Yelemiya 2:23 - IBAYIBOLO 2024

²³ “Nkimba unganena bulibuli ukuti, ‘Ntinyazizyepo, sona ntabiputitepo lumo aba Baala’? Ennya mumo ukabombela mwikombe, sona wennye nazizyo ukabomba. Wayana bulo ni ngamila inkolo yiyo yikuchimbilila uku na kula,

Yelemiya 2:23 Iomraidhean Croise

Esitele 8:16

Pakuti kakaba kabalilo akakuhoboka na kakusekela aka ba Yuda, po bakalya nukusekela nkani.

Masalimo 36:2

Pakuti akwizimbula mwene mumoyo wache umwakuti atangazyaghannya imbibi zyache nukuzibenga.

Masalimo 50:21

Wabomba ivintu vyosi vinivi, loli nkaba bulo myee, po ukinong'onagha ukuti injanite bulo nawe. Loli nkwiza pakukuchemela nukukususya pazizyo wabomba.

Ivyili 28:13

Umuntu yuyo akufisa imbibi zyache ivintu vitakumwendelagha akiza, loli yuyo akwilata imbimbi zyache nukuzileka akupokela ichisa.

Ivyili 30:12

Balipo bamo babo bakwiyennya bene pakuba bazelu mumoyo, loli batefizyemo imbibi zyabo.

Ivyili 30:20

Umu momumo umukolo umalaya akubombela, nanti alya akupuputa pamulomo nukuti, “Ntanangitepo nachimochimo ichibibi.”

Yelemiya 14:10

Umu momumo u Mwene akukunena nizya bantu aba akuti, “Bighanite nkani pakwendakwenda, batakuvikanizya ivinama vyabo. Po u Mwene atakubapokela sona akwiza pakubukumbuka ububibi bwabo nukubafunda pachifukwa icha mbibi zyabo.”

Yelemiya 16:10

“Bo ukubabuzya abantu banaba amazyu ghosi ghanagha po bakukulalusya bakuti, ‘Nkimba choni chicho u Mwene alamula ukuti ichintu ichipalapala ngati chinichi chituwile? Nkimba twananga ichoni? Fwandi twamubombela mbibi yoni u Mwene u Chala witu?’

Yelemiya 2:36

Nkimba choni chicho mukwisamula mwebene pakwendakwenda uku na uku? Aba Ijiputi bakwiza pakubakozya isoni ngati mumo aba Asiliya bakabombela.

Yelemiya 3:2

Ennya pamwanya pamaghamba. Nkimba buzilo boni bubo utabombeyepo ubwamalaya? Ukabalindilila abaghaniwa bako mulubazu muzila, ukikala mulubazu ulwa musebo ngati mu Alabu yuyo avwamiliye. Wachinyazya ichisu nu bwamalaya sona nu bubibi bwako.

Yelemiya 31:22

Nkimba mukwiza pakwendakwenda mupaka liyi, mwee bana bane basita busubiliwa? U Mwene akwiza pakupela ichintu ichipya pachisu ichapasi, umukolo weyuyo akumusungilila umwanavuli.”

Yelemiya 7:31

Bazenga ichitembe chicho chikwitiziwa ukuti Tofeti mwi Kombe ilya Beni Hinomu, ukuti bochelayeko abana abalumendo na balindu pamoto pakuba chakwiyipa ku bachala abayeni, ichintu chicho intakabalamulapo sona chicho chite na munyinong'ono zyane.

Yelemiya 9:14

Mubuzilo bwache bakonka amoyo ghabo amakafu, babiputa abachala babo aba Baala ngati mumo abanyenya babo bakabamanyizikizya.”

Hoseya 1:2

Bo u Mwene anda pakunenela mwa Hoseya akati, “Usende umalaya pakuba muchi wako, sona mupape nawe abana. Bope bakwiza pakuba bamalaya pachifukwa ichakuti ichisu chabomba ubwamalaya ubukulu nkani pakumupa u Mwene inkonto.”

Luka 10:29

Loli umumanyisi uwa Ndaghilo yula akalondagha pakwinena mwene pakuba mugholosu, po akamulalusya u Yesu akati, “Nkimba umupalamani wane wewenu?”

Aba Loma 3:19

Ilelo tuzimenye ukuti vyosi vivyo Indaghilo zikunena, zikunena nizya bantu babo bali pasi pa Ndaghilo, umwakuti patakabepo na pabulyeghelo napamopamo, sona nukuti bosi bakwiza pakulongiwa nu Chala.