Yelemiya 7:23 - IBAYIBOLO 2024

²³ loli nkabapa ilamulo ilyakuti: Munyivwilaye po nkwiza pakubanga ne Chala winyu sona amwe mukwiza pakubanga mwe bantu bane. Muzikonkaye izila zyosi zizyo nkubalamula, nanti mukulonda ukuti ivintu vibendelaye akiza.

Yelemiya 7:23 Iomraidhean Croise

Yobu 36:11

Nanti bakumwivwila nukumubombela, ivintu vikwiza pakubendelagha akiza amasiku ghabo ghosi nukumalizya amaka ghabo mubuhobosu.

Masalimo 119:3

Batakubomba nachimochimo ichibibi, loli bakwenda muzila zyache.

Masalimo 40:6

Utakuhoboka ni vyakwiyipa sona ni vyabupi, loli wanyighula amakutu ghane, sona ivyakwiyipa ivyakocha ni vyakwiyipa ivyakupepesezya imbibi utakuvilonda.

Masalimo 81:13

“Nanti abantu bane bakanyivwilagha, ngali aba Izilayeli bakabomba vivyo nkavilonda.

Ukufuma 15:26

akati, “Nanti mukunyivwila ane nukubomba zizyo ngolosu pakukonka indaghilo zyane nukwivwila akiza vyosi vivyo nkubalamula, ntakwiza pakubafunda nu bubine ukuyana namumo nkabafundila aba Ijiputi. Pakuti ane ne Mwene, yuyo akubapozya.”

Ukufuma 16:32

U Mozesi akati, “U Mwene atulamuye ukuti, ‘Mubasungileko abaluko lwinyu umana yumo, umwakuti bope bangachennya ichakulya chicho nkabapa amwe munkolongo, bo nabefya mu Ijiputi.’ ”

Yesaya 3:10

Babuzye abagholosu ukuti vikwiza pakubendela akiza, pakuti bakwiza pakwilagha ivikomwa ivya mbombo zyabo.

Yelemiya 11:4

ulufingo lulo nkafingana na banyenya binyu bo nkubefyamo mu Ijiputi, muchiliba ichakwaka umoto. Nkati, ‘Munyivwile nukubomba chosi chicho nkubalamula, po mukwiza pakuba bantu bane, sona nkwiza pakuba ne Chala winyu.

Yelemiya 11:7

Pakuti nkabasoka abanyenya binyu kabilikabili nu moyo wane ghosi pakabalilo kako nkabefya muchisu icha Ijiputi mupaka ilelo nu moyo wane ghosi nukunena ukuti, ‘Munyivwilaye.’

Yelemiya 13:11

Pakuti ngati mumo ulamba akupinyiwa mu musana uwa muntu, momumo nkalondelagha ukuti aba Izilayeli sona naba Yuda bipinyilile bene kukwane umwakuti babanje bantu bane, ukuti balipalaye itabwa lyane nukulichindika. Loli batakivwila.”

Yelemiya 22:21

Nkakusoka bo ufwasite, loli ukati, ‘Intakwivwa napo panandi!’ Momumo wabeleye bo uchili we mulumendo, utakaghivwila amalamulo ghane.

Yelemiya 22:3

U Mwene akuti: Ulongelaye inongwa mubugholosu na mubwanaloli. Umupokaye umuntu munyobe izya bayinvyi sona na yuyo afyuliwe ivyache. Utakamubombelaye nachimochimo ichibibi umuyeni, pamo umupina, pamo umwana umulanda, pamo umukolo umufwilwe, sona utakakupulaye ibanda ilya bantu babo bate nakalema mubuzilo bunubu.

Yelemiya 24:7

Nkwiza pakubapa u moyo uwakuzimanya ukuti ne Mwene. Bakwiza pakuba bantu bane, nane nkwiza pakuba ne Chala wabo, pakuti bakwiza pakunyokela kukwane nu moyo wabo ghosi.

Yelemiya 31:33

U Mwene akati, “Ulu lo lufingo lulo nkwiza pakufingana naba Izilayeli mumasiku ghalaghala. Nkwiza pakubika ululaghilo lwane mukasi mumwabo nukulusimba mumoyo ghabo. Nkwiza pakuba ne Chala wabo, sona abene bakwiza pakuba bantu bane.

Yelemiya 32:23

Bakinjila nukuchifyula ichisu chila loli batakakwivwila pamo ukukonka indaghilo zyako, batakabomba zizyo ukabalamula ukuti babombaye. Po ukabawisizya intamyo zyosi zinizi.

Yelemiya 38:20

U Yelemiya akamwamula akati, “Batakwiza pakukubika munyobe zyabo. Awe umwivwilaye bulo u Mwene pakubomba zyosi zizyo nkukubuzya. Po vyosi vikwiza pakukwendela akiza, sona ukwiza pakubupoka ubumi bwako.

Yelemiya 42:6

Manyi vikutuhobosya pamo vikutukalalizya, aswe tukwiza pakumwivwila u Mwene u Chala witu yuyo tukukutumako, umwakuti vitwendele akiza, pakuti tukwiza pakumwivwila u Mwene u Chala witu.”

Zefaniya 3:2

Katakumwivwila nayumoyumo, sona katakwitika ukuchemeliwa. Katakumusubila u Mwene, katakupalamila kwa Chala wache.

Zekaliya 6:15

Abantu bosi babo bali kubutali, bakwiza pakwavwa pakuzenga Inyumba iya Mwene, po bakwiza pakumanya ukuti u Mwene Uwamaka Ghosi antuma pakasi papabo. Zinizi zikwiza pakubombiwa nanti naloli mukughivwila amazyu agha Mwene u Chala winyu.”

