Yakobo 1:27 - IBAYIBOLO 2024

²⁷ Ichiputo ichanaloli, chicho chite ni chilema pamaso pa Chala u Tata cho ichi: Ukubasungilila abana abalanda na bakolo abafwilwe muntamyo zyabo, sona nukwisungilila wemwene ukuti utakinyazyanje ni vintu ivya muchisu ichapasi.

Ulufingo Ulupya

²⁷ Ichiputo ichanaloli, chicho chite ni chilema pamaso pa Chala u Tata cho ichi: Ukubasungilila abana abalanda na bakolo abafwilwe muntamyo zyabo, sona nukwisungilila wemwene ukuti utakinyazyanje ni vintu ivya muchisu ichapasi.

Yakobo 1:27 Iomraidhean Croise

Masalimo 119:1

Basayiwa babo inkalo yabo yite ni chilema nachimochimo, babo bakwenda ukuyana nu lulaghilo ulwa Mwene.

Masalimo 146:9

U Mwene akubasungilila abayeni, sona akubavwa abana abalanda na bakolo abafwilwe, loli akubavulungannya abantu ababibi.

Masalimo 68:5

Uwise uwa balanda, sona nu muvighilili uwa bakolo abafwilwe, we Chala yuyo akwikala mu Nyumba yache izelu.

Yesaya 1:23

Abalongozi bako basambuke, sona baba bo bamanyani aba biba. Baghanite nkani pakupokela amabeko, sona akabalilo kosi bakulonda vyo vyabupi. Batakubavighilila abana abalanda, pamo pakuteghelezya inongwa izya bakolo abafwilwe.

Matayi 12:32

Umuntu wesi yuyo akumunenela u Mwana uwa Muntu ivintu ivibibi, akwiza pakuhobokeliwa. Loli umuntu wesi yuyo akumunenela u Muzimu Umuzelu ivintu ivibibi atakwiza pakuhobokeliwa nalumolumo ukwandila pakabalilo aka mupaka pakabalilo kako kakwiza.”

Matayi 5:8

Basayiwa babo bazelu mumoyo, pakuti bakwiza pakumwennya u Chala.

Luka 1:6

Bosi babili bakaba bantu abagholosu pamaso pa Chala nukukonka akiza indaghilo na malamulo ghosi agha Mwene.

Aba Loma 12:2

Mutakeghelelaye inkalo izya bantu aba muchisu ichapasi, loli mumwitikizye u Chala ukuti andule ubumi bwinyu pakubapa inyinong'ono impya. Po mungiza mumanye ubwighane ubwa Chala, mukwiza pakumanya chicho chiza, ni chakumuhobosya nkani, sona ni chakufikapo.

Aba Loma 2:13

Pakuti, bate bo babo bakwivwa bulo Indaghilo babo u Chala akubanena ukuti bantu bagholosu pamaso papache, loli babo bakubomba zizyo Indaghilo zikunena, bo babo u Chala akubanena ukuti bantu bagholosu pamaso pa Chala.

Aba Galatiya 1:4

U Kilisitu akiyipa mwene pachifukwa icha mbibi zyitu ukuti atupoke ku nkulilo iya mbibi iyi, ukuyana nu bwighane ubwa Chala witu, sona yuyo we Tata.

Aba Galatiya 3:11

Chili pabuzelu bulo ukuti nayumo umuntu yuyo u Chala akumunena pakuba mugholosu pantazi papache pakukonka Indaghilo, pakuti Amasimbo ghakuti, “Abantu abagholosu bakwiza pakuba nubumi ukwendela mu lwitiko.”

Aba Galatiya 5:6

Nanti tuli mwa Kilisitu u Yesu ukusilimuliwa pamo ukusita kusilimuliwa kute ni mbombo. Ichintu choka bulo chicho chapamwanya nkani lo lwitiko, lulo luli pambombo ukwendela mu lughano.

Aba Galatiya 6:14

Loli ane katalipo nakamo akakwituvikizyapo, loli chene ichipinjika icha Mwene u Yesu Kilisitu. Pakuti u Yesu akakomeliwa pachipinjika, umwakuyana bulo, ivintu ivya muchisu ichapasi vyakomeliwa kukwane, sona nane nkomeliwe ku vintu ivya muchisu ichapasi.

