yesaya 61:7

Mubuzilo ubwa soni zyinyu, mukwiza pakupokela ivigaba vibili, mubuzilo ubwakusamuliwa, mukwiza pakusekela mumpyana yabo, mukwiza pakupyana ivigaba vibili muchisu chabo, sona ulusekelo ulwa bwila na bwila, lukwiza pakubanga lwinyu nu lwinyu.

Yesaya 62:7

utakamupanje ubutuzyo mupaka amwikazye sona u Yelusalemu, nukukapela pakuba kakupaliwa muchisu chosi ichapasi.

Yelemiya 30:16

“Loli nkwiza pakubanangannya bosi babo bakubanangannya, abalwani binyu bosi bakwiza pakusendiwa pakuba bazya. Bosi babo bakubafyula ivintu vyinyu, bope ivintu vyabo vikwiza pakufyuliwa. Bosi babo bakubayivya bakwiza pakuyinviwa

Yelemiya 30:19

Abantu babo bakwikala mulamula bakwiza pakwimba inyimbo izyakupalizikizya, bakwiza pakukolomoka nulusekelo. Nkwiza pakubabalizya, sona batakwiza pakuba banandi awe. Nkwiza pakubachindika sona abantu batakwiza pakubasamula.

Yelemiya 31:8

Nkwiza pakubefyako kuchisu icha kumitu nukubabungannya ukufumila kubumalilo ubwa chisu. Pakasi papabo pakwiza pakubapo abafwamaso na balemazu, abakolo babo bakaba ni nyanda na bakolo babo bakaba papipi pakusayiwa. Ichilundilo icha bantu chikwiza pakunyokako.

Yelemiya 33:9

Akaya akakulu kanaka kakwiza pakuba kaya akakufumusya imbili yane inyiza, niya lusekelo sona niya kunchindika sona niya muchizi pamaso pabantu bosi aba inko zyosi pachisu ichapasi bo bakwivwa inyiza zyosi zizyo nakabombela akaya kanaka. Bakwiza pakuba nubogha bo bakwennya ukuti nabapa ubukabi nu mutende uwakufikapo.

Yelemiya 46:28

Wee Yakobo umubombi wane, utakanyilaye, pakuti indi poka namwe sona nkwiza pakubapoka. Nkwiza pakuzinangannya inko zyosi, kuko nabanyampanizizya, loli amwe ntakwiza pakubananganizizya zila. Nkwiza pakubapa amafundwe nubwanaloli, ntakwiza pakubaleka bulo ukusita pakubafunda.”

Ezekiyeli 16:27

“ ‘Po nkalanjizya amaka ghane papako nu kwefyako ichigaba chimo icha chisu chicho nkakupa, sona nkwiza pakukubika munyobe izya balwani bako, aba Filisiti babo isoni zikabalema pachifukwa icha nkalo yako imbibi.

Ezekiyeli 16:57

bo ububibi bwako buchili butavumbuliwe. Loli ilelo wipela bulo pakuba chintu ichakusamuliwa naba muchisu icha Edomu nabapalamani bache bosi, sona naba muchisu icha ba Filisiti babo bakazenga umwakukuzyungulila bakukusamula.

Ezekiyeli 34:16

Nkwiza pakuzilonda zizyo zisobelite nukuzinyosya zizyo zyapulumpa. Nkwiza pakuzipinya ivilonda zizyo zivulaye nukuzikazya zizyo zidedebaye, loli inyine ni zyamaka nkwiza pakuzinangannya. Nkwiza pakuzidima ing'ozi nubwanaloli.

Ezekiyeli 39:13

Abantu bosi aba muchisu bakwiza pakubavwa pakubasyila, sona isiku lilyo nachindikiwa likwiza pakuba lisiku ilyachikumbusyo kukwabo, u Mwene Uwamaka Ghosi anena.

Ezekiyeli 39:26

Bakwiza pakuluvya isoni zyabo nukusita kusubiliwa kwabo kosi kuko bakandanjizya, bo bakwikala umwakufwasa muchisu chabo ukusita koghofesiwa nu muntu yumo.

Mika 7:10

Po umulwani wane akwiza pakuchennya chinichi, sona isoni zikwiza pakumulema, akundalusya akuti, “Nkimba u Mwene u Chala wako ali ko kwiyi?” Amaso ghane ghakwiza pakwennya ukuwa kwache, nilelo bulo akwiza pakukanyankiliwa ngati matope agha mumisebo.

Zefaniya 3:15

U Mwene efyapo ulufundo lwinyu, nukubachimbizya abalwani binyu. U Mwene, umulaghili uwa ba Izilayeli ali namwe, mutakwiza pakunyila sona intamyo zimo.

Zekaliya 8:23

U Mwene Uwamaka Ghosi akuti, “Pakabalilo kalakala, abanavuli 10 abakufuma mu neno zyosi sona naba mu inko izinji, bakwiza pakuyilema nkani inkazo iya mu Yuda yumo nukuti, ‘Tubukaye nawe, pakuti twivwa ukuti u Chala ali nawe.’ ”

Ukukumbusya Amalamulo 26:19

U Mwene u Chala winyu akwiza pakubapela pakuba mwe luko ulukulu nkani ukuzichila inko zyosi zizyo akazipela, umwakuti amwe mukwiza pakumupalagha nukumuchindika. Amwe mukwiza pakuba mwe bantu bache ukuyana namumo akabalayizizya.

Aba Hebeli 12:13

Muyannye izila izyakukanyamo inyayo zyinyu, umwakuti ichigaba chicho chilemaye chitakavyughuke, loli ukuti chipole.

Ubuvumbuli 20:9

Po bakasata pachisu chosi ichapasi nukuvizyungulila ivisakasa ivya bantu aba Chala nakaya akakulu nkani kako akaghanite. Loli umoto ghukika kumwanya nukubanangannya.

Abalongi 1:7

Po u Adonibezeki akati, “Abamwene 70 babo bakadumuliwa abachisumwe aba munyobe naba munyayo bulo bakasebagha utubululusya pasi pitebulo lyane. Ilelo u Chala antanizya pa zizyo nkababombela abantu balabala.” Bakamusenda nukubuka nawe ku Yelusalemu, po akafwila kulakula.