Nkuto 1:6 - IBAYIBOLO 2024

⁶ Ubuchindamu ubwa kaya akakulu nkani aka Yelusalemu bwepamo. Abalongozi bache baba ngati zyo mbabala, babo batakulyagha nalimolimo isote iteta, sona badedebaye nkani bo abalwani babo bakubachimbizya.

Nkuto 1:6 Iomraidhean Croise

2 Abamwene 19:21

Agha gho mazyu ghagho u Mwene akamubuzya umwakumususyannya nawe akati, ‘Abantu aba mu Ziyoni, bakukusamula nukukobezya awe. Abantu aba mu Yelusalemu bakupukunnya imutu yabo bo ukuchimbila.

2 Abamwene 25:4

Ilinga ilya kaya akakulu nkani kala likamongoliwa. Napapo abantu aba mu Babiloni bakakazyungulila akaya akakulu nkani kala, abasilikali bosi bakachimbila pabusiku. Bakafumila ku mulyango uwa pakasi pavibumba vibili, papipi nu mughunda uwa mwene, bakachimbilila kwikombe ilya Alaba,

2 Abamwene 25:5

loli abasilikali aba mu Babiloni bakamuchimbizya u mwene nukumulema mumakombe agha Yeliko. Abasilikali bache bosi bakamutoloka nukunyampana.

Masalimo 50:2

U Chala akulama bo ikaye mu Ziyoni, akaya akakuboneka akiza nkani.

Masalimo 96:9

Mumwiputaye u Mwene, yuyo muchindamu, sona muzelu, Wee chisu chapasi, tetemagha pamaso papache. Ichisu ichapasi chikalanite nkani, sona chitangayingana.

Yesaya 1:21

Ennya akaya akakulu nkani akasubiliwa kabeleye, pakuba kaya aka bamalaya, kale kakabombagha ubwanaloli, sona ubugholosu bukaba mulamula loli ilelo kizuye na baghoghi!

Yesaya 12:6

Mwee bantu aba mu Ziyoni kolomokagha nukwimba umwakughoboka! Pakuti Umuzelu uwa Izilayeli weyuyo mukulu, pakasi papinyu.”

Yesaya 4:5

Po u Mwene akwiza pakubika ibingu pamwanya pabuzilo bosi ubwa pighamba ilya Ziyoni na pamwanya pachilundilo chache, pamusanya akwiza pakubavwinka ni bingu ilya lyosi ubusiku nutulabi utwakulama utwa moto. Pamwanya pabuchindamu pakwiza pakuba ichakuvwinka.

Yelemiya 13:18

“Umubuzye u mwene nu nyina uti, ‘Ika pa vitengo vyinyu ivya bumwene, pakuti impumpu zyinyu izya buchindamu, zyavuliwa kumitu yinyu.’

Yelemiya 29:4

U Mwene Uwamaka Ghosi, u Chala uwa Izilayeli, akubabuzya abantu babo bakasendiwa mu Yelusalemu pakubuka nabo kubuzya ku Babiloni ukuti,

Yelemiya 47:3

Bakwiza pakwivwa ichongo icha falasi bo zikuchimbila bakwiza pakwivwa ukuchimbila ukwa ngolo izya balwani sona nukulila ukwa vingelengele vyabo. Abawise batakwiza pakwennya sona kwisinda ukuti babavwe abana babo, inyobe zyabo zitakwiza pakuba namaka naghamoghamo.

Yelemiya 48:41

Akaya akakulu nkani aka Keliyoti kakwiza pakulemiwa, sona amalinga ghakwiza pakufyuliwa. Pisiku lilalila amoyo agha basilikali aba Mowabu ghakwiza pakuba ngati moyo uwa mukolo yuyo ali pakusayiwa.

Yelemiya 52:11

Pisinda pache akamukolompola u Zedekiya amaso ghache nukumupinya ni mpingu izya mukuba nukubuka nawe ku Babiloni. U Zedekiya akikala mujele mupaka pisiku lilyo akafwila.

Yelemiya 52:13

Akocha Inyumba iya Mwene ni nyumba iya bumwene sona ni nyumba zyosi izya mu Yelusalemu. Akocha sona inyumba zyosi izya abantu abapamwanya.

Ezekiyeli 24:21

‘Babuzye aba Izilayeli ukuti u Mwene Uwamaka Ghosi ati: Indi papipi pakubunyazya ubuzilo bwane ubuzelu bubo mukwituvikizyapo, ukuhoboka ukwa maso ghinyu, na chicho mukubikilapo umoyo. Po abana binyu abalumendo na balindu babo mukabaleka kwisinda mu Yelusalemu bakwiza pakufwila kubwite.

Ezekiyeli 24:25

“Po wee mwana uwa muntu, pisiku lilyo nkwiza pakufyula ilinga lyabo, ulusekelo lwabo nu buchindamu bwabo, ivyakuhobosya mumaso ghabo, na vivyo babikitepo umoyo wabo, sona na bana babo abalumendo na balindu.

Ukukumbusya Amalamulo 28:25

U Mwene akwiza pakubitikizya abalwani binyu ukuti babapote. Bo mukwiza pakulwa nabo ubwite mukwiza pakwenda izila yoka, loli mukwiza pakubachimbila pakwenda izila seveni. Po abamwene bosi aba muchisu ichapasi bakwiza pakuba nubogha bo bakwennya zizyo zyabawila.

Ukukumbusya Amalamulo 32:30

Nkimba choni chicho umuntu weka akabachimbizya abantu 1,000 pamo abantu babili ukubachimbizya abantu 1,000? Ichi cho chifukwa Ilyalabwe lyabo lyabaleka bene, sona u Mwene wabo uwamaka abaghulizya.