Zekaliya 7:7

Nkimba te mazyu ghagho u Mwene akalumbilila ukwendela mubalaghuzi abavula intazi bala, bo akaya aka Yelusalemu poka nutwaya utukulu tuto tukazyunguliye tuli pamutende sona, kuchigaba icha kuntende sona na mumaghamba, kuko bakikalagha?’ ”

Aba Loma 16:26

Loli, ilelo vyavumbuliwa pabuzelu ukwendela mu masimbo agha balaghuzi; sona ukwendela mu malamulo agha Chala uwa bwila na bwila vyavumbuliwa ku bantu abaluko losi, umwakuti basubile nukwivwila.

2 Aba Kolinti 10:5

Sona tukumongolannya nagho amadali, sona na mituvyo ghosi ghagho ghakukanizya abantu pakumumanya u Chala. Tukuzipela inyinong'ono zyosi ukuti zimwivwile u Kilisitu.

Ukukumbusya Amalamulo 11:27

Nanti mukughakonka amalamulo agha Mwene u Chala winyu, mukwiza pakupokela ulusayo lulo nkubapa amwe ilelo.

Ukukumbusya Amalamulo 13:4

Mumukonke nukumunyila u Mwene u Chala winyu. Mughakonke amalamulo ghache nukumwivwila. Mumubombele yuyo mwene, sona mumukakatile.

Ukukumbusya Amalamulo 13:5

Loli umulaghuzi pamo uwavilota yula aghoghiwanje pachifukwa ichakubabuzya ukuti mumusambukile u Mwene u Chala winyu, yuyo akabefyamo mu Ijiputi nukubapoka muchisu chicho mukaba mwe bazya. Umuntu yunuyu mubibi pakuti akulonda pakubasovya ukuti mutakazikonkaye zizyo u Mwene akabalamula. Mubwefyepo ububibi bunubu pakasi papinyu pakumughogha umuntu yunuyu.

Ukukumbusya Amalamulo 30:2

sona nanti amwe na bana binyu mukunyokela kwa Mwene u Chala winyu, nukumwivwila na moyo ghinyu ghosi, sona nu muzimu winyu ghosi ukuyana na malamulo ghagho nkubapa ilelo,

Ukukumbusya Amalamulo 30:20

Mumughanaye u Mwene u Chala winyu, mumwivwilaye nukumukakatila. Pakuti u Mwene bo bumi bwinyu. Po akwiza pakubitikizya amwe na baluko lwinyu ukuti mwikalaye nubumi ubutali muchisu, chicho akamulayizya umunyenya winyu u Abulahamu nu Yisaki, sona nu Yakobo.

Ukukumbusya Amalamulo 30:8

Amwe mukwiza pakumwivwila sona u Mwene nukughakonka amalamulo ghache ghosi ghagho nkubapa ilelo.

Ukukumbusya Amalamulo 4:10

Mubabuzye nkaninkani nizya isiku lilyo mukimilila pamaso pa Mwene u Chala winyu pighamba ilya Sinayi. Kulakula akambuzya akati, “Ubabungannye abantu. Nkulonda ukuti bivwe amazyu ghagho nkwiza pakunena, umwakuti banganyila pakabalilo kosi aka bumi bwabo, sona nukuti bangabamanyisya na bana babo bulo.”

Ukukumbusya Amalamulo 4:40

Muzikonkaye indaghilo na malamulo ghache ghosi ghagho nkubapa ilelo, umwakuti ivintu vyosi vibendelaye akiza, amwe na bana binyu, sona nukuti mwendelele pakwikala muchisu chicho u Mwene u Chala winyu akubapa ukuti chibanje chinyu bwila na bwila.

Ukukumbusya Amalamulo 5:16

“Umuchindikaye ughuso nu nyoko, ukuyana namumo u Mwene u Chala wako akakulamulila, umwakuti ubanje nubumi ubutali muchisu chicho u Mwene u Chala wako akukupa.

Ukukumbusya Amalamulo 5:29

Ane nalondagha nkani ukuti inyinong'ono zyabo ngali zili bunubu amasiku ghosi, sona nukuti ngali bakunchindika nukuzikonka indaghilo zyane zyosi, umwakuti ivintu vyosi vibendelaye akiza, poka na baluko lwabo bwila na bwila.

Ukukumbusya Amalamulo 5:33

Mukonkaye bulo zyosi zizyo u Mwene u Chala winyu abalamuliye, umwakuti ivintu vyosi vibendelaye akiza, sona nukuti mwendelele pakuba nubumi ubutali muchisu chicho mukwiza pakwikalamo.

Ukukumbusya Amalamulo 6:3

Mwee ba Izilayeli, ivwa kuno, sona mwenelezye ukuti mukuvikonka, umwakuti vyosi vibendelelaye akiza, sona nukuti munyamane nkani muchisu icha mboto ukuyana namumo u Mwene u Chala uwa banyenya binyu akabalayizizya.

Aba Hebeli 5:9

Bo aba wakufikapo, akaba mbwibwi iya bupoki ubwa bwila na bwila ubwa bantu bosi babo bakumwivwila.

1 Samuweli 15:22

Loli u Samuweli akati, “Nkimba u Mwene akuhoboka ni vyakwiyipa ivyakocha, sona ni vyabupi pamo ukughivwila amazyu ghache? Ukwivwila chintu chizapo ukuchila ichakwiyipa, ukughakonka amalamulo ghache chizapo, ukuchila ichakwiyipa icha mafuta agha dubi.