Yelemiya 23:5 - IBAYIBOLO 2024

⁵ “Amasiku ghakwiza ghagho ane ne Mwene nkwiza pakubimikila u mwene umugholosu pa banyenya aba Devedi. Weyuyo akwiza pakubalaghila abantu mubugholosu na mumahala, sona akwiza pakulongelagha mubugholosu na mubwanaloli inongwa izya bantu aba muchisu.

Yelemiya 23:5 Iomraidhean Croise

2 Samuweli 23:3

U Chala uwa Izilayeli akanena, Ilyalabwe ilya Izilayeli likanena nane likati, ‘Nanti umuntu akubalaghila abantu mubwanaloli nanti akubalaghila umwakumunyila u Chala,

Masalimo 45:4

Bukagha nu buchindamu bwako pakupota abalwani bako, pakuvivighilila ubwanaloli, nukwiyisya nu bugholosu. Yilekaye inyobe yako indilo yibombaye imbombo zyako izyakoghofya.

Masalimo 80:15

Imigululuzi inyobe yako indilo yikabyala umwana yuyo wamulela wemwene.

Masalimo 99:4

U Mwene wamaka, sona abughanite ubwanaloli, ubwikazizye ubwanaloli. Wabomba ingolosu sona izyanaloli mwa Yakobo.

Yesaya 33:5

U Mwene akweziwanje, pakuti akwikala kumwanya, akwiza pakwizuzya akaya aka Ziyoni, nu bwanaloli sona nu bugholosu.

Yesaya 4:2

Pisiku lilalila ulusamba ulwa Mwene lukwiza pakuba lwakuboneka akiza nkani nulwa buchindamu, sona ivikomwa ivya chisu vikwiza pakuba vyakwituvya nivya buchindamu, ku bantu babo bakwiza pakulekiwa bumi mu Izilayeli.

Yesaya 42:6

Ane, ne Mwene, nakwitizya mubugholosu, nkwiza pakukulema panyobe. Nkwiza pakukusungilila, pakuba lufingo ku bantu, sona pakuba lukozyo ku inko izinji,

Yesaya 45:24

Bakwiza pakunena nizya ane ukuti, “Mwa Mwene mpela, momumo muli ubugholosu namaka.” Loli bosi babo bambengite, bakwiza pakukoziwa isoni.

Yesaya 52:13

Ennya umubombi wane akwiza pakubomba akiza, akwiza pakukweziwa nukuchindikiwa.

Yesaya 53:10

Loli bukaba bwighane ubwa Mwene ukuti amuvulazye bunubu nukumupelela amayimba, u Mwene akabupela ubumi bwache, pakuba chakwiyipa ichakupepesezya inongwa, akwiza pakwennya abizikulu bache, nukuba nubumi ubutali, sona ubwighane ubwa Mwene bukwiza pakukwanilisiwa mumwache.

Yesaya 53:2

Pakuti akakula pamaso pa Mwene ngati kakwi akabisi, sona ngati likwi iteta, ngati ligululuzi muchisu ichumizu. Atakaba wakuboneka akiza, pamo ichintu chimo ichakumuhobosya akiza ukuti tumwenelezyanje, atakaba wakuboneka akiza, umwakuti tumunyonywanje.

Yesaya 9:5

Isapato zyosi zizyo abalwabwite bakabombezya kubwite, sona amenda ghosi ghagho ghatonyeliwa nibanda, ghakwiza pakochiwa numoto ngati nkwi.

Yesaya 9:6

Pakuti u mwana atupapiliwa aswe, u mwana umwanavuli apeghiwa kukwitu, weyuyo akwiza pakulaghila. Akwiza pakwitiziwa ukuti mumanyisya amahala uwakuswighisya, u Chala Uwamaka Ghosi, U tata uwa bwila na bwila, u Mwene uwa mutende.

