Nehemiya 9:25 - IBAYIBOLO 2024

²⁵ Bakatufyula utwaya utukulu nkani utwa malinga ni chisu chabo icha mboto, ni nyumba zyabo inyizule ni vintu ivyiza ivyakulekanalekana ni viziba ivikumbe na maghunda ghabo agha mampesya na makwi agha misyunguti sona na makwi agha seke. Bakalyanga nukwikuta, sona bakina nkani. Bakilaghagha nkani ivintu vyosi ivyiza vivyo ukabapanga.

Nehemiya 9:25 Iomraidhean Croise

1 Abamwene 14:9

Awe wabomba imbibi inkulu nkani ukubachila abantu babo bakabako kale. Wipangiye wemwene abachala abanji, ni vifwani ivya chela. Bunubu wankalalizya nkani, sona wampa inkonto.

1 Abamwene 8:66

Pisiku ilya 15 u Solomoni akababwezya abantu bala. Bope abantu bala bakamulagha u Solomoni nu lusayo, po bakabwela bo bahobokite nkani nukusekela pachifukwa icha vintu ivyiza vyosi vivyo u Mwene akamubombela umubombi wache u Devedi, poka na bantu bache aba Izilayeli.

Nehemiya 9:35

Napapo bakilaghilagha bene nukwilagha ivintu ivyiza muchisu ichikulu ni chamboto chicho ukabapa, pope bulo batakakubombela pamo ukuleka imbombo zyabo imbibi.

Masalimo 105:44

Akabapa ichisu icha bantu aba inko izinji, po bakachisenda pakuba mpyana yabo, ichisu chicho abantu abanji bakayimbilapo.

Masalimo 65:11

Umwaka mukughuvwinka nu bwiza bwinyu, kosi kuko mukwenda mukwaghiwamo ivintu ivyinji nkani.

Ivyili 30:9

Pakuti nanti naba mukabi nkani, nkwiza pakwikuta nukwanda pakukukana, pamo nanti naba mupina nkwiza pakwiba ivya bantu po nkwiza pakulinyazya itabwa ilya Chala wane.

Yesaya 6:10

Po akambuzya akati, “Ughapelaye amoyo agha bantu banaba ukuti ghabanje makafu, amakutu ghabo ghabanje namapuli, ubapelaye ukuti babanje bafwamaso, ukuti lumo bangennya na maso ghabo pamo ukwivwa na makutu ghabo, sona nukuvwisya na moyo ghabo, ukuti bapinduke nukupola.”

Yesaya 63:7

Nkwiza pakuchinenagha ichisa icha Mwene, nkwiza pakumupala pambombo zizyo abomba, ukuyana nazizyo atubombela, ivintu ivyinji ivyiza, ababombela aba Izilayeli, ukuyana ni chililizi chache, sona ni chisa chache ichikulu.

Yelemiya 2:7

Nkabinjizya muchisu icha muvundo ukuti mulyanje ivikomwa ivyiza sona nivyiza vyosi. Loli mukinjila nukuchinyazya ichisu chane chicho nkabapa nukuchipela pakuba chinyazu.

Yelemiya 31:14

Nkwiza pakubikutizya abaputi ni vyakulya ivyinji, sona abantu bakwiza pakubizuzya na vyosi vivyo bakuvilonda. Ane ne Mwene nanena.”

Yelemiya 32:23

Bakinjila nukuchifyula ichisu chila loli batakakwivwila pamo ukukonka indaghilo zyako, batakabomba zizyo ukabalamula ukuti babombaye. Po ukabawisizya intamyo zyosi zinizi.

Ezekiyeli 20:6

Pisiku lilalila nkalapa kukwabo ukuti nkwiza pakubefyamo muchisu icha Ijiputi nukubabika muchisu chicho nabalondela, ichisu ichamboto, ichisu ichiza nkani pavyisu vyosi.

Daniyeli 11:24

Umwalubilolubilo akwiza pakulwa ubwite ni vigaba ivikabi, akwiza pakubomba ichintu chicho abawise pamo abanyenya bache batabombite nalumo. Akwiza pakubagabila abantu bache ivintu vivyo akavifyula pabwite, sona na vivyo akasenda. Akwiza pakwiyannya pakukalema akaya akakulu aka ilinga, zinizi zikwiza pakubombiwa pakabalilo akanandi nkani.

Hoseya 13:6

Bo nabalyesya, bakikuta nkani. Bo bikuta bakanda pakwituvya, po bakanduvya.

Hoseya 3:5

Loli bo pachilapo akabalilo aba Izilayeli bakwiza pakunyokela nukumulondelezya u Mwene u Chala wabo, sona nu Devedi u mwene wabo. Bakwiza kwa Mwene bo bakutetema umwakuti bapokele ubwiza bwache ubwa bumalilo.

Aba Loma 2:4

Nkimba awe ukuchisula ichisa ichikulu icha Chala, ubufisalyoyo bwache, sona nu buchimyeka? Nkimba utazimenye ukuti u Chala uwa chisa pakuti akuyezya pakukulongozya ukuti upinduke nukuzileka imbibi zyako?

Ukukumbusya Amalamulo 3:5

Utwaya tosi utukulu nkani tunutu tukaba nu lupaso ulutali nkani, sona tukaba ni milyango iyakwighaliliwa ni mpingwi. Tukabapo sona utwaya utwinji tuto tutakaba nu lupaso.

Ukukumbusya Amalamulo 32:13

Akabavwa ukuti balaghilaye ivyisu ivya mumaghamba, sona bakalyanga ivimelwa ivya mumaghunda. Akabalyesya ubuchi ubwa mumpako izya mabwe, na mafuta ghagho ghakafumagha mumabwe.

Ukukumbusya Amalamulo 32:14

Akabang'wesya ulukama lwang'ombe nulwa ng'ozi, akabalyesya inyama iya ng'ozi niya mbuzi inyine. Akabalyesya inyama inyiza nkani iya badubi aba ku Bashani, ni ngano inyiza nkani nu vinyo umunoni.

Ukukumbusya Amalamulo 32:15

Aba Izilayeli bakaba bakabi nkani, loli bakunsambukila. Bakina nkani, sona bakalya nukuvimbilwa. Pisinda pache bakamuleka u Chala wabo yuyo akabapela, nukulikana Ilyalabwe, yuyo Mupoki wabo.