Yelemiya 18:18 - IBAYIBOLO 2024

¹⁸ Po abantu bakati, “Zagha tubatike pakumubombela ububibi u Yelemiya! Pakuti abaputi bakwiza pakuba naswe akabalilo kosi pakutulongozya, abamahala bakwiza pakutulongozya, sona abalaghuzi bakwiza pakulumbilila amazyu agha Chala. Zagha tumupe inongwa, sona tuleke pakuteghelezya zizyo akunena.”

Yelemiya 18:18 Iomraidhean Croise

2 Samuweli 15:31

U Devedi akabuziwa ukuti, “U Ahitofeli ali pakasi pabantu abakusambukila bala poka nu Abisalomu.” Po u Devedi akiputa akati, “Wee Mwene ughapele amahala agha Ahitofeli ukuti ghabe mapunganu.”

2 Samuweli 17:14

U Abisalomu poka naba Izilayeli bosi bakati, “Ifundo iya Hushayi umu Alikiti nyizapo ukuchila ifundo iya Ahitofeli.” Pakuti u Mwene akalondagha pakuyivulungannya ifundo inyiza iya Ahitofeli, umwakuti amuwisizye intamyo u Abisalomu.

1 Abamwene 22:24

Po u Zedekiya umwana uwa Kenana akapalamila nukumukoma u Mikaya nipi kumaso, po akamulalusya akati, “Nkimba umuzimu uwa Mwene wendite zila yoni, bo wepamo mumwane nukunena nawe?”

2 Imbili 24:21

Loli bakabatika nizya kumughogha u Zekaliya, sona bo u mwene alamula, bakamughogha na mabwe muntanda iya Nyumba iya Mwene

Yobu 5:13

Abantu abamahala akubalema ni chipingo icha buchevu bwabo, sona akuzimazya inyinong'ono zyabo inchevu.

Masalimo 21:11

Bakubatika pakukubombela imbibi, pamo nanti bakwivwana pakubomba ububibi, bakwiza pakupotwa.

Masalimo 52:2

Wee muzimbuli, akabalilo kosi ukwinong'ona nizya kubanangannya abanji, ululimi lwako luli ngati chipeni chicho chikwete nkani.

Masalimo 57:4

Indi pakasi pa nkalamu, sona indambalaye pakasi pa vinyamana ivyakoghofya. Banaba bo bantu babo bali na mino ngati zyo mpalala nu tulasilo, sona zyope indimi zyabo zikwete nkani ngati bapanga.

Masalimo 64:3

Bakupyasya indimi zyabo ngati bo bapanga, sona amazyu ghabo ghakulasa ngati tulasilo.

Ivyili 18:21

Ululumi luli na maka pakubupoka ubumi, pamo pakubughogha, sona babo balughanite bakwiza pakulya ivikomwa vyache.

Yesaya 32:7

Imbombo izya muntu umubibi mbibi, akubatika imbombo imbibi, pakubanangannya abapina nu bumyasi, napapo ukulambilizya ukwa basobelwe kugholosu

Yelemiya 1:19

Bakwiza pakulwa nawe, loli batakwiza pa kukupota, pakuti ane indi nawe, sona nkwiza pakukupoka. Ane ne Mwene nanena.”

Yelemiya 11:19

Nkaba ngati ne mwana uwa ng'ozi yuyo akubuka pakughoghiwa. Intakazimanya ukuti amaso ghosi ghali papane, bo bakunena ukuti, “Zagha tulidumule ikwi ili bo lichili libisi. Zagha tumughoghe ukuti itabwa lyache lizimile.”

Yelemiya 18:11

“Po ilelo buka ubabuzye abantu aba muchisu icha Yuda na babo bakwikala mu Yelusalemu uti, ‘U Mwene akuti: Nkwinong'ona pakubabombela ichintu ichibibi, sona nkwiyannya nukubatika zizyo nkwiza pakubabombela. Po umuntu wesi anyokeko ku zila zyache imbibi naku mbombo zyache zizyo akuzibomba. Leka inkalo zyinyu imbibi ni mbombo zyinyu.’

Yelemiya 18:19

Po nkiputa nkati, “Wee Mwene, unyivwe, ivwa zizyo abalwani bane bakunena.

Yelemiya 2:8

Abaputi batakalalusyapo ukuti, ‘Nkimba u Mwene ali kwiyi?’ Abamanyandaghilo batakamanya, abalongozi bakansambukila. Abalaghuzi bakalaghulila mwitabwa ilya chala u Baala, nukuvikonka ivifwani vivyo vite ni mbombo.”

