Masalimo 78:6 - IBAYIBOLO 2024

⁶ umwakuti inkulilo izya muntazi zighamanye, po bope abana babo batapapiwe bababuzyanje abana babo.

Masalimo 78:6 Iomraidhean Croise

Esitele 9:28

Chikadumuliwa ukuti aba Yuda bosi babo bakikalagha muvigaba vyosi sona na mutwaya tosi utukulu nkani baghakumbukilaye amasiku mabili ghanagha, sona nukuti babanje nu lusekelo mumasiku agha Pulimu agha. Patakabanjepo nayumoyumo umuntu uwakughanyazya amasiku aghanji pakasi pa baluko lwabo batakaghaluvyanje.

Masalimo 102:18

Izi zisimbiwanje pachifukwa icha nkulilo izya muntazi, umwakuti abantu babo batapapiwe bamupalaye u Mwene.

Masalimo 145:4

Inkulilo yoka yikwiza pakuyibuzya inkulilo iyinji, sona bakwiza pakufumusya imbombo zyako izyamaka.

Masalimo 22:31

Bakwiza pakulumbililagha nizya bugholosu bwache, ku bantu babo bachili batapapiwe, bakwiza pakwivwa zyosi zizyo abomba.

Masalimo 48:13

Mughenelezyanje nkani amalinga ghache, mudumusannyanje pakasi pa nyumba izya bumwene, umwakuti muzibuzyanje inkulilo izya muntazi.

Masalimo 71:18

Wee Chala, napapo ne mughosi sona ivwi zyawa, utakandekaye nemwene. Po nkwiza pakulumbilila nizyamaka ghako mupaka inkulilo iya muntazi, sona nizyamaka ghako ku bosi babo bakwiza pakupapiwa muntazi.

Masalimo 90:16

Imbombo zyako zibonekaye pa mubombi wako, bope ubuchindamu bwako bubonekaye pa bana babo.

Ukufuma 10:2

Po mukwiza pakubabuzya abana binyu, sona na bizukulu binyu nizya mumo nkabapunganizizya aba Ijiputi ni viswigho vivyo nkapela. Bunubu mwebosi mukwiza pakummanya ane ukuti ne Mwene.”

Yoweli 1:3

Mubabuzye chinichi abana binyu, bope abana binyu bababuzyanje abana babo, sona bope abana babo bababuzyanje abana babo, mupaka inkulilo iya muntazi.

Ukukumbusya Amalamulo 4:10

Mubabuzye nkaninkani nizya isiku lilyo mukimilila pamaso pa Mwene u Chala winyu pighamba ilya Sinayi. Kulakula akambuzya akati, “Ubabungannye abantu. Nkulonda ukuti bivwe amazyu ghagho nkwiza pakunena, umwakuti banganyila pakabalilo kosi aka bumi bwabo, sona nukuti bangabamanyisya na bana babo bulo.”