Masalimo 98:2 - IBAYIBOLO 2024

² U Mwene abuvumbula ubupoki bwache, sona abavumbuliye ubugholosu bwache abantu aba inko izinji.

Masalimo 98:2 Iomraidhean Croise

Masalimo 22:31

Bakwiza pakulumbililagha nizya bugholosu bwache, ku bantu babo bachili batapapiwe, bakwiza pakwivwa zyosi zizyo abomba.

Masalimo 24:5

Akwiza pakupokela ulusayo ulwa Mwene sona u Chala Umupoki wache weyuyo akwiza pakunena ukuti ate ninongwa.

Yesaya 46:13

Nkwiza nu bugholosu kupipi, bute kubutali awe, nu bupoki bwane butakwiza pakukabila. Nkwiza pakukapoka akaya aka Ziyoni, nukubapa ubuchindamu aba Izilayeli.

Yesaya 49:6

U Mwene akamubuzya akati, “Ko kantu akanandi nkani, akakuti, ubanje we mubombi wane. Utakwiza pakubomba yene, iya kubanyosezya abaluko ulwa Yakobo, sona nukubanyosezya aba Izilayeli babo bakasyalako, loli nkwiza pakukupela pakuba we lukozyo ulwa bantu babo bate ba Yuda, umwakuti abantu bosi aba muchisu ichapasi bapokiwe.”

Yesaya 52:10

U Mwene akwiza pakulanjizya amaka ghache amazelu, pantazi pa inko zyosi, sona ubumalilo bosi ubwa chisu bukwiza pakubwennya ubupoki ubwa Chala witu.

Yesaya 52:7

Bo bwiza boni pamaghamba, inyayo izya muntu yuyo akwiza na mazyu amiza, yuyo akulumbilila nizya mutende, sona akwiza na mazyu amiza agha vintu ivyiza, akulumbilila nizya ubupoki, nukunena kuba mu Ziyoni ukuti, “U Chala winyu akulaghila!”

Yesaya 62:2

Inko zikwiza pakubwennya ubugholosu bwako! Abamwene babo bakwiza pakubwennya ubuchindamu bwako. Ukwiza pakwitiziwa nitabwa ipya, lilyo u Mwene akwiza pakubitizya.

Yelemiya 23:6

Mukabalilo kache ichisu icha Yuda chikwiza pakupokiwa sona ichisu icha Izilayeli chikwiza pakwikalagha umwakufwasa. Akwiza pakwitiziwa ni tabwa ilyakuti, ‘U Mwene we Bugholosu bwitu.’ ”

Matayi 28:19

Po bukagha pakasi pabantu aba inko zyosi nukubapela pakuba bamanyili bane. Mubozyanje mwitabwa ilya Tata, nilya Mwana nilya Muzimu Umuzelu.

Maliko 16:15

Akababuzya akati, “Bukagha muchisu chosi ichapasi nukulumbilila Amazyu Amiza pakasi pabantu bosi.

Luka 3:6

Abantu bosi bakwiza pakwennya ubupoki ubwa Chala!’ ”

Aba Loma 1:17

Pakuti Amazyu Amiza ghakuvumbula namumo u Chala akubanenela abantu pakuba bagholosu pamaso papache: Ko kwendela mulwitiko ukwandila ko kubwandilo mupaka kubumalilo. Amasimbo ghakuti, “Abantu babo u Chala akubanena pakuba bagholosu ukwendela mu lwitiko, bakwiza pakuba nubumi.”

Aba Loma 10:18

Loli imbalalusye: Nkimba kokuti aba Izilayeli batakivwa Amazyu Amiza? Naloli bakaghivwa pakuti Amasimbo ghakuti, “Izyu lyabo likivwika pachisu chosi ichapasi, amazyu ghabo ghakafika mupaka kubumalilo ubwa chisu ichapasi.”

Aba Loma 9:30

Po nkimba tungati choni? Tunganena ukuti abantu babo bate ba Yuda babo batakalondagha ukwinena bene pakuba bantu bagholosu pamaso pa Chala, ilelo baneniwa ukuti bantu bagholosu pantazi papache ukwendela mu lwitiko,

2 Aba Kolinti 5:21

U Yesu atakanangapo nachimo, loli u Chala akamupela ngati po wambibi pachifukwa icha sweswe ukuti ukwendela mumwache tunganeniwa pakuba bantu abagholosu pamaso pa Chala.

Aba Filipi 3:9

sona chicho nkulonda chakuti imamatilane poka nawe. Intanginena pakuba mugholosu pa nemwene pakuzikonka Indaghilo, loli pakusubila mwa Yesu Kilisitu. Ubugholosu ubwakufuma kwa Chala bwimite palwitiko.

Titi 2:13

bo tukulindilila nu lusubilo isiku isayiwa lila, isiku lilyo ubuchindamu ubwa Chala umukulu nu Mupoki witu u Yesu Kilisitu bukwiza pakuboneka.

2 Pitala 1:1

Ane ne Simoni Pitala, umubombi, sona nu mutumiwa uwa Yesu Kilisitu. Nkubasimbila ukalata uyu abantu babo bapokelite ulwitiko lulo tukapokela ukwendela mubugholosu ubwa Chala witu, sona nu Mupoki u Yesu Kilisitu.