Yesaya 9:7

Ukonjeleziwa ukwa bulaghili bwache nu mutende butakwiza pakumala. Akwiza pakulaghila pachitengo icha Devedi napabumwene bwache, pakubwikazya nukubukuzya mubwanaloli nu bugholosu ukwanda pakabalilo kalakala sona bwila na bwila. Ulweke ulwa Mwene Uwamaka Ghosi lukwiza pakuzimalizya zinizi.

Yelemiya 22:15

“Nkimba ukwinong'ona ukuti, we mwene uwakubachila abamwinyu, pachifukwa ichakuti uzengeye inyumba yako na matabwa agha mwale? Nkimba ughuso atakaba ni chakulya sona ni chakung'wela? Akabomba chicho chikaba chigholosu sona ni chanaloli po vyosi vikamwendela akiza.

Yelemiya 22:3

U Mwene akuti: Ulongelaye inongwa mubugholosu na mubwanaloli. Umupokaye umuntu munyobe izya bayinvyi sona na yuyo afyuliwe ivyache. Utakamubombelaye nachimochimo ichibibi umuyeni, pamo umupina, pamo umwana umulanda, pamo umukolo umufwilwe, sona utakakupulaye ibanda ilya bantu babo bate nakalema mubuzilo bunubu.

Yelemiya 22:30

U Mwene akuti, “Mumusimbe umuntu uwa bunubu ngati mughumba, umuntu yuyo atangendelela mubumi bwache pakuti atalipo nayumoyumo uwa luko lwache, yuyo akwiza pakupyanapo ubumwene ubwa Devedi, pamo pakulaghila sona mu Yuda.”

Yelemiya 23:6

Mukabalilo kache ichisu icha Yuda chikwiza pakupokiwa sona ichisu icha Izilayeli chikwiza pakwikalagha umwakufwasa. Akwiza pakwitiziwa ni tabwa ilyakuti, ‘U Mwene we Bugholosu bwitu.’ ”

Yelemiya 29:11

Pakuti inzimenye zizyo imbayanizizye, te bubibi awe, loli pakubapa ulusubilo ni ntazi inyiza.

Yelemiya 30:3

Akabalilo kakwiza kako nkwiza pakubanyosezya abantu bane aba Izilayeli naba mu Yuda, nukubanyosezya kuchisu chicho nkabapa abanyenya babo ukuti bikalayemo.’ ”

Yelemiya 30:9

Mubuzilo bwache bakwiza pakumubombela u Mwene u Chala wabo, sona nu Devedi u mwene wabo, yuyo nkwiza pakubasalila.

Yelemiya 31:27

U Mwene akuti, “Amasiku ghakwiza ghagho aba Izilayeli naba Yuda poka ni vinyamana bakwiza pakubala nkani.

Ezekiyeli 21:27

Chisami! Chisami! Nkwiza pakukapela akaya akakulu nkani pakuba chisami. Loli chitakwiza pakunyokelamo sona mupaka umwenecho ize, umwene weyuyo nkwiza pakumupa ichisu chinichi.’

Ezekiyeli 34:16

Nkwiza pakuzilonda zizyo zisobelite nukuzinyosya zizyo zyapulumpa. Nkwiza pakuzipinya ivilonda zizyo zivulaye nukuzikazya zizyo zidedebaye, loli inyine ni zyamaka nkwiza pakuzinangannya. Nkwiza pakuzidima ing'ozi nubwanaloli.

Ezekiyeli 34:29

Nkwiza pakubapa amaghunda amiza umwakuti ghapanje ivyakulya ivyinji, po batakwiza pakuba nizala sona muchisu chila, pamo ukusekiwa ninko.

Ezekiyeli 45:8

Ichisu chila chikwiza pakuba mpyana iyache ni yache, po abamwene bane batakwiza pakubayivya sona abantu bane, loli bakwiza pakubitikizya aba Izilayeli pakuba ni chisu ukuyana nuluko lwabo.

