Mika 1:8 - IBAYIBOLO 2024

⁸ U Mika akati, “Pachifukwa chinichi, nkwiza pakulila nukufwifwitila, sona nkwiza pakwenda nyayo zyene nukuba nkule, Nkwiza pakukuta ngati we kambwe sona nkwiza pakulila ngati lisisimusi.

Mika 1:8 Iomraidhean Croise

2 Abamwene 18:13

Mumwaka uwa 14 bo u mwene u Hezekiya akulaghila, u mwene u Senakelibu u mwene uwamu Asiliya akiza pakulwa ubwite nutwaya tosi utukulu nkani utwa malinga utwa mu Yuda nukutufyula.

Esitele 4:1

Bo u Molodikayi azyaghannya zizyo zikabombiwa, akazepula amenda ghache sona akavwala amasaka nukwinyafila itoyi kumutu pachifukwa icha chitima, po akinjila mukasi nkani mukaya akakulu nkani kala, bo akukolomoka nkani pachifukwa icha chitima.

Yobu 30:29

Ane naba ne mukamu uwa bakambwe, po sona naba ne mumanyani uwa masisimusi.

Masalimo 102:6

Naba ngati po ne chiyuni icha munkolongo, sona ngati po ne mpughulu muvisami.

Yesaya 13:21

Loli ivipeliwa ivya munkolongo vikwiza pakughonagha mulamula, inyumba zyabo zikwiza pakwizula na kambwe, na masisimusi ghakwiza pakwikalagha mulamula, ni mbuzi izya munkolongo zikwiza pakunyelanyela mulamula

Yesaya 13:22

Abalabwe bakwiza pakulilagha muvipinda ivya nyumba zila, bope abakambwe bakwiza pakuba mubuzilo ubwiza munyumba izya bumwene. Akabalilo kache kali papipi, sona namasiku ghache ghatakwiza pakwendelela.

Yesaya 16:9

Po nkulila, ngati mumo aba Yazeli bakulilila, pachifukwa icha mughunda uwa mampesya uwamu Sibima. Wee Heshiboni, wee Eleyale nkukulilila amasozi! Ukulila ukwa bantu aba mu Yazeli, pachifukwa icha mampesya agha mu Sibima, pate inyinulo iya kubapela abantu ukuti basekelaye.

Yesaya 21:3

Zizyo nkazyennya nukuzyivwa muchisetuka zikampelela ubogha nu bubavu, ububavu ngati ubwa mukolo yuyo ali pakusayiwa. Nkutantalila nazizyo nkwivwa, sona zizyo nkuzyennya zinkuvulungannya.

Yesaya 22:4

Polelo nkati, “Mundeke nemwene, ukuti indilepo nkani. Mutakansangalusyanje pachifukwa icha kunanganika ukwa bantu bane.”

Yesaya 32:11

Tetemagha amwe mwebakolo mwemwifwasiye bulo, amwe mwe balindu mwe mutakupasya nachimo. Vula amenda ghinyu, nukuvwala amasaka mumisana ghinyu pachifukwa icha chitima.

Yelemiya 4:19

Mwee, intamyo! Mwee intamyo! Nkwigholola nu bubavu. Mwee umoyo wane ghukubaba, umoyo wane ghukukoma nkani, nkupotwa pakuba myee. Pakuti nivwa ukulila ukwa lipati, nivwa ichongo icha bwite.

Yelemiya 9:1

Mwee, nalondagha nkani ukuti u mutu wane ghube ngati mbwibi iya mizi nukuti amaso ghane ghabe ngati chiziba icha masozi! Umwakuti ngali nalila umusanya nubusiku pachifukwa icha bantu bane babo baghoghiwe.

Yelemiya 9:10

Nkwiza pakukolomoka nukughalilila amaghamba sona nkwiza pakuyifwifwitila inkolongo, pachifukwa ichakuti ukwakudimako kwananganika. Kwaba chisami sona batakwendako ukumota ukwavitekwa kutakwivwikako. Iviyuni ni vinyamana vyachimbilamo.

Yelemiya 9:19

Ukulila ukwa Ziyoni kukwivwika, ‘Mwee twamala! Mwee isoni zyatulema! Tubaghiye pakwepamo muchisu chitu, pachifukwa ichakuti inyumba zyitu zyipela visami.’ ”

Ezekiyeli 32:18

“Wee mwana uwa muntu, chililile ichilundilo icha Ijiputi nukubatuma mwipumpa poka ninko izyamaka na babo bakubuka kwipumpa.

Mika 2:4

Mwisiku lilalila abantu bakwiza pakukusamula sona bakwiza pakubobezya ni nyimbo izya chililo izyakuti: ‘Mwee twananganika nkani ukatundu uwa bantu bitu afyuliwa. Anfyula ukatundu wane wesi! Akubapa abalwani amaghunda ghitu ghosi.’ ”

1 Samuweli 19:24

U Sabuli akavula inkazo yache nukwanda pakulaghula pamaso pa Samuweli. Akaghona nkule pamusanya na pabusiku bula. Ichi cho chifukwa abantu bakunena ichili ichakuti, “Fwandi u Sabuli wepe wa bamo uwa ba balaghuzi?”