Titi 2:14 - IBAYIBOLO 2024

¹⁴ Akiyipa mwene pachifukwa icha sweswe ukuti atusatule ku bubibi bwitu bosi nukuti tubanje bantu bache abazelu, babo balweke pakubomba imbombo inyiza.

Ulufingo Ulupya

¹⁴ Akiyipa mwene pachifukwa icha sweswe ukuti atusatule ku bubibi bwitu bosi nukuti tubanje bantu bache abazelu, babo balweke pakubomba imbombo inyiza.

Titi 2:14 Iomraidhean Croise

Ubwandilo 48:16

Uwantumi yuyo akampoka ane kububibi bosi, abasaye abana babili banaba. Itabwa lyane ni tabwa ilya batata bane u Abulahamu nu Yisaki lyendelele pakubapo ukwendela mubana banaba. Bapapaye nkani, nukuba baluko ulukulu nkani.”

Masalimo 130:8

Po akwiza pakumutabula u Izilayeli kumbibi zyache zyosi.

Masalimo 135:4

Amusala u Yakobo pakuba wache nu wache, po amusala u Izilayeli pakuba bukabi bwache.

Ukufuma 15:16

Ulutente nubogha ubukulu nkani vyabawila. Pachifukwa icha maka ghako amakulu, abene bali myee ngati libwe mupaka abantu babo ukabatabula badumusannyepo.

Ezekiyeli 36:25

Nkwiza pakubanyafila amizi amiza, po mukwiza pakuswepa, nkwiza pakubaswefya ubunyazu bosi ubwa vifwani vyinyu vyosi.

Ezekiyeli 37:23

Batakwiza pakwinyazya nivifwani vyabo sona ivintu ivyamwiko pamo ukunanga kwabo, pakuti nkwiza pakubapoka kububibi ubwa kunyokela mwisinda, nukubaswefya. Bakwiza pakuba bantu bane, nane nkwiza pakuba ne Chala wabo.

Aba Levi 25:41

Pisinda pache abuliwanje poka na bana bache, po anyokelaye kubaluko lwache, kuko kuli ichilingo icha banyenya bache.

Malaki 3:3

Akwiza pakwikala pasi ngati wakusungunula nu wakuswefya u siliva, akwiza pakubaswefya aba Levi pakuba ngati we golide nu siliva. Po bakwiza pakuba bantu babo bakubika ivyabupi mubugholosu kwa Mwene.

Ukubelengiwa 25:13

Nkufinga nawe poka na baluko lwache ulufingo ulwa buputi ubwa bwila na bwila, pakuti akaba nu lweke pakumwiputa u Chala wache, sona nukuti akabika ichakwiyipa ichakupepesezya imbibi izya bantu.”

Ukubelengiwa 7:15

ni nkambaku inyana nu dubi weka sona na kadubi koka aka mwaka ghoka ukuti chibanje chakwiyipa ichakocha.

Matayi 1:21

Akwiza pakupapa umwana umulumendo nukumwita ukuti we Yesu, pakuti weyuyo akwiza pakupoka abantu kumbibi zyabo.”

Matayi 20:28

Ayane bulo nu Mwana uwa Muntu, pakuti atakiza ukuti bamubombelaye, loli pakubabombela nukubapa ubumi bwache ukuti abapoke abantu abinji.”

Matayi 3:12

Ali nuluselo munyobe zyache ulwakupetela ingano. Po akwiza pakubika ingano muntamba, loli ilyelelo likwiza pakochiwa numoto, ghugho ghutakuzimapo nalumolumo.”

Yohani 10:15

ukuyana bulo namumo Utata amanyiye, sona nane imumenye Utata, nkubutagha ubumi bwane pachifukwa icha ng'ozi zila.

Yohani 6:51

Ane ne chibama ichipela ubumi chicho chikika ukufuma kumwanya. Nanti umuntu wesi akulya ichibama chinichi, akwiza pakubangako bwila na bwila. Ichibama chicho nkwiza pakumupa gho mubili wane, chicho nkupa ukuti ichisu ichapasi chibanje nubumi.”

Imbombo 15:14

U Simoni alingannya bulo mumo u Chala akabasungilila abantu babo bate ba Yuda pakubapaghula abantu bamo mumwabo ukuti babanje bantu bache.

Imbombo 15:9

U Chala atakatulekannya nabo; akabahobokela imbibi zyabo, pachifukwa ichakuti bakasubila.

