Matayi 5:3 - IBAYIBOLO 2024

³ “Basayiwa abantu babo bazimenye ukuti bapina mubuzimu, pakuti Ubumwene ubwa Kumwanya bwabo.

Ulufingo Ulupya

³ “Basayiwa abantu babo bazimenye ukuti bapina mubuzimu, pakuti Ubumwene ubwa Kumwanya bwabo.

Matayi 5:3 Iomraidhean Croise

2 Imbili 33:12

Pakabalilo akantamyo zyache, akamulabagha u Mwene u Chala wache nukwiyisya nkani pamaso pa Chala uwa banyenya bache.

2 Imbili 33:19

Ulwiputo lwache sona namumo akamulambilizizya u Chala ni mbibi zyache zyosi nukusita kusubiliwa kwache na pakwiputilapo ivifwani ni vifwani ivya Ashela ni vifwani ivinji bo achili pakwiyisya, zyosi zisimbiwe mwibuku ilya Mbili iya balaghuzi.

2 Imbili 33:23

U Amoni atakiyisya pamaso pa Mwene ukuyana namumo akabombelagha uwise u Manase, loli akabombagha imbibi.

2 Imbili 34:27

Pachifukwa ichakuti wapinduka nukwiyisya we mwene pamaso pa Chala, bo wivwa amazyu aghakususannya nakaya akakulu nkani kanaka, poka na bantu bache sona nukuti wiyisya pamaso papane pakuzepula inkazo yako nukulila pamaso papane, nane nivwa ulwiputo lwako. Ane ne Mwene nene nanena.

2 Imbili 7:14

po nanti abantu bane babo bakwitiziwa ni tabwa lyane, biyisya bene nukwiputa pakubomba vivyo vikunhobosya sona nanti bakuzileka imbibi zyabo, ane nkwiza pakubivwa kumwanya nukubahobokela imbibi zyabo sona nkwiza pakuchipoka ichisu chabo.

Yobu 42:6

Polelo nkwisusya nemwene nukupinduka pakwinyafila ulufumbi ni toyi.

Masalimo 1:1

Musayiwa umuntu, yuyo atakwenda na bantu ababibi, pamo pakwimilila muzila, izya babomba imbibi, pamo pakwikala mukabukatila aka bantu abalobezyo,

Masalimo 112:1

Mumupalaye u Mwene. Musayiwa umuntu yuyo akumuchindika u Mwene, yuyo akuhoboka nkani pakughakonka amalamulo ghache.

Masalimo 128:1

Basayiwa babo bakumuchindika u Mwene, babo bakughakonka amalamulo ghache.

Masalimo 146:5

Musayiwa umuntu yuyo umwavwilizi wache we Chala uwa Yakobo, yuyo amusubiye u Mwene u Chala wache,

Masalimo 2:12

Mumuchindikaye lumo angabakalalila nukubanangannya, pakuti ubukali bwache bukwaka lubilolubilo. Basayiwa bosi babo bakuchimbilila kukwache.

Masalimo 34:18

U Mwene ali papipi na babo bavulaye mumoyo, sona akubapoka babo banyokeye kwisinda.

Masalimo 41:1

Musayiwa umuntu yuyo akubapasikizya abapina, po u Mwene akumupokagha pakabalilo akantamyo.

Masalimo 51:17

Ivyakwiyipa vivyo vikumuhobosya u Chala, gho muzimu uwakwiyisya, po u Chala utakwiza pakughusulannya umoyo uwakwiyisya.

Masalimo 84:12

Wee Mwene Uwamaka Ghosi, basayiwa abantu babo bakukusubila.

Ivyili 16:19

Chizapo pakuba muntu uwakwiyisya pakasi pa bapina, ukuchila ukugabana ubukabi na bantu abamituvyo.

Ivyili 29:23

Ukwituvya ukwa muntu kukumuwisya mwene, loli umuntu uwakwiyisya abantu bakumuchindika.

Ivyili 8:32

“Polelo mwee bana bane, munteghelezyanje, basayiwa babo bakwivwila zizyo nkubabuzya.

Yesaya 30:18

Pachifukwa chinichi u Mwene akubalindilila ukuti abapelelaye ichisa, akunyamuka nukubalanjizya ichililizi pakuti u Mwene we Chala uwanaloli. Basayiwa bosi babo bakumulindilila!

Yesaya 57:15

Pakuti umu momumo akunenela uwa pamwanya, yuyo wakupaliwa yuyo akubangako bwila na bwila, itabwa lyache lizelu, “Nkwikala kumwanya nkani, sona na Mubuzilo Ubuzelu, sona nkwikala na bantu abakwiyisya mubuzimu, sona nukughunyamusya umuzimu uwa muntu uwakwiyisya, nukughunyamusya umoyo uwa muntu uwakuwa amaka.

Yesaya 61:1

U Muzimu uwa Mwene Uwamaka Ghosi ali papane, pachifukwa ichakuti u Mwene ampakazizye amafuta, pakulumbilila amazyu amiza kubapina. Antumite ane pakupozya abamoyo aghakuvulala, pakufumusya ubwabuke ku bazya, nukubasatula ukufuma muchisi icha mubukayidi,

Yesaya 66:2

Ivintu vyosi nene nkavipela, po vyosi vinivi vyane.” U Mwene anena “Loli umuntu yuyo nkumulonda, we muntu yuyo akwiyisya, yuyo apindukite nukuzileka imbibi zyache, sona yuyo akunyila nukughivwila amazyu ghane.

