Ubuvumbuli 5:14 - IBAYIBOLO 2024

¹⁴ Ivyabumi folo vila vikamula vikati, “Ameni!” Po abasongo bala bakawa pasi nukumwiputa u Chala nu Mwana uwa ng'ozi.

Ulufingo Ulupya

¹⁴ Ivyabumi folo vila vikamula vikati, “Ameni!” Po abasongo bala bakawa pasi nukumuchindika u Chala nu Mwana uwa ng'ozi.

Ubuvumbuli 5:14 Iomraidhean Croise

1 Aba Kolinti 14:16

Bo mukumupalizya u Chala nu muzimu winyu, nkimba umuntu yuyo ali poka namwe, anganena bulibuli ukuti, “Ameni,” pachifukwa icha nyiputo zyinyu zizyo mukumupalizya u Chala, bo atakumanya na chicho mukunena?

Ubuvumbuli 19:4

Abasongo 24 ni vipeliwa ivyabumi folo vikawa pasi nukumwiputa u Chala, yuyo akikala pachitengo icha bumwene bakati, “Ameni! U Chala apaliwanje!”

Ubuvumbuli 4:4

Ichitengo icha bumwene chila chikazyunguliliwa ni vitengo ivinji 24, sona babo bakikalagha pa vitengo vila bakaba abasongo 24. Bakavwala amenda amaswepu ni mpumpu izya golide kumitu yabo.

Ubuvumbuli 4:6

Pantazi pachitengo icha bumwene pakaboneka ulubinjilo lulo lukaba ngati yo nyanja iya galasi, yiyo yikanyezimilagha ngati lyo libwe ilya kilisitali. Pakasikasi, ukuzyungulila ichitengo icha bumwene, kulubazu losi pakaba ivipeliwa ivyabumi folo. Vikaba na maso kosi na kosi, kuntazi na kwisinda bulo.

Ubuvumbuli 5:11

Nkenelezya sona nukwivwa izyu ilya bantumi aba kumwanya, abasita ukubelengiwa. Bakimilila umwakuzyungulila ichitengo icha bumwene chila ni vipeliwa ivyabumi folo, sona na basongo bala.

Ubuvumbuli 5:6

Po nkennya u Mwana uwa ng'ozi pakasi pachitengo icha bumwene, azyunguliliwe ni vipeliwa ivyabumi folo na basongo 24. U Mwana uwa ng'ozi akabonekagha ngati aboliwe. Akaba ni mpembe seveni na maso seveni vivyo yo Mizimu seveni iya Chala, yiyo yitumiwe muchisu chosi ichapasi.

Ubuvumbuli 5:8

Bo apokela ibuku lila, ivipeliwa ivyabumi folo vila na basongo 24 bala bakawa pasi pamaso pa Mwana uwa ng'ozi. Wesi akalema ipango, ni mbako izya golide zyizuye nu twakufukizya utwakununkila, zizyo nyiputo izya bantu abazelu aba Chala.

Ubuvumbuli 7:12

Bakanena bakati, “Ameni! Amapalo nu muchizi nu buchindamu, na mahala nu bulaghili, sona na maka vya Chala witu bwila na bwila! Ameni!”