Yelemiya 22:6 - IBAYIBOLO 2024

⁶ Pakunena nizya nyumba iya bumwene iya mwene uwa Yuda u Mwene akati, “Napapo uli ngati we chisu icha Giliyadi kukwane, sona uli ngati songa iya lighamba ilya Lebanoni, naloli nkwiza pakukupela pakuba we nkolongo, pakuba ngati twaya tuto abantu batakwikalamo.

Yelemiya 22:6 Iomraidhean Croise

Ubwandilo 37:25

Bo bakwikala pasi ukuti balye ichakulya chabo, bakennya akabukatila aka baghulizi abaluko ulwa Ishimayeli kafuma ku Giliyadi nukubuka ku Ijiputi. Ingamila zyabo zikanyamula utwakunonezya ivyakulya na mafuta agha ikwi ilya balimu sona nagha mule pabulendo bwabo ubwa ku Ijiputi.

Masalimo 107:34

Ichisu icha muvundo pakuba chisu icha mbeya, pachifukwa icha bantu ababibi, babo bakwikala mulamula.

Inyimbo izya Solomoni 4:1

Wee wapamoyo wane, we wakuboneka akiza nkani, sona naloliloli we lutondwa lwane. Amaso ghako ghali ngati gha nkunda muchakuvwinka chicho uvwalite kucheni chako. Isisi zyako zikumekuka ngati mudimo uwa mbuzi, zizyo zikwika pighamba ilya Giliyadi.

Inyimbo izya Solomoni 5:15

Ivinama vyache viyanite ni mpanda izya mabwe aghamutengo zizyo bazikazizye pavyakwikalila ivya golide umwenecho. Akabonekele kache kali ngati gho maghamba agha Lebanoni, sona akuboneka akiza nkani ngati gho makwi agha mwale.

Yesaya 27:10

Akaya akakulu nkani akamalinga kaba chisami, kaba kaya akakulekiwa, sona kasuliwe ngati nkolongo, kulakula ingwata zikulyelako, zikughona nukulya isamba zyache.

Yesaya 37:24

Wazituma intumi zyako pakumutuka u Mwene, sona ukuti, ‘Ningolo zyane inyinji nakwela pamwanya pamaghamba, pamwanya nkani pakasonga aka Lebanoni, nadumula amakwi ghache amatali agha mwale, sona nagha payini amiza. Nafika kuvigaba ivya mulubazu ulwa pakasonga aka mumisutu umwiza nkani.

Yesaya 6:11

Nkalalusya nkati, “Wee Mwene, nkimba zinizi zikwiza pakubangako mupaka liyi?” Akamula akati, “Mupaka utwaya tosi utukulu twaba visami sona nayumoyumo umuntu akwiza pakwikalamo, inyumba zitakwiza pakuba na bantu sona chope ichisu chikwiza pakuba nkolongo.

Yelemiya 21:11

U Mwene akamubuzya u Yelemiya akati, “Ubabuzye abamunyumba iya Yuda uti: Ivwa amazyu agha Mwene.

Yelemiya 21:14

“Nkwiza pakubafunda ukuyana ni mbombo zyinyu, Nkwiza pakughocha umusitu winyu, umoto ghukwiza pakulungulizya ivintu vyosi vivyo vibazyunguliye. Ane ne Mwene nanena.”

Yelemiya 22:24

U Mwene akuti, “Wee Yehoyakini, umwana uwa Yehoyakimu, u mwene uwa Yuda, nkulapa ukuti, napapo wabanga ngati mpete iya munyobe yane indilo, ngali nkakwefyamo.

Yelemiya 26:18

“U Mika uwa muchisu icha Molesheti akalaghulagha mukabalilo aka Hezekiya, u mwene uwa chisu icha Yuda akati, ‘U Mwene Uwamaka Ghosi ati: U Ziyoni akwiza pakulimiwa ngati mughunda, u Yelusalemu akwiza pakuba chisami, sona ighamba ilya Nyumba iya Chala likwiza pakuba ngati musitu.’

Yelemiya 4:20

Intamyo zikwiza pamwanya pantamyo; ichisu chosi chipela pakuba chisami. Lubilolubilo ivisakasa vyane vyananganika, pakabalilo akapimpa bulo, umwenda uwakuzighila ghukazepunkana.

Yelemiya 4:7

Inkalamu yafumila mumusitu, wepe uwakunangannya ivyisu anyamuka. Abulekite ubuzilo bwache umwakuti achinangannye ichisu chinyu. Utwaya twinyu utukulu tukwiza pakuba visami mumo mutakwikalamo abantu.

Yelemiya 50:12

akaya kinyu akakulu nkani kakwiza pakukoziwa isoni, po yuyo akabapapa akwiza pakusamuliwa. Kakwiza pakuba kabumalilo mubantu aba inko, kakwiza pakuba ngati mo muzi, ni chisu ichumizu, sona ngati yo nkolongo.

Yelemiya 7:34

Nkwiza pakukanizya ivyongo ivya lusekelo nivya buhobosu mutwaya utukulu nkani utwa Yuda sona na mumisebo iya mu Yelusalemu naku mazyu agha yuyo akusendiwa sona nu mwenesendwa pakuti ichisu chila chikwiza pakwipela chisami.’

Yelemiya 8:22

Nkimba ku Giliyadi ghutaliko u mulembo uwakupozezya? Nkimba ataliko nayumoyumo umughanga kulakula? Po nkimba choni chicho ivilonda ivya abantu bane vitakupola?

Yelemiya 9:11

U Mwene akuti, “Nkwiza pakumupela u Yelusalemu pakuba chisami, numwakughonamo abakambwe, sona utwaya utwa Yuda utukulu nkani tukwiza pakumongoliwa, umwakuti nayumoyumo u muntu akwiza pakwikalaghamo.”

Mika 3:12

Polelo pachifukwa icha mwemwe, u Ziyoni akwiza pakulimiwa ngati mughunda, u Yelusalemu akwiza pakuba chisami, sona ighamba ilya Nyumba iya Chala likwiza pakuba ngati musitu.

Zekaliya 11:1

Wee Lebanoni, ighula imilyango yako, umwakuti umoto ghughalungulizye amakwi ghako agha mwale.

Ukubelengiwa 32:1

Uluko ulwa Lubeni nulwa Gadi lukaba ni vitekwa ivyinji nkani po bakachennya ichisu icha Yazeli ni cha Giliyadi ukuti chikaba chiza pakudimilamo ing'ombe zyabo.

Ukukumbusya Amalamulo 3:25

Unyitikizye ukuti indoboke bulo ulusoko ulwa Yolodani nukuchennya ichisu icha mboto chicho chili kwisila, ichisu ichiza icha mumaghamba, sona na maghamba agha Lebanoni.”