Ubwandilo 2:2 - IBAYIBOLO 2024

² Pisiku lyaseveni u Chala akamalizya imbombo zyache zyosi zizyo akabombagha, akatuzya pisiku lyaseveni.

Ubwandilo 2:2 Iomraidhean Croise

Ubwandilo 1:31

U Chala akavyennya vyosi vivyo akapela ukuti vikaba vyiza bulo. Ubusiku bukamala, po indabindabi yikafika. Ili likaba lisiku lyasikisi.

Ubwandilo 2:3

Akalisaya isiku lyaseveni nukulipaghula pakuba lisayiwa, pakuti pisiku linili u Chala akatuzya pakubomba imbombo yache iyakupela ivintu vyosi.

Ukufuma 23:12

“Mubombaye imbombo zyinyu amasiku sikisi, loli pisiku ilyaseveni mutakabombaye imbombo, umwakuti ing'ombe zyinyu ni mpunda zyinyu zingatuzya, sona nukuti abazya na bayeni abamunyumba zyinyu bangatuzyako.

Ukufuma 31:15

Mubombaye imbombo amasiku sikisi, loli isiku ilyaseveni lyo Lisiku Ilyakutuzya, lilyo lisiku lipaghuliwa ilya Mwene. Umuntu wesi yuyo akubomba imbombo pisiku linili aghoghiwanje.

Ukufuma 31:17

“ ‘Chikwiza pakuba chimanyilo icha bwila na bwila pakasi papane naba Izilayeli pachifukwa ichakuti ane ne Mwene nene nkapela kumwanya ni chisu ichapasi amasiku sikisi, loli pisiku ilyaseveni nkaleka pakubomba, po nkatuzya.’ ”

Yesaya 58:13

“Nanti mukulisunga Isiku lyane Ilyakutuzya, nukusita ukubomba imbombo zyinyu pisiku lyane izelu, nanti mukwitizya Isiku lyane Ilyakutuzya lisiku ilya lusekelo, nukumuchindika u Mwene pisiku izelu, sona nanti mukulichindika ukusita ukwenda muzila zyinyu, nukusita ukubomba izyakwihobosya mwebene, pamo pakunena amazyu aghabulo,

Yohani 5:17

U Yesu akabamula akati, “U Tata akubomba imbombo akabalilo kosi, po nane bulo imbaghiye pakubomba imbombo.”

Ukukumbusya Amalamulo 5:14

loli isiku ilyaseveni lisiku Ilyakutuzya ilya Mwene u Chala winyu. Pisiku linilyo utakabombaye nayimoyimo imbombo manyi wewe manyi bana bako abalumendo manyi bana bako abalindu manyi bambombo bako abanavuli manyi bambombo bako abakolo manyi nkambaku zyako manyi mpunda zyako manyi vitekwa vyako vyosi manyi bayeni babo bakwikala mukaya kako, umwakuti abambombo bako bope batuzyanje ukuyana namumo ukutuzizya.

Aba Hebeli 4:10

Pakuti umuntu wesi yuyo akwinjila mubutuzyo ubwa Chala ubu, wepe bulo akutuzya imbombo zyache ukuyana namumo u Chala akatuzikizya imbombo zyache izya bupeli.

Aba Hebeli 4:4

Tuzimenye ukuti ichisu icha butuzyo chinichi chikabako kale pakuti nizya Lisiku Ilyakutuzya pabuzilo bumo Amasimbo ghakuti, “U Chala akatuzya kumbombo zyache zyosi pisiku ilyaseveni.”