Yelemiya 50:3 - IBAYIBOLO 2024

³ Uluko ulwa kumitu lukwiza pakulwa nawe ubwite nukuchipela ichisu chila pakuba chisami. Atakwiza pakubapo nayumoyumo umuntu uwakwikala mulamula. Abantu ni vinyamana bakwiza pakuchimbilamo.”

Yelemiya 50:3 Iomraidhean Croise

Ubwandilo 6:7

Akati, “Nkwiza pakubazimizya zila abantu bosi babo nkabapela. Nkwiza pakuvizimizya sona ivinyamana ni viyuni sona ni vinyamana ivyakwavula pachifukwa ichakuti indi ni chitima ukuti nkavipela vyosi vinivi.”

Ukufuma 12:12

“Ubusiku bunubu nkwiza pakudumusannya muchisu chosi icha Ijiputi, po nkwiza pakumughogha ukatote wesi umulumendo nu mwana wesi uwakwanda pakupapiwa uwa chinyamana. Nkwiza pakubafunda abachala abanji bosi aba muchisu icha Ijiputi. Ane ne Mwene.

Yesaya 41:25

“Nkamunyamusya weka kuchisu ichakumitu, po akiza, weka kubufumilo bwizuba yuyo akwiputa itabwa lyane. Akubakanyankila pasi abalongozi ngati litope, ngati mumo umumata isonta akubombela.

Yesaya 45:1

U Mwene akanena kwa Sayilasi umupakiwa wache, yuyo akumulema ninyobe yache indilo, ukuti azipote inko pantazi pache, nukubafyula abamwene ubumwene bwabo, nukwighula imilyango pantazi pache, umwakuti imilyango yitakighaliwe sona:

Yelemiya 21:6

Nkwiza pakubaghogha bosi babo bakwikala mukaya akakulu nkani aka, kokuti abantu ni vinyamana bulo bakwiza pakufwa ni chiwaya ichakoghofya.’

Yelemiya 50:9

Pakuti nkwiza pakunyamusya ichilundilo icha inko izyamaka izya kumitu. Bakwiza pakubamba ukuti balwe ubwite ni chisu icha Babiloni nukuchifyula. Utulasilo twabo tukwiza pakuba ngati basilikali, babo bamenye pakulwa ubwite, sona batakubwela nyobe zyene.

Yelemiya 51:11

“Pyasya utulasilo, senda ingulu zyinyu! U Mwene abasonjelezya abamwene aba mu Mediya, pakuti inyinong'ono zyache zyakuti amunangannye u Babiloni. U Mwene akwiza pakutanizya, pachifukwa ichakuyinangannya Inyumba yache.

Yelemiya 51:48

Po kumwanya ni chisu ichapasi sona chosi chicho chili mulamula, vikwiza pakukolomoka umwakuhoboka pachifukwa icha Babiloni. Pakuti abantu aba kumitu bakwiza pakukanangannya akaya kala. Ane ne Mwene nanena.

Yelemiya 51:62

Po babuzye ukuti, ‘Wee Mwene, wanena ukuti: Ukwiza pakubunangannya ubuzilo ubu, umwakuti atakwiza pakwaghiwamo nayumoyumo uwakwikalamo, manyi umuntu pamo ichinyamana, sona kakwiza pakuba ngati chisami bwila na bwila.’

Yelemiya 7:20

U Mwene Uwamaka Ghosi akunena akuti, “Ukukalala kwane nu bukali bwane vikwiza pakupunguliwa pabuzilo bunubu, pa muntu napa chinyamana, pa makwi agha munkolongo napa seke izya mumughunda, sona bukwiza pakwaka ngati moto ghugho ghutakuzima.”

Yelemiya 9:10

Nkwiza pakukolomoka nukughalilila amaghamba sona nkwiza pakuyifwifwitila inkolongo, pachifukwa ichakuti ukwakudimako kwananganika. Kwaba chisami sona batakwendako ukumota ukwavitekwa kutakwivwikako. Iviyuni ni vinyamana vyachimbilamo.

Yelemiya 9:11

U Mwene akuti, “Nkwiza pakumupela u Yelusalemu pakuba chisami, numwakughonamo abakambwe, sona utwaya utwa Yuda utukulu nkani tukwiza pakumongoliwa, umwakuti nayumoyumo u muntu akwiza pakwikalaghamo.”

Zefaniya 1:3

“Nkwiza pakubazimizya abantu ni vinyamana, nkwiza pakuvinangannya iviyuni sona niswi, nivifwani vivyo vikubapela abantu ababibi pakwipunula. Nkwiza pakubanangannya abantu ababibi bo nkubazimizya abantu pachisu ichapasi.” U Mwene anena.