Mika 6:8

Wee muntu, u Mwene akulanjizya kale chicho chiza. Nkimba u Mwene akulonda choni kukwako? Ukuti ubombaye ubwanaloli, ubanje we wachisa, sona wiyisyanje pamaso pa Chala wako.

Matayi 11:25

Pakabalilo kalakala u Yesu akati, “Wee Tata, Mwene uwakumwanya na pachisu ichapasi! Nkukupalizya pachifukwa ichakuti wabavumbulila abantu babo batamanyiye ivintu vivyo ukabafisa abantu abamahala na bamanyi.

Matayi 11:6

Basayiwa babo batakwilamwa nane.”

Matayi 13:16

“Loli mwe basayiwa pakuti amaso ghinyu ghakwennya, sona amakutu ghinyu ghakwivwa.

Matayi 19:14

U Yesu akati, “Baleke abana bize kukwane, mutakabakanizye pakuti Ubumwene ubwa Kumwanya ubwa bantu babo bali ngati bo aba.”

Matayi 24:46

Musayiwa nkani uwambombo yula nanti u mwene wache abwelako, akumwagha akubomba zinizi.

Matayi 25:34

Po u Mwene akwiza pakubabuzya abantu aba kunyobe indilo ukuti, ‘Zagha kuno, mwe basayiwa nu Tata wane! Zagha mupokele ubumwene bubo buyaniziwe pakuba bwinyu ukwandila pakabalilo kako akapelelagha ichisu ichapasi.

Matayi 3:2

Akati, “Pinduka nukuzileka imbibi zyinyu, pakuti Ubumwene ubwa Kumwanya buli papipi!”

Matayi 8:11

Naloli nkubabuzya ukuti abantu abinji abakubufumilo naba kubwinjililo bwizuba bakwiza pakwiza nukwikala pasi poka nu Abulahamu nu Yisaki nu Yakobo palusekelo mu Bumwene ubwa Kumwanya.

Maliko 10:14

Bo u Yesu azyaghannya, akakalala nkani nukubabuzya abamanyili bache ukuti, “Baleke abana bize kukwane, mutakabakanizye pakuti Ubumwene ubwa Chala ubwa bantu babo bali ngati bo aba.

Luka 11:28

Loli u Yesu akamula akati, “Awe, basayiwa babo bakwivwa amazyu agha Chala nukughivwila.”

Luka 18:14

U Yesu akati, “Nkubabuzya ukuti umusonkezya sonko akabwela kunyumba, bo u Chala amunena pakuba mugholosu pamaso papache, umu Falisayi yula, awe. Pakuti umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukweziwa.”

Luka 22:29

ukuyana namumo Utata wane ampeleye ubulaghili ubwakulaghilila, po nane bulo nkwiza pakubapa ubulaghili bunubu.

Luka 22:30

Mukwiza pakulya nukung'wela poka nane mu Bumwene bwane, sona amwe mukwiza pakwikala pa vitengo ivya bumwene pakulonga inko 12 izya ba Izilayeli.

Luka 4:18

“U Muzimu uwa Mwene ali papane pachifukwa ichakuti ampakazya ukuti indumbilile amazyu amiza pakasi pabantu abapina. Antuma ukuti imfumusye ubusatuke ubwa babo bali mujele nukuti abafwamaso bennyanje sona nukubapa ubusatuke babo bakukanyililiwa.

Yohani 20:29

U Yesu akamubuzya akati, “Nkimba ukusubila pachifukwa ichakuti wanyennya? Basayiwa babo bakusubila bo batanyenizye.”

Ukukumbusya Amalamulo 8:2

Mukumbukaye namumo u Mwene u Chala winyu akabalongolela munkolongo amaka 40 pakubawisizya amayimba ukuti abayelaye umwakuti aghamanye amoyo ghinyu nanti mungaghakonka amalamulo ghache.

Yakobo 1:10

sona umukilisitu yuyo mukabi wepe asekelaye, bo u Chala akumwisya. Pakuti abantu abakabi bakwiza pakumala ngati bwezya ubwa muzi.

Yakobo 1:12

Musayiwa umuntu yuyo akujimba nkani munjelo, pakuti nanti ajimba, akwiza pakupokela impumpu iyabumi yiyo u Chala akabalayizya abantu bache babo bamughanite.

Yakobo 2:5

Mwee bakamu bane abaghaniwa, ivwa kuno! Nkimba u Chala atakabasala abantu abapina aba muchisu ichapasi ukuti babanje bakabi mulwitiko nukupyana ubumwene, bubo akabalayizya abantu babo bamughanite?

Ubuvumbuli 19:9

Palapala uwantumi yula akambuzya akati, “Simba uti, ‘Basayiwa abantu babo bitiziwe kulusekelo ulwa sendwa iya Mwana uwa ng'ozi!’ ” Uwantumi yula akonjelezya sona pakunena ukuti, “Agha gho mazyu aghanaloli agha Chala.”

Ubuvumbuli 22:14

“Basayiwa abantu babo bakuchapa inkazo zyabo umwakuti babanje nu bulaghili ubwakulyela ivikomwa ivya mwikwi ilya bumi nukwinjila mukaya akakulu nkani ukwendela pamilyango.

Ubuvumbuli 3:17

Pakuti ukunena ukuti, ‘Ane ne mukabi, indi navyo vyosi, sona ntakusobelwapo nachimochimo.’ Loli utazimenye ukuti we wantamyo, we mupelachisa, we mupina, we mufwamaso, sona uli nkule.