Yelemiya 19:13 - IBAYIBOLO 2024

¹³ Inyumba izya mu Yelusalemu nizya bamwene aba mu Yuda zikwiza pakunyaziwa ngati nyumba izya ku Tofeti, pachifukwa ichakuti pa visonje ivya nyumba zinizi po papo bakochelaghapo utwakununkila ku bachala aba mumwanya sona bakupungulilapo ichakwiyipa icha vinyo ku bachala abanji.’ ”

Yelemiya 19:13 Iomraidhean Croise

2 Abamwene 17:16

Bakaghakana amalamulo ghosi agha Mwene u Chala wabo nukwipangila bene ivifwani ivya ngwata, ni chifwani icha Ashela. Bakazyiputa intondwa, sona bakamuchindika u Baala.

2 Abamwene 23:10

Akabunyazya ubuzilo ubwa Tofeti bubo bukaba mwi Kombe ilya Beni Hinomu, umwakuti patakabapo nayumoyumo yuyo akamubika umwana wache umulumendo pamo umulindu ukuti chibanje chakwiyipa kwa Moleki.

2 Abamwene 23:12

Akamongolannya ivighemo vivyo abamwene aba mu Yuda bakazenga pachisonje icha chipinda icha mumwanya icha Ahazi, sona ni vighemo vivyo u Manase akazenga muntanda zibili mu Nyumba iya Mwene. Akazyefyapo nukuzimongolannya pakuba litoyi nukulisumbila mwikombe ilya Kidiloni.

2 Abamwene 23:14

U Yosiya akanangannya sona amabwe amapaghuliwa ghala nukuwisizya pasi impanda izya Ashela nukwizuzya ubuzilo bosi bula na mafupa agha bantu.

Masalimo 74:7

Bakabocha ubuzilo bwako ubuzelu, babuwisizye pasi ubuzilo bwako nukubunyazya.

Masalimo 79:1

Wee Chala, abantu aba inko izinji binjiye muchisu icha bantu bako, bayinyazya inyumba yako izelu, sona bakapelite akaya akakulu nkani aka Yelusalemu pakuba chisami.

Yesaya 22:1

Agha gho mazyu aghabulaghuzi ghagho ghakunena nizya ikombe ilya chisetuka: Nkimba choni chicho chikubombiwa ilelo, ukuti mwebosi mukwele patusonje?

Yelemiya 19:12

Momumo nkwiza pakubombela nu buzilo ubu sona na bantu bosi babo bakwikala munumu. Nkwiza pakukapela akaya kanaka ngati kaya aka Tofeti.

Yelemiya 32:29

Abantu aba ku Babiloni babo bakulwa nakaya akakulu nkani aka bakwiza pakukocha numoto poka ni nyumba zyosi kuko abantu bakankalalizya bo bakumochela u Baala utwakununkila pamwanya pachisonje sona nukupungulila ichakwiyipa icha vinyo ku bachala abanji.

Yelemiya 44:18

Loli mumo tukalekela pakumochela u Mwene Umukolo Uwakumwanya, ichakwiyipa ichakocha ni vyakwiyipa ivya vinyo, tutakabitepo nachimochimo, twafwila kubwite sona nizala.”

Yelemiya 52:13

Akocha Inyumba iya Mwene ni nyumba iya bumwene sona ni nyumba zyosi izya mu Yelusalemu. Akocha sona inyumba zyosi izya abantu abapamwanya.

Yelemiya 7:18

Abana abanandi bakutenya inkwi, abanavuli bakupemba u moto, po abakolo bakukantannya ubusu ukuti bapiyile utuvibama utwakwiyipila kwa Mwene Umukolo Uwakumwanya. Bakupungula u vinyo wabo pakuba chakwiyipa ku bachala abanji ukuti bankalalizye.

Yelemiya 8:2

Ghakwiza pakunyampaniziwa kwizuba na kumwezi sona ni tondwa zyosi vivyo bavighanite nkani nukuvibombela sona vivyo bavikonka nukulabako amahala nukuvyiputa. Batakwiza pakughabungannya amafupa ghala pamo ukughasyila, loli ghakwiza pakuba muvundo pamwanya pitope.

Ezekiyeli 20:28

Bo nabinjizya muchisu chicho nkafingana nabo pakubapa sona bo bennya akaghamba pamo ikwi ilyakulemba amani, palapala bakabika ivyakwiyipa vyabo sona ni vyabupi vivyo vikankalalizya, nukubika ichakwiyipa icha utwakununkila poka ni chakwiyipa icha vinyo.

Zefaniya 1:5

Nkwiza pakubanangannya babo bakukwela pavisonje ivya nyumba pakwiputa izuba nu mwezi sona ni ntondwa. Nkwiza pakubazimizya babo bakufughama pasi, nukulapila mwitabwa ilya Mwene sona pakabalilo kanako bakulapila mwitabwa ilya chala u Moleki.

Imbombo 10:9

Indabi yache, bo bali muzila, sona bo bakupalamila mu Yopa, u Pitala akakwela pachisonje ukuti ipute bo izuba lili pamutu.

Imbombo 7:42

Po u Chala akabapa inkonto nukubavwituka ukuti biputaye bulo ni ntondwa izya kumwanya ukuyana namumo zisimbiliwe mwibuku ilya balaghuzi ukuti, ‘Mwee ba Izilayeli! Mutakangoghelagha nene ivinyamana vyinyu nukubika ivyabupi amaka 40 munkolongo?

Ukukumbusya Amalamulo 4:19

Nanti mwinusya amaso ghinyu kumwanya nukulyennya izuba nu mwezi ni ntondwa kokuti ivintu vyosi ivyamaka ivya kumwanya mutakadebiwanje pakuvifughamilila nukuvyiputa. Pakuti u Mwene u Chala winyu abapa abantu aba inko izinji izya muchisu ichapasi ivintu vinivi ukuti vibavwanje.