Ubwandilo 18:21 - IBAYIBOLO 2024

²¹ Po nkulonda nike ukuti nennye nanti zizyo nivwa zyanaloli. Nanti zite zyanaloli, nkwiza pakuzimanya.”

Ubwandilo 18:21 Iomraidhean Croise

Ubwandilo 11:5

Po u Mwene akika kumwanya pakwennya akaya akakulu nkani, sona ni chitembe ichitali chicho abantu bala bakazengagha.

Ubwandilo 11:7

Zagha twike nukuvulungannya ineno yabo, umwakuti batakivwanaye bo bakunena.”

Ubwandilo 18:17

U Mwene akati, “Intangamuvinda u Abulahamu chicho nkulonda pakubomba.

Ubwandilo 6:12

U Chala akagha ukuti ichisu ichapasi chambibi, pakuti abantu bosi bakaba ni nkalo imbibi nkani.

Yobu 34:22

Kutaliko ichisi ichakoghofya, kuko ababomba mbibi bangavwamako.

Masalimo 14:2

Bo ali kumwanya u Mwene akubennya abantu pachisu ichapasi, umwakuti ennye nanti balipo bamo abantu abamahala, babo bakumulondelezya u Chala.

Masalimo 90:8

Wazivumbula imbibi zyitu pamaso papako, zyope imbibi izya kubusyefu wazivumbula pabuzelu

Ukufuma 3:8

Po nika pakubapoka munyobe izya bantu aba mu Ijiputi nukubefyamo muchisu chilachila nukubinjizya muchisu ichikulu nkani icha mboto mumo mukwikala aba Kenani naba Hiti naba Amoli naba Pelezi naba Hivi sona naba Yebusi.

Ukufuma 33:5

Pakuti u Mwene akamubuzya u Mozesi akati, “Ubabuzye aba Izilayeli uti, ‘Amwe mwe bantu aba moyo amakafu nkani. Nanti nkabukagha namwe, napapo po pakabalilo kanandi bulo ngali nabanangannya. Losi ulu vula ivyakwibonesekezya akiza, po nkwiza pakumanya ichakuti imbombe namwe.’ ”

Yelemiya 17:1

U Mwene akuti, “Imbibi iya ba Yuda yisimbiwe na kasimbilo aka chela, sona yisimbiwe pamoyo ghabo nibwe ilya dayimondi, na pampembe izya vighemo vyabo.

Yelemiya 17:10

“Ane ne Mwene nkwenelezya inyinong'ono, nukughupima umoyo, nkumupa umuntu umuvwalo ukuyana ni nkalo yache, sona ukuyana ni mbombo zyache.”

Yona 1:2

“Bukagha kukaya akakulu nkani aka Ninive nukulumbilila amazyu sona nukubasusya pachifukwa ichakuti nennya ububibi bwabo.”

Mika 1:3

Ennya! U Mwene akwiza ukufuma pabuzilo bwache ubwakwikalapo, akwika pasi nukwenda patunenela utwa maghamba.

Zefaniya 1:12

“Pakabalilo kalakala, nkwiza pakumulondelezya u Yelusalemu ni nyale nukubafunda babo bakwituvya, sona abantu babo bali navyo vyosi nukwisubila. U Mwene anena. “Abantu banaba bakwinong'ona ukuti, ‘U Mwene atakwiza pakubombapo chimo, ichiza pamo ichibibi.’

Luka 16:15

U Yesu akanena nabo akati, “Mwighanite pakwinena mwebene ukuti mwe bagholosu pamaso pabantu, loli u Chala aghamenye amoyo ghinyu. Pakuti chicho abantu bakuti chapamwanya nkani, pamaso pa Chala chite ni mbombo nayimoyimo.

Yohani 6:38

pakuti intikite kumwanya pakubomba ubwighane ubwane nu bwane, loli nizite pakubomba ubwighane ubwa yuyo akantuma.

2 Aba Kolinti 11:11

Po choni? Nkimba chifukwa ichakuti intabaghanite? U Chala umwenecho azimenye ukuti imbaghanite.

Ukukumbusya Amalamulo 13:3

amwe mutakabateghelezyanje. U Mwene u Chala winyu akubayela ukuti ennye nanti naloli mumughanite nu moyo winyu ghosi, sona nu muzimu winyu ghosi.

Ukukumbusya Amalamulo 8:2

Mukumbukaye namumo u Mwene u Chala winyu akabalongolela munkolongo amaka 40 pakubawisizya amayimba ukuti abayelaye umwakuti aghamanye amoyo ghinyu nanti mungaghakonka amalamulo ghache.

1 Aba Tesalonika 4:16

Pakuti u Mwene umwenecho akwiza pakwika kumwanya nukukolomoka ukukulu nkani, nizyu ilya wantumi usongo, sona nukulila ukwa ipati ilya Chala. Po abantu babo bakafwila mwa Kilisitu bakwiza pakuba bakwanda pakuzyuka.

Aba Hebeli 4:13

Pantazi pa Chala katalipo nakamo kako kafisiwe. Ivintu vyosi vili pabuzelu bulo, sona vili pa bwazi pantazi papache yuyo tubaghiye tumulingannye vyosi vivyo twabomba.

Yoshwa 22:22

“Uwamaka Ghosi we Chala! We Mwene! Uwamaka Ghosi we Chala! We Mwene! Achimenye ichifukwa chicho tukabombela bunubu, sona namwe bulo muchimanye! Nanti tukamusambukila u Mwene pachifukwa ichakusita kumwivwila, mutakatwitikizye ukuti tubanje nubumi.