Yoshwa 4:6 - IBAYIBOLO 2024

⁶ Amabwe ghanagha ghabanje chikumbusyo chinyu, umwakuti muntazi nanti abana binyu bakubalalusya bakuti, ‘Nkimba amabwe ghanagha ghakung'anamula ichoni?’

Yoshwa 4:6 Iomraidhean Croise

Masalimo 44:1

Wee Chala, na makutu ghitu tukivwa, sona abanyenya bitu batubuzizye, vivyo ukabomba pakabalilo kabo.

Masalimo 71:18

Wee Chala, napapo ne mughosi sona ivwi zyawa, utakandekaye nemwene. Po nkwiza pakulumbilila nizyamaka ghako mupaka inkulilo iya muntazi, sona nizyamaka ghako ku bosi babo bakwiza pakupapiwa muntazi.

Ukufuma 12:14

“Isiku linili mubaghiye pakulisunga pakuba lisiku lizelu ilya lusekelo ulwa Mwene. Inkulilo zyosi izya muntazi zikwiza pakulisunga isiku linili pakuba lisiku izelu ilya lusekelo ulwa Mwene. Mubaghiye pakulikumbuka pakuba lulaghilo ulwa bwila na bwila.”

Ukufuma 13:14

“Muntazi, nanti abana binyu bakubalalusya ukuti, ‘Nkimba ichi chikung'anamula ichoni?’ Mubamulaye ukuti, ‘U Mwene akatwefyamo mu Ijiputi, ichisu icha buzya na maka ghache amakulu.

Ukufuma 13:9

Ulusekelo ulu lukwiza pakuba chimanyilo ichakupinyiwa panyobe zyinyu, sona na pacheni chinyu. Chikwiza pakubakumbusya ukuti indaghilo izya Mwene zibaghiye pakuba pamilomo yinyu. Pakuti u Mwene akabefyamo muchisu icha Ijiputi na maka ghache amakulu nkani.

Ukufuma 31:13

“Ubabuzye aba Izilayeli uti, ‘Mulikumbukaye Isiku Ilyakutuzya, pakuti cho chimanyilo pakasi papinyu nane mupaka inkulilo zyosi izya muntazi ichakulanjizya ukuti ane ne Mwene ne nabapela amwe pakuba mwe bantu bazelu.

Yesaya 38:19

Abumi, bo babo bakukupala awe, ngati mumo nkubombela ilelo, abatata bakubabuzya abana babo, nizya busubiliwa bwako.

Yesaya 55:13

Mubuzilo ubwa mivwa mukwiza pakumela amakwi agha payini, mubuzilo ubwa ntumbusya mukwiza pakumela amakwi aghamazwanga. Ichi chikwiza pakuba chimanyilo icha Mwene, icha bwila na bwila, chicho chitakwiza pakunanganika.”

Ezekiyeli 20:12

Nkabapa sona Isiku Ilyakutuzya pakuba chimanyilo pakasi papitu, ukuti bamanye ukuti ane ne Mwene nkabapela pakuba bazelu.

Ezekiyeli 20:20

Mughachindikaye Amasiku aghane Aghakutuzya pakuba mazelu, ukuti ghabe chimanyilo pakasi papitu. Po mukwiza pakumanya ukuti ane ne Mwene u Chala winyu.”

Ukubelengiwa 16:38

Ivyakufukizizya utwakununkila ivya bantu babo bakaghoghiwa pachifukwa icha kunanga kwabo vyaba vizelu. Uvisyane pakuba vikupikizyo ivipapate ivya pachighemo, pakuti vikabikiwa kwa Mwene, sona vyaba vizelu. Po vinivi vikwiza pakuba chimanyilo ichakubasoka aba Izilayeli.”

Imbombo 2:39

Pakuti u Chala akabalayizya ichi amwe poka na bana binyu, sona na bantu bosi babo bali kubutali—abantu bosi babo u Mwene u Chala witu akwiza pakubitizizya kukwache.”

Ukukumbusya Amalamulo 11:19

Mubamanyisyanje abana binyu. Mughanenaye bo mukwikala pasi munyumba zyinyu, pamo bo mukwenda mumusebo, pamo bo mukughona pabusiku, sona bo mukulamusya pandabindabi.

Yoshwa 22:27

Loli tukalonda ukuti chibanje we kaboni pakasi papitu namwe sona na pankulilo zizyo zikwiza muntazi, ukuti tukwiza pakumwiputa u Mwene Mubuzilo Ubuzelu pakubika ivyakwiyipa ivyakocha ni vyabupi sona ni vyakwiyipa ivyabupoka. Po muntazi abaluko lwinyu batakwiza pakubabuzya abaluko lwitu ukuti, ‘Amwe mute ni chigaba mwa Mwene.’

Yoshwa 4:21

Po akababuzya aba Izilayeli akati, “Muntazi nanti abana binyu bakubalalusya bakuti, ‘Nkimba amabwe ghanagha ghakung'anamula ichoni?’,

Yoshwa 4:5

nukubabuzya ukuti, “Longolela kuntazi ukwa Bokosi ilya Lufingo ilya Mwene u Chala winyu nukwinjila pakasi na pakasi mulusoko ulwa Yolodani. Umuntu wesi abaghale ibwe, ibwe lyoka ukwimilila uluko loka ulwa inko zyosi izya Izilayeli.