Nehemiya 2:5 - IBAYIBOLO 2024

⁵ po nkamwamula nkati, “Wee mwene wane, nanti chingakuhobosya, sona nanti ungampelela ichisa ne mubombi wako, unyitikizye ukuti imbukaye kukaya akakulu nkani mu Yuda, kuko kuli amapumpa agha banyenya bane umwakuti nkazenge sona akaya akakulu nkani kala.”

Nehemiya 2:5 Iomraidhean Croise

2 Samuweli 14:22

U Yowabu akafughama, bo icheni chache chikotamiye pasi, nukumusaya u mwene. U Yowabu akati, “Ilelo ane ne wambombo wako inzimenye ukuti wampelela ichisa, pakuti witika ukulaba kwane.”

Ezila 5:17

Wee mwene, losi ulu nanti chingakuhobosya, ubalamule abantu ukuti balondelezye mumabuku agha mbili iya bumwene ubwa Babiloni, wennye nanti u mwene u Sayilasi atakabika ululaghilo ulwakuti Inyumba iya Chala iyi yizengiwe sona mu Yelusalemu. Po wee mwene, utumanyisye zizyo ukwiza pakudumula pafundo yiniyi.

Nehemiya 2:4

U mwene akandalusya akati, “Nkimba ukulonda pakundaba ichoni?” Nkiputa kwa Chala uwakumwanya,

Nehemiya 2:6

Palapala u mwene yula, bo umuchi wache ikaye palubazu, akandalusya akati, “Nkimba ukwiza pakumalako amasiku malinga, sona ukwiza pakunyokako liyi?” Nkamubuzya akabalilo kache akenecho, po akanyitikizya ukuti imbukaye.

Esitele 1:19

“Wee mwene, nanti chingakuhobosya, sona nanti ungitikizya, usimbe ululaghilo mu ndaghilo izya Peleziya, nizya Mediya, lulo lutanganduliwa ulwakuti u Vashiti atakize nalumolumo pamaso papako we mwene u Ahaziwelo. Po umupanje ichitengo chache umuntu uyunji yuyo mwizapo ukumuchila.

Esitele 5:8

Wee mwene, nanti wampelela naloli ichisa nukukwanilisya zizyo nkulaba, awe poka nu Hamani indabi mwize kulusekelo lulo nkwiza pakubayanizizya amwe. Po nkwiza pakukwamula zizyo ukundalusya.”

Esitele 7:3

Po u Esitele akamula akati, “Wee mwene, nanti naloli wampelela ichisa sona nanti ungahoboka nacho, chicho nkulaba ichakuti imbanje nubumi sona nukuti abantu abaluko lwane bope babanje nubumi.

Esitele 8:5

“Wee mwene, nanti chingakuhobosya sona nanti wampelela ichisa nukuhoboka nane, usimbe ululaghilo ulwakususannya na zizyo u Hamani umwana uwa Hamedata umu Agagi, umwana uwa Hamidata akabatika ukuti alunangannye uluko ulwa ba Yuda muvigaba vyako vyosi.

Ivyili 3:4

Po ukwiza pakuhoboka ni nkalo inyiza pamaso pa Chala, na pabantu bulo.

Daniyeli 9:25

“Umanye nukwivwisya ichintu ichi: Ukwanda pakabalilo kako indaghilo zikafumuziwanga ukuti akaya aka Yelusalemu kazengiwanje sona mupaka umulaghili umupakiwa afike, pakwiza ukuchilapo amaka 7 aghatubalilo aka 7. Sona amaka 7 aghatubalilo aka 62 pakwiza ukuzengiwa imisebo nukukumba imifolo mu Yelusalemu, loli pakabalilo akantamyo.

Matayi 23:27

“Chighune nkani kukwinyu, amwe mwe bamanyisi aba Ndaghilo naba Falisayi! Mwe bazimbuli mwee! Pakuti muyanite bulo na mapumpa ghagho ghapakaziwe ni banya ghagho ghakuboneka akiza kuzi, loli mukasi mwizuye na mafupa ni vintu ivibozu ivinji.

Luti 2:13

U Luti akamula akati, “Wee mwene wane, naloli wampelela ichisa, sona wansangalusya nkani, napapo inte ne yumo uwa bambombo bako.”