Imbombo 20:28

Po mwisungilile mwebene, sona nu mudimo ghosi ghugho u Muzimu Umuzelu abikite munyobe zyinyu. Mubanje mwe badimi aba chipanga icha Chala, chicho akachitabula ni banda ilya mwana wache.

Imbombo 9:36

Mu Yopa mukaba umumanyili umukolo yumo yuyo akaba we Tabita. (Itabwa lyache ilya mu Chigiliki bakuti Dolika, chicho chikung'anamula ukuti, “Imbabala.”) Akabalilo kosi akabombagha inyiza nukwavwa abapina.

Aba Galatiya 1:4

U Kilisitu akiyipa mwene pachifukwa icha mbibi zyitu ukuti atupoke ku nkulilo iya mbibi iyi, ukuyana nu bwighane ubwa Chala witu, sona yuyo we Tata.

Aba Galatiya 2:20

Nkomeliwe pachipinjika poka nu Kilisitu. Po inte nene yuyo mumi, loli we Kilisitu. Ubumi bubo nkwikala muchisu ichapasi, nkwikala ukwendela mu lwitiko mu Mwana uwa Chala, yuyo anganite nukufwa pachifukwa icha nene.

Aba Galatiya 3:13

U Kilisitu akatutabula ku nguno iya Ndaghilo umwene pakuba nguno mubuzilo bwitu, pakuti Amasimbo ghakuti, “Mughuniwa umuntu wesi yuyo apayikiwe pikwi.”

Aba Efeso 1:11

Ivintu vyosi vikubombiwa ukuyana na kabatikile na kadumulile aka Chala. U Chala akatusala mwa Kilisitu ukuti tubanje bantu abache na bache. Pakuti iyi yikaba yo fundo yache, ukuyana namumo akadumulila po pabwandilo.

Aba Efeso 2:10

Pakuti twe vimatiwa ivya Chala, yuyo akatupela ukwendela mwa Kilisitu u Yesu ukuti tubombe imbombo inyiza zizyo akatuyanizya zila ukuti tuzibombaye.

Aba Efeso 5:2

Mubanje nu lughano ukuyana namumo u Kilisitu akatughanila nukwiyipa ubumi bwache pakuba chabupi ichakununkila, sona ni chakwiyipa ichakumuhobosya u Chala.

Ukukumbusya Amalamulo 14:2

pakuti amwe mwe bantu abazelu aba Mwene u Chala winyu. U Mwene abasalite amwe pakasi pabantu aba inko izinji zyosi izya muchisu ichapasi ukuti mubanje bache na bache.

Ukukumbusya Amalamulo 26:18

Ilelo u Mwene itika ukuti amwe mwe bantu abache na bache, ukuyana namumo akabalayizizya, nanti mukughakonka amalamulo ghache.

Ukukumbusya Amalamulo 4:20

Loli ukunena nizya amwe, u Mwene akabefyamo mu Ijiputi, muchiliba ichakwaka umoto, umwakuti mubanje mwe bantu abache na bache. Umu momumo mubeleye ilelo.

Ukukumbusya Amalamulo 7:6

Pakuti amwe mwe bantu abache na bache aba Mwene u Chala winyu. U Mwene akabasala amwe pakasi pabantu bosi aba muchisu ichapasi ukuti mubanje bantu bache.

1 Timoti 1:15

Agha gho mazyu aghanaloli, ghagho ghabaghiye pakwitikiziwa nukusubiliwa: U Kilisitu u Yesu akiza muchisu ichapasi pakupoka abambibi. Po ane mumwabo nkaba ne mubibi ukuchilapo.

1 Timoti 2:10

Loli bilanjizyanje bene ni mbombo inyiza zizyo bakubomba, pakuti abakolo babo bakumwiputa u Chala babombaye bunubu.

1 Timoti 2:6

Akiyipa mwene ukuti abasatule abantu bosi. Ichi chikaba chisimikizyo pakabalilo kache akiza.

1 Timoti 6:18

Ubabuzye ukuti babombaye imbombo inyiza, nukuba bakabi mumbombo inyiza, nukusita pakuba bamama, sona nukwiyannya pakugabana ivintu vyabo na bantu abanji.

Titi 2:7

Muvintu vyosi, awe ubanje we chifwanikizyo icha nkalo inyiza. Bo ukumanyisya, umanyisyanje nu moyo uwanaloli, sona nu muchizi.