Yelemiya 20:10

Nkubivwa abinji bakuteketa bakuti, “Ukoghofya kuli imbazu zyosi! Mumulongelele! Zagha tumulongelele!” Na bamanyani bane bosi bakulindilila ukuti ingwilemo bakuti, “Lumo angazimbuliwa, po tungamulema nukumutanizya ububibi.”

Yelemiya 26:11

Po abaputi na balaghuzi bakaghabuzya amakambala poka na bantu bosi ukuti, “Umuntu uyu abaghiye pakughoghiwa pachifukwa ichakuti akulaghula ububibi ubwa kaya akakulu nkani aka. Mwiyivwila na makutu ghinyu!”

Yelemiya 37:13

Loli bo afika pa Mulyango uwa Benjamini, umulindilili usongo uwa pamulyango, yuyo itabwa lyache akaba we Iliya umwana uwa Shelemiya, umwana uwa Hananiya akamulema umulaghuzi u Yelemiya nukunena ukuti, “Ukuchimbilila ku bantu aba ku Babiloni!”

Yelemiya 43:2

u Azaliya umwana uwa Hoshaya nu Yohanani umwana uwa Kaleya sona na banavuli bosi abamadinko bakamubuzya u Yelemiya bakati, “We mumyasi! U Mwene u Chala witu atakutumite pakutubuzya ukuti, ‘Mutakabukayeko ku Ijiputi pakwikala kulakula.’

Yelemiya 44:16

“Aswe tutakwiza pakuteghelezya amazyu ghagho watubuzya mwitabwa ilya Mwene!

Yelemiya 44:17

Nubwanaloli bosi tukwiza pakubomba chosi chicho tukanena ukuti tukwiza pakuchibomba. Tukwiza pakumochela utwakununkila u Mwene Umukolo Uwakumwanya nukumubikila ichakwiyipa icha vinyo ngati mumo aswe na banyenya na bamwene bitu na makambala ghitu tukabombela mutwaya utukulu utwa Yuda sona na mumisebo iya Yelusalemu. Pakabalilo kalakala tukaba ni chakulya ichinji nkani, sona tukaba akiza nkani, yitakabapo intamyo nayimoyimo.

Yelemiya 8:8

“ ‘Nkimba munganena bulibuli ukuti, “Aswe tuli namahala, pakuti tuli nu lulaghilo ulwa Mwene.” Loli mumanye ukuti abasimbi binyu bo babo basimbite izinji bulo zizyo zyabumyasi?

Nkuto 3:62

Awe ukivwa ukuteketa kosi ukwa balwani, sona namumo bakivwanilana pakumbombela ivibibi.

Ezekiyeli 7:26

Intamyo zikwiza pakuwila pantamyo izinji, sona imbili yikwiza pakuwila pa mbili iyinji. Bakwiza pakulonda ichisetuka ku mulaghuzi, loli ubumanyisi ubwa lulaghilo ulwa muputi lukwiza pakusobela, po abasongo batakwiza pakumanyisya sona amahala.

Aba Levi 10:11

Mubamanyisyanje aba Izilayeli amalamulo ghosi ghagho u Mwene akabapa ukwendela mwa Mozesi.”

Mika 3:6

Polelo ubusiku bukwiza pakubizila mutakwiza pakwennya ivisetuka, sona ichisi chabawila, mutakwennya ivyamuntazi. Izuba likwiza pakubinjilila abalaghuzi, sona umusanya ghukwiza pakubabela chisi.

Mika 3:7

Abakwennya ivyamuntazi bakwiza pakukoziwa isoni, bope abakulaghula bakwiza pakusamuliwa. Bakwiza pakuvwinka ivyeni vyabo, pachifukwa ichakuti u Chala atakubamula.”

Malaki 2:7

“Pakuti imbombo iya muputi yakusungilila ubumanyi ubwa Chala, sona abantu babaghiye bamanyilaye kukwache, pakuti yo ntumi iya Mwene Uwamaka Ghosi.

Luka 11:45

Umumanyisi uwa Ndaghilo yumo akati, “Mumanyisi, bo ukunena zinizi, ukututuka naswe bulo.”

Yohani 9:40

Aba Falisayi bamo babo bakaba nawe palapala bakivwa amazyu ghache nukumulalusya ukuti, “Nkimba ukung'anamula ukuti naswe bulo twe bafwamaso?”