Zefaniya 1:3 - IBAYIBOLO 2024

³ “Nkwiza pakubazimizya abantu ni vinyamana, nkwiza pakuvinangannya iviyuni sona niswi, nivifwani vivyo vikubapela abantu ababibi pakwipunula. Nkwiza pakubanangannya abantu ababibi bo nkubazimizya abantu pachisu ichapasi.” U Mwene anena.

Zefaniya 1:3 Iomraidhean Croise

Ubwandilo 6:7

Akati, “Nkwiza pakubazimizya zila abantu bosi babo nkabapela. Nkwiza pakuvizimizya sona ivinyamana ni viyuni sona ni vinyamana ivyakwavula pachifukwa ichakuti indi ni chitima ukuti nkavipela vyosi vinivi.”

Yesaya 27:9

Bunubu, po imbibi izya Izilayeli zikwiza pakuhobokeliwa, vinivi vikwiza pakuba vikomwa ivyakwefesezya imbibi, akwiza pakughatizannya amabwe ghosi agha vighemo pakuba lufumbi, ichighemo ichakwiputilapo ichifwani icha Ashela, pamo ichighemo ichakufukizizya utwa kununkila, vitakwiza pakubangapo sona.

Yesaya 6:11

Nkalalusya nkati, “Wee Mwene, nkimba zinizi zikwiza pakubangako mupaka liyi?” Akamula akati, “Mupaka utwaya tosi utukulu twaba visami sona nayumoyumo umuntu akwiza pakwikalamo, inyumba zitakwiza pakuba na bantu sona chope ichisu chikwiza pakuba nkolongo.

Yesaya 6:12

Nkwiza pakubasamizizya abantu banaba kubutali, mupaka ichisu chosi chibanje chisami.

Yelemiya 12:4

Nkimba ichisu chikwiza pakubanga chisanya mupaka liyi? Nkimba isote likwiza pakubanga lyumizu mupaka liyi? Pachifukwa ichakuti abantu babo bakwikala mulamula babibi, ivinyamana ni viyuni vikufwa. Loli pope bulo abantu bakwituvya bakuti, “U Chala atakuzyennya zizyo tukubomba.”

Yelemiya 50:3

Uluko ulwa kumitu lukwiza pakulwa nawe ubwite nukuchipela ichisu chila pakuba chisami. Atakwiza pakubapo nayumoyumo umuntu uwakwikala mulamula. Abantu ni vinyamana bakwiza pakuchimbilamo.”

Yelemiya 7:20

U Mwene Uwamaka Ghosi akunena akuti, “Ukukalala kwane nu bukali bwane vikwiza pakupunguliwa pabuzilo bunubu, pa muntu napa chinyamana, pa makwi agha munkolongo napa seke izya mumughunda, sona bukwiza pakwaka ngati moto ghugho ghutakuzima.”

Yelemiya 9:10

Nkwiza pakukolomoka nukughalilila amaghamba sona nkwiza pakuyifwifwitila inkolongo, pachifukwa ichakuti ukwakudimako kwananganika. Kwaba chisami sona batakwendako ukumota ukwavitekwa kutakwivwikako. Iviyuni ni vinyamana vyachimbilamo.

Ezekiyeli 44:12

Loli pachifukwa ichakuti bakababombela pamaso pavifwani vyabo nukubapela aba Izilayeli pakunanga, polelo nkulapa ukuti bakwiza pakufundiwa, pachifukwa icha mbibi zyabo u Mwene Uwamaka Ghosi anena.

Ezekiyeli 7:19

“Bakwiza pakusumba usiliva wabo mumisebo, sona u golide wabo akwiza pakuba munyazu. Usiliva nu golide wabo vitakwiza pakubapoka, pisiku ilya bukali ubwa Mwene. Batakwiza pakwikutizya izala zyabo, pamo pakwizuzya inyanda zyabo nu siliva nu golide, pakuti ubukabi bwabo, bwabapela ukuti banangaye.

Hoseya 14:3

U Asiliya atangatupoka, aswe tutakwiza pakukwelapo pafalasi izya bwite. Tutakwiza pakunenapo sona ukuti, ‘Abachala bitu’ babo twapanga ni nyobe zyitu, pakuti mumwako abalanda bakuchaghamo ichililizi.”

Hoseya 14:8

Wee Efulayimu, nkimba imbombe sona ichoni ni vifwani? Nkwiza pakumwamula nukumusungilila akiza. Indi ngati likwi ibisi ilya payini, pakuti ivikomwa vyinyu vyafuma kukwane.”

Hoseya 4:3

Pachifukwa icha zinizi ichisu chikulila, sona bosi babo bakwikalamo bakwiza pakudedebala, umwakuti ivinyamana ivyamunkolongo, ni viyuni sona niswi vikwiza pakuzimila.

Zekaliya 13:2

“Pisiku lilalila, nkwiza pakughazimya amatabwa agha vifwani ivya muchisu, batakwiza pakughakumbuka sona. Nkwiza pakubefyamo bosi babili abalaghuzi ni mizimu iminyazu iya muchisu chilachila. U Mwene anena.

Matayi 13:41

U Mwana uwa Muntu akwiza pakutuma abantumi bache ukwefya abantu bosi mu Bumwene bwache, babo bakupuvya abantu na babo bakubomba ivibibi.

Matayi 23:39

Nkubabuzya ukuti ukwandila pakabalilo aka, mute mukanyennyepo nalumolumo mupaka munene ukuti, ‘U Chala amusaye yuyo akwiza mwitabwa ilya Mwene.’ ”

Ubuvumbuli 2:14

“Loli utuntu utunandi bulo tuto nkubasusya nato twakuti, mukasi mumwinyu muli abantu babo bakukonka ichimanyisyo icha Balamu, yuyo akamumanyisya u Balaki namumo angabadebela aba Izilayeli ukuti balye ichakulya chicho chibikiwe ku vifwani ukuti chibanje chakwiyipa, sona nukubomba ubwamalaya.