Aba Efeso 2:2

Pakabalilo kalakala mukikolezannya nivya muchisu ichapasi, sona mukakonkagha usongo uwa bulaghili ubwa mumwanyamwanya. Usongo yunuyu we muzimu umubibi, yuyo akubomba imbombo losi ulu pakasi pabantu babo batakumwivwila u Chala.

Ukukumbusya Amalamulo 14:29

umwakuti aba Levi, babo bate ni chigaba pamo ichilingo ichabo ni chabo, sona na bayeni, na balanda, na bakolo abafwilwe, babo bakwikala mutwaya twinyu bangalya vilavila nukwikuta. Po u Mwene u Chala winyu akwiza pakubasaya muvyosi vivyo mukubomba.

1 Timoti 1:5

Loli ifundo iyakubapela indaghilo izi yakuti abitiki bosi babanje nu lughano, lulo lukufuma mumoyo umuzelu nu mabyebye umwiza, sona nu lwitiko ulwenecho.

1 Timoti 5:4

Loli nanti umukolo umufwilwe ali na bana, pamo abizukulu, banaba bo babo babaghiye pakumanyila tasi ukumunyila u Chala munyumba zyabo. Pakubomba bunubu bakwiza pakubanyokezya abapapi na basekulu babo, zizyo bakapokela kukwabo, pakuti ichi chikumuhobosya nkani u Chala.

Titi 2:12

Ichisa ichi chikutumanyisya ukuti tuleke pakuba ni nkalo iyakusita ukumunyila u Chala, sona nukuti tuleke ivinyonywa ivya muchisu ichapasi. Chikutumanyisya sona ukuti tubanje bantu abakwilema, na bagholosu, sona na bakumuchindika u Chala mubumi bwitu ubwa muchisu ichapasi,

Yakobo 3:17

Loli amahala agha kumwanya, ichakwanda mazelu, na ghamutende, na mololo, sona na ghabumanyani. Ghizuye nu lupazikizyo, sona imbombo zyache nyiza, ghatakwennya icheni, sona ghate mazimbuli, awe.

Yakobo 3:9

Nu lulimi lunulu tukumupalizikizyapo u Mwene witu nu Tata, sona nu lulimi lulalula tukughunilapo abantu abanji, babo bapeliwe muchifwani icha Chala.

Yakobo 4:4

Mwe bantu mwe mute mwe basubiliwa mwee! Nkimba mutazimenye ukuti pakuba bamanyani aba chisu ichapasi, mukwipela mwebene pakuba balwani aba Chala? Abantu babo bakulonda pakuba bamanyani aba muchisu ichapasi bakwipela bene pakuba balwani aba Chala.

2 Pitala 1:4

Ichi cho chifukwa akatupa ivintu ivikulu nkani ni vyapamwanya, vivyo akatulayizya aswe, umwakuti namwe bulo mupone ivinyonywa ivya muchisu ichapasi, sona nukuti mupokele ubumi ubwa Chala.

2 Pitala 2:20

Nanti abantu bapona amaka agha vintu ivibibi ivya muchisu ichapasi, nukwanda pakumumanya u Mwene witu, sona nu Mupoki witu u Yesu Kilisitu, pisinda pache nukulemiwa nukupotiwa sona navyo, pabumalilo abantu banaba bakuba babibi nkani ukuchila namumo bakabela pakwanda.

2 Pitala 3:14

Polelo bamanyani bane abaghaniwa, bo mukulindilila isiku lila, muyezye nkani ukuti mubanje bantu abazelu na basita chilema nachimochimo pamaso pa Chala, sona mubanje mumutende nawe.

1 Yohani 5:18

Tuzimenye ukuti umuntu wesi yuyo mwana uwa Chala, atakwendelela pakubomba imbibi, pakuti u Mwana uwa Chala akumusungilila akiza umuntu yula, sona Umubibi yula atangamupalamasya.