Pakuti umu momumo u Mwene, u Chala uwa Izilayeli akunenela nizya nyumba izya mukaya akakulu nkani nizya nyumba izya bamwene aba mu Yuda zizyo zimongoliwe ukuti bazengele amalinga agha kukazighilila akaya akakulu nkani, pakabalilo aka bwite.
Mumwaka uwa nayini uwa bulaghili ubwa Zedekiya u mwene uwa chisu icha Yuda, mumwezi uwa teni, u Nebukadineza u mwene uwa chisu icha Babiloni poka na basilikali bache bosi bakakazyungulila akaya akakulu nkani aka Yelusalemu.
Po yannya injelwa pakuba ngati kaya akakulu nkani. Uzenge ulubumba abalwani bakukazighilila akaya, uzenge ivighemo ni chitembe, sona uzenge ni visakasa umwakukazyungulila akaya kosi na kosi.
Po u mwene uwa chisu icha kumitu akwiza pakukazyungulila akaya aka ilinga nukukafyula. Abasilikali aba chisu icha kuntende batakwiza pakwendelela pakulwanga sona ubwite. Bope abasilikali babo bamenye nkani ubwite batakwiza pakuba na maka.