Ubwandilo 19:25 - IBAYIBOLO 2024

²⁵ Akatuzimizya utwaya tula ni kombe lyosi, sona na bantu bosi aba mutwaya tula, poka ni vimelwa vyosi muchisu chilachila.

Ubwandilo 19:25 Iomraidhean Croise

Ubwandilo 13:10

U Loti akatalankannya nukwennya ukuti ikombe lyosi ilya Yolodani mupaka ku Zowala likaba na mizi aminji nkani. Ikombe lila likayana nu mughunda uwa Mwene pamo ichisu icha muvundo icha Ijiputi. Zinizi zikabombiwa pakabalilo kako bo nu Mwene achili atazimizizye akaya aka Sodomu naka Gomola.

Ubwandilo 13:12

U Abulamu akikala muchisu icha Kenani, loli u Loti akikala pakasi pa twaya utukulu nkani utwa mwikombe, po akazenga ivisakasa vyache papipi nu Sodomu.

Ubwandilo 14:3

Abamwene fayivi banaba bakapanga akabukatila koka poka na basilikali abanji bosi mwikombe ilya Sidimu ku Nyanja Imfwe.

Masalimo 107:34

Ichisu icha muvundo pakuba chisu icha mbeya, pachifukwa icha bantu ababibi, babo bakwikala mulamula.

Yesaya 13:19

Sona akaya akakulu nkani aka Babiloni, kako kaya aka buchindamu ubwa bumwene, abantu bakwituvya nu Babiloni. Loli ane ne Chala nkwiza pakumunangannya, ngati mumo nkamunanganizizya u Sodomu nu Gomola.

Yelemiya 20:16

Umuntu yunuyo abanje ngati twaya utukulu nkani, tuto u Mwene atakatupelela ichisa pakutunangannya. Ivwa ukulila ukwa pandabindabi, sona nipati ilya bwite pakasi pamusanya,

Yelemiya 23:14

Loli mu balaghuzi aba mu Yelusalemu nachennyamo ichintu ichakoghofya nkani. Bakulowa nukunena ubumyasi. Bakubavwa abantu pakubomba ububibi, umwakuti atalipo nayumoyumo uwakuleka pakubomba ububibi. Kukwane bosi banaba bali ngati we Sodomu, abantu aba mu Yelusalemu bali ngati we Gomola.”

Yelemiya 49:18

Ngati mumo u Sodomu nu Gomola akananganikila, poka nutwaya twache utupalamani po atalipo nayumoyumo uwakwikalamo, sona atalipo nayumoyumo umuntu uwakuzengamo. Ane ne Mwene nanena.

Yelemiya 50:40

Ngati mumo nkatunanganizizya utwaya utwa Sodomu nu Gomola, poka nutwaya twache utupalamani, Po atalipo nayumoyumo umuntu uwakwikalamo, sona atalipo nayumoyumo umuntu uwakuzengamo. Ane ne Mwene nanena.

Nkuto 4:6

Abantu bane bafundiwa nkani, ukuchila namumo bakafundiliwanga abantu aba mu Sodomu, Abantu banaba bakafundiwa mukabalilo akapimpa bulo sona patakabapo nayumoyumo umuntu uwakubavwa.

Ezekiyeli 16:50

Bakaba bakwikwezya nukubomba ivyamwiko pamaso papane. Polelo nkabanangannya ngati mumo wazyenezya.

Amosi 4:11

“Nkabanangannya abantu bamo pakasi pa papinyu, ngati mumo nkabananganizizya abantu aba mu Sodomu naba mu Gomola. Mukaba ngati ko kachizinka kako kazompoliwa pamoto, loli pope bulo mutakanyokela kukwane.” U Mwene anena.

Zefaniya 2:9

Polelo, ane ne Mwene Uwamaka Ghosi u Chala umumi uwa Izilayeli nkulapa nkuti, ‘Naloliloli ichisu icha Mowabu chikwiza pakuba ngati cha Sodomu, sona bope aba Amoni bakwiza pakuba ngati chisu icha Gomola. Vikwiza pakuba vibanka ivya mbeya ni visami bwila na bwila. Abantu bane abakusyalako bakwiza pakuchifyula ichisu chabo, abakupona aba inko yane bakwiza pakupyana ichisu chabo.’ ” U Mwene anena.

Ukukumbusya Amalamulo 29:23

Umuvundo ghukwiza pakumalamo mumaghunda ghinyu, sona ulufumbi lwene ni mbeya nu sulufule vikwiza pakuba posi na posi muchisu chinyu. Mumaghunda ghinyu mutakwiza pakumelamo nachimochimo ichimelwa manyi lisote manyi amakwi. Ichisu chinyu chikwiza pakuyana bulo nakaya aka Sodomu naka Gomola naka Adima naka Zeboyimu tuto u Mwene akatunangannya pachifukwa icha bukali bwache.

2 Pitala 2:6

U Chala akatufunda utwaya utwa Sodomu nu Gomola pakutuzimizya numoto, umwakuti chibanje chifwanikizyo icha vintu vivyo vikwiza pakubabonekela abantu babo batakumunyila u Chala.