Titi 3:8

Amazyu agha masubiliwa. Nkulonda ukuti udidimizyepo pavintu vinivi, umwakuti abantu babo bakumusubila u Chala babanje bakwikolezannya pakubomba imbombo inyiza, zizyo nyiza, sona zikubavwa abantu bosi.

Aba Hebeli 1:3

U Mwana ko kulama ukwa buchindamu ubwa Chala, sona ichifwani ichenecho icha Chala. Umwene achilemite ichisu chosi na mazyu ghache aghamaka. Bo efya imbibi izya bantu, akikala pachitengo ichamuchizi kunyobe indilo iya Chala Uwamaka Ghosi.

Aba Hebeli 10:24

Zagha twinong'onelanaye namumo tungakazanizannya, pakughanana sona nukubombelana ubwiza.

Aba Hebeli 9:14

Po ibanda ilya Kilisitu, yuyo ukwendela mu Muzimu uwa bwila na bwila, akiyipa mwene ukuti chibanje chakwiyipa ichakufikapo kwa Chala likwiza pakuswefya umabyebye witu pambombo izyabulo, umwakuti tungamubombela u Chala umumi.

Yakobo 4:8

Palamila kwa Chala, po wepe akwiza pakupalamila kukwinyu. Ozya inyobe zyinyu mwe bantu bambibi mwee! Suka amoyo ghinyu, amwe mwe amoyo ghinyu ghali mumwanyamwanya bulo!

1 Pitala 1:18

Pakuti muzimenye ukuti mukasatuliwa kunkalo zyinyu imbibi zizyo mukapyana ku banyenya binyu. Amwe mutakasatuliwa ni vintu vimo vivyo vikunanganika ngati we siliva pamo ugolide.

1 Pitala 1:22

Pakuti ilelo mwiswefya mwebene pakwivwila ubwanaloli, umwakuti mukubaghana abitiki abamwinyu. Po mughananaye mwebene nu moyo winyu ghosi.

1 Pitala 2:12

Inkalo yinyu pakasi pabantu abakuzi yibanje nyiza nkani, umwakuti bo bakubatamantila ukuti mwe bantu ababibi, bazyaghannye imbombo zyinyu inyiza. Po bakwiza pakumuchindika u Chala pisiku ilya kwiza kwache.

1 Pitala 2:9

Loli amwe mwe luko ulupaghuliwa, abaputi aba bumwene, abantu abache na bache aba Chala. Akabasala ukuti mulumbilile imbombo izyakuswighisya izya Chala, yuyo akabefyamo muchisi nukubinjizya mu lukozyo lwache ulwakuswighisya nkani.

1 Pitala 3:18

Pakuti u Kilisitu akafwa lyoka mpela pachifukwa icha mbibi izya bantu bosi, umugholosu pakubafwila abasita bugholosu, umwakuti atufisye pamaso pa Chala. Pakunena nizya mubili wache akafwa, loli akazyuka kubufwe mumuzimu.

1 Yohani 1:7

Loli nanti tukwenda mu lukozyo, ukuyana namumo abeleye mu lukozyo, kokuti tuli mubupoka twebenebene, sona ibanda ilya Yesu u Mwana wache likutuswefya aswe imbibi zyosi.

1 Yohani 1:9

Loli nanti tukwitika imbibi zyitu, u Chala umwenecho yuyo musubiliwa sona mugholosu, akwiza pakutuhobokela imbibi zyitu. Akwiza pakutuswefya ububibi bwitu bosi bubo tukubomba.

1 Yohani 3:2

Mwee bamanyani bane abaghaniwa, ilelo aswe twe bana aba Chala, loli chichili chitavumbuliwe namumo tukwiza pakubela. Loli bo akwiza, tuzimenye ukuti tukwiza pakuyana nawe, pakuti tukwiza pakumwennya mumo abeleye.

Ubuvumbuli 1:5

Ichisa chinichi chikufuma kwa Yesu Kilisitu, ukaboni umusubiliwa uwakwanda pakuzyuka kubufwe, sona yuyo we umulaghili uwa bamwene bosi aba muchisu ichapasi. U Mwene atughanite aswe, sona atwabuye kumbibi zyitu ni banda lyache.

Ubuvumbuli 5:9

Bakimbagha ulwimbo ulupya bakatinji, “Awe ubaghiye pakusenda ibuku ilyakunnyengiwa nukumamatula ivimatilo vyache. Pakuti ukaboliwa, sona ni banda lyako, ukamughulila u Chala abantu abaluko losi, na baneno zyosi, sona ninko zyosi izya bantu.