Daniyeli 9:24

“Amaka 7 agha tubalilo aka 70 twabikiwa ukuti abantu aba mukaya akazelu, poka nakaya kako akakulu nkani akazelu babuleke ububibi bwabo sona ni mbibi. Bapepesyanje imbibi zyabo pakubomba ubugholosu ubwa bwila na bwila ichisetuka nu bulaghuzi vikwiza pakukwanilisiwa, sona Ubuzilo Ubuzelu nkani bula bupaghuliwanje.

Hoseya 1:11

Abantu aba mu Yuda, naba mu Izilayeli bakwiza pakuba poka. Bakwiza pakusala umulongozi weka, sona ivintu vikwiza pakubendela akiza muchisu chabo, pakuti isiku ilya Yezileli likwiza pakuba likulu nkani.

Hoseya 3:5

Loli bo pachilapo akabalilo aba Izilayeli bakwiza pakunyokela nukumulondelezya u Mwene u Chala wabo, sona nu Devedi u mwene wabo. Bakwiza kwa Mwene bo bakutetema umwakuti bapokele ubwiza bwache ubwa bumalilo.

Amosi 9:11

U Mwene akuti, “Pisiku lilalila nkwiza pakunyosezyamo ubumwene ubwa Devedi bubo buli ngati nyumba yiyo yighuye. Nkwiza pakuluzenga sona ulubumba lwache, nukuyannya sona mumo lwamongoka po nukuzenga sona ngati mumo lukabela kale,

Mika 5:3

Polelo u Mwene akwiza pakubabika aba Izilayeli munyobe izya balwani, mupaka pakabalilo kako umukolo yuyo ali nulwanda asayiwe, sona abanji bosi abaluko lwache bakwiza pakunyokela nukwikala poka naba Izilayeli.

Zekaliya 3:8

“ ‘Wee Yoshwa umuputi usongo poka na bamanyani bako, babo bikaye pamaso papako, ivwa kuno, awe we chimanyilo icha vintu ivyamuntazi. Nkwiza nu mubombi wane, yuyo we Lusamba.

Zekaliya 9:9

Mwee bantu aba mukaya akakulu nkani aka Ziyoni, sekelagha nkani! Mwee bantu ba mu Yelusalemu, hobokagha! Ennya, u mwene winyu akwiza kukwinyu, mugholosu sona ali nubupoki, mololo sona akwelite pampunda inyanavuli, umwana wampunda.

Matayi 2:2

Bakalalusya bakati, “Ali ko kwiyi umwana yuyo apapiwa pakuba we mwene uwa ba Yuda? Tukennya ulutondwa lwache kubufumilo bwizuba. Po twiza pakumwiputa.”

Yohani 1:45

U Filipu akamwagha u Nataniyele nukumubuzya ukuti, “Twamwagha yuyo u Mozesi akasimba mwibuku ilya Ndaghilo, sona yuyo abalaghuzi bakasimba ni zyache. We Yesu uwamu Nazaleti, umwana uwa Yosefu.”

Yohani 1:49

U Nataniyele akamwamula akati, “Wee Mumanyisi, we Mwana uwa Chala! We Mwene uwa ba Izilayeli.”

1 Aba Kolinti 1:30

U Chala weyuyo abamamatizya poka nu Kilisitu u Yesu, sona akamupima pakuba mahala ghitu. Ukwendela mumwache, twaneniwa pakuba bantu bagholosu pamaso pa Chala. Aswe twaba bantu abazelu aba Chala, sona twapokiwa.

Aba Hebeli 8:8

Loli u Chala akabagha abantu bache ni chilema nukuti, “Akabalilo kakwiza kako nkwiza pakufingana nabo ulufingo ulupya aba Izilayeli, sona na baluko ulwa Yuda.

Ubuvumbuli 19:11

Pisinda pache nkennya kumwanya kwighukite, po nkennya ifalasi inswepu. Uwakukwelapo akaba we Musubiliwa sona Wanaloli. Akulonga nukulwa ubwite bwache mubwanaloli.