Nkuto 1:16 - IBAYIBOLO 2024

¹⁶ “Ichi cho chifukwa nkulila sona amasozi ghatakukamuka mumaso ghane. Atalipo nayumoyumo uwakunsangalusya, sona nayumo umuntu uwakunkazya. Abana bane baba balanda, pachifukwa ichakuti abalwani bitu batupota.”

Nkuto 1:16 Iomraidhean Croise

Masalimo 106:42

Abalwani babo bakabayivya nkani, umwakuti bakaba pasi pabulaghili bwabo.

Masalimo 119:136

Amaso ghane ghakukupula amasozi, pachifukwa ichakuti ululaghilo lwako lutakusungiwa.

Masalimo 69:20

Umusamu ghunughu wanvulazya nkani mumoyo, sona na maka ghope ghangwiliye. Nkalondagha nkani ngali umuntu yumo ampelele ichisa, loli intakamwaghapo nayumoyumo. Nkalondagha nkani ngali abantu bansangalusya, loli atakabapo umuntu nayumoyumo.

Umulumbilili 4:1

Nkaghennya sona amayimba ghagho ghakaba pachisu ichapasi. Nkaghennya amasozi agha bantu abakuyiviwa, po bate nu wakubasangalusya. Abakubayivya bakaba na maka nkani, sona bate nu wakubasangalusya.

Yesaya 54:11

U Mwene akuti, “Wee Yelusalemu we kaya akakulu nkani akakuyimba, kako kate nu wakukasangalusya, nkwiza pakukuzenga na mabwe amiza pakuluzenga ulwalo lwache, na mabwe agha safile.

Yelemiya 13:17

Loli nanti mutakuteghelezya, nkwiza pakubalilila kubusyefu, pachifukwa icha mituvyo ghinyu, amaso ghane ghakwiza pakulila nkani, ghakwiza pakwizula namasozi pachifukwa ichakuti ing'ozi izya Mwene zili mubuzya.

Yelemiya 14:17

Ubabuzye amazyu agha uti, ‘Amaso ghane ghakwiza pakwizula na masozi, pabusiku na pamusanya umwakusita kulekapo, pakuti abantu bane abasaliwa bavulaziwa nkani, sona bali ni vilonda.

Yelemiya 15:5

Wee Yelusalemu, nkimba wewenu yuyo angakupelela ichisa? Nkimba wewenu yuyo akwiza pakukulila? Fwandi wewenu yuyo atakwiza pakukulalusya nizya bumi bwako?”

Yelemiya 8:18

Ukubaba ukwa moyo wane kute numulembo naghumoghumo, umoyo wane wawa amaka.

Yelemiya 9:1

Mwee, nalondagha nkani ukuti u mutu wane ghube ngati mbwibi iya mizi nukuti amaso ghane ghabe ngati chiziba icha masozi! Umwakuti ngali nalila umusanya nubusiku pachifukwa icha bantu bane babo baghoghiwe.

Yelemiya 9:10

Nkwiza pakukolomoka nukughalilila amaghamba sona nkwiza pakuyifwifwitila inkolongo, pachifukwa ichakuti ukwakudimako kwananganika. Kwaba chisami sona batakwendako ukumota ukwavitekwa kutakwivwikako. Iviyuni ni vinyamana vyachimbilamo.

Yelemiya 9:21

Imfwa yatwizila ukwendela mumabwindo ghitu, yinjila munyumba izya bumwene. Yatughoghela abana bitu mumisebo, sona yatumalila abalumendo bitu muminalo.

Nkuto 1:2

Pabusiku akulila nkani, sona amasozi ghatakumala mumasaya ghache. Atalipo nayumoyumo uwakumusangalusya pakasi pa baghaniwa bache bosi. Abamanyani bache bosi bamusambukiye, sona baba balwani bache.

Nkuto 1:9

Ubunyazu bwache bukakatiye pamenda ghache, pakuti atakinong'onelaghako nizya lufundo lwache. Ukunanganika kwache kukaba kwakoghofya nkani, umwakuti patakabapo uwakumusangalusya. “Wee Mwene, ennya amayimba ghane, pakuti abalwani bane bampota.”

Nkuto 2:11

Amaso ghane ghizuye pachifukwa icha kulila, sona mukasi muli ubwite. Ghope umoyo wane wavulala, pachifukwa ichakunanganika ukwa bantu bane. Pakuti abana na babonda bakuzililika mumisebo iya kaya akakulu nkani.

Nkuto 2:18

Amoyo agha bantu ghakumulilila u Mwene! Mwee bakolo aba mu Yelusalemu, leka amasozi ghinyu ghendaye pabusiku na pamusanya ngati zyo soko, Mutakatuzyanje, sona amasozi ghinyu ghatakalekaye, awe.

Hoseya 9:12

Napapo bangabalela abana, nkwiza pakubasenda. Chighune nkani ku bantu banaba, bo nepukako kukwabo!