Masalimo 25:6 - IBAYIBOLO 2024

⁶ Wee Mwene kumbuka ichisa chako ichikulu nu lughano lwako, pakuti vinivi vikabangako ukwanda kale.

Masalimo 25:6 Iomraidhean Croise

Ubwandilo 24:27

Akati, “Apaliwanje u Mwene, u Chala uwa mwene wane u Abulahamu, yuyo akusunga umwakusubiliwa zizyo akamulayizya u mwene wane. U Mwene andongolela ane kunyumba iya bakamu abamwene wane.”

Ubwandilo 32:9

U Yakobo akiputa akati, “Wee Chala uwa munyenya wane u Abulahamu, sona nu Chala uwa wise u Yisaki, wee Mwene, ukambuzya ukati, ‘Nyokela kuchisu chako nicha bakamu bako nukundayizya ukuti ivintu vikwiza pakunyendela akiza.’

2 Imbili 6:42

Wee Mwene u Chala, utakamukanaye umupakiwa wako. Kumbuka ulughano lwako ulukulu, lulo ukamulayizya umubombi wako u Devedi.”

Nehemiya 13:22

Po nkabalamula aba Levi ukuti biswefye nukubuka pakulindilila pamulyango, umwakuti Isiku Ilyakutuzya libanje lizelu. Wee Chala wane, unkumbukaye sona unsungaye nu lughano lwako ulukulu nkani.

Nehemiya 9:19

“Pachifukwa icha chisa chako ichikulu nkani utakabaleka bene munkolongo mula. Pamusanya ibingu litakalekapo nalumo pakubalongozya, sona pabusiku impanda iya moto yikabalamilagha pakubalanjizya izila.

Masalimo 103:17

Ukufuma kubwandilo mupaka kubumalilo ulughano ulwa Mwene lwa bwila na bwila ku bantu babo bakumuchindika, ubugholosu bwache ubwa banyenya babo.

Masalimo 103:4

Akubupoka ubumi bwako ukuti ghutakinjilaye muchiliba, akukuvwika ulughano lwache sona ni chisa chache.

Masalimo 106:1

U Mwene apaliwanje. Mumupalizyanje u Mwene pakuti mwiza, ulughano lwache ulwa bwila na bwila.

Masalimo 106:45

Pachifukwa icha bantu bache, akalukumbuka ulufingo lwache, umwakuti akisya ubukali bwache pachifukwa icha lughano lwache ulukulu nkani.

Masalimo 107:1

Mumupalaye u Mwene pakuti mwiza, ulughano lwache lwa bwila na bwila.

Masalimo 119:77

Umpelele ichisa umwakuti imbanje nubumi, pakuti ululaghilo lwako lukunhobosya

Masalimo 40:11

Wee Mwene utakanyimaye ichisa chako, sona ulughano nu busubiliwa bwako vinvighililaye akabalilo kosi.

Masalimo 69:13

Wee Mwene, loli nkwiputa kukwako, ukuti umpelele ichisa, unyamule pakumpoka pakuti ulughano lwako lukulu.

Masalimo 69:16

Wee Mwene unyamule, pakuti we mwiza, sona we walughano. Unyavwe pakuti ichisa chako chikulu nkani.

Masalimo 98:3

Alukumbuka ulughano lwache, sona abalanjizya aba Izilayeli ubusubiliwa bwache. Po abantu bosi aba kubumalilo ubwa chisu ichapasi babwennya ubupoki ubwa Chala witu.

Ukufuma 15:13

“Mulughano lwako lulo lutakupotwangapo nalumolumo, ukabalongolela abantu bako babo ukabatabula. Na maka ghako amakulu, ukabalongozezya kubuzilo bwako ubuzelu.

Ukufuma 34:6

Po u Mwene akadumusannya kuntazi kwa Mozesi nukunena nizyu ilyapamwanya ukuti, “Mwene, Mwene u Chala uwachisa nu wachililizi, yuyo atakukalala lubilolubilo, walughano lulo lutakumala nu busubiliwa bwache.

Yesaya 55:7

Mubaleke ababomba mbibi, baleke inkalo zyabo imbibi, sona bope abantu ababibi bazileke inyinong'ono zyabo inyonganu. Baleke banyokele kwa Mwene, ukuti abapelele ichisa, sona nakwa Chala witu, pakuti akwiza pakubahobokela.

Yesaya 63:15

Eee Mwene, ennya pasi ukufuma uko kumwanya, po wennye pachitengo icha bumwene ichizelu, sona icha buchindamu. Nkimba ulweke lwako, na maka ghako vili ko kwiyi? Fwandi ichisa ni chililizi chako vili ko kwiyi.

Yelemiya 31:20

Nkimba u Efulayimu te mwana wane umulumendo umughaniwa, nkimba te mwana wane uwa pamoyo? Napapo nkumunena ububibi kabilikabili, loli pope bulo nkumukumbuka. Polelo umoyo wane ghukumusamba, sona nkuba nawe nichililizi ichikulu. Ane ne Mwene nanena.

Yelemiya 33:11

amazyu agha buhobosu nulusekelo, na mazyu agha bantu babo bali palusekelo ulwa sendwa iya mulindu nu mulumendo, sona ninyimbo izya babo bakubika ivyakwiyipa ivyakupalizikizya mu Nyumba iya Mwene ivyakuti, ‘Mumupalizyanje u Mwene Uwamaka Ghosi pakuti u Mwene mwiza, ulughano lwache lwa bwila na bwila.’ Pakuti nkwiza pakuchinyosezya ichisu ubwiza bwache ngati mumo bukabela kale.

Daniyeli 9:18

Wee Chala, tegha ikutu lyako nukwivwa. Ighula amaso ghako nukwennya ukunanganika ukwa kaya kako kumanyikwe ni Tabwa lyako. Tutakukulambilizya pachifukwa ichakuti twebagholosu awe, loli pachifukwa icha chisa chako ichikulu nkani.

Habakuku 3:2

Wee Mwene, nivuye nizya imbili yako, sona imbombo zyako zikumpelela ubogha. Po uzipelaye pakuba mpya mumasiku ghitu, sona zimanyikwanje pakabalilo kitu. Napapo ukalaye, loli utupelelaye ichisa.

Luka 1:50

ukwandila inkulilo yoka mupaka iyamwabo akubapelela ichisa abantu babo bakumuchindika.

Luka 1:54

Amwavwa umubombi wache u Izilayeli pakumulanjizya ichisa,

Luka 1:78

U Chala witu wachisa nkani. Akwiza pakututumila ulukozyo ulwa kumwanya,

2 Aba Kolinti 1:3

U Chala apaliwanje, uwise uwa Mwene witu u Yesu Kilisitu, yuyo we Tata uwa chisa, sona u Chala, umwenecho uwa busangalusu bosi!

Aba Filipi 1:8

U Chala we kaboni wane ukuti nkunena ubwanaloli, bo nkunena ukuti nkubasamba nkani, sona we kaboni wane ukuti imbaghanite nkani ukuyana namumo u Kilisitu u Yesu abaghaniye.

Aba Filipi 2:1

Umwakusita ukwilamwa, ubumi bwinyu mwa Kilisitu bukubapa amaka, sona ulughano lwache lukubakazya nukwefya ubogha. Mukuba bamoyo ghoka mu Muzimu Umuzelu, sona mukupelelana ichisa nukupazikizannya.

Aba Kolosi 3:12

Pakuti mukasaliwa nu Chala ukuti mubanje mwe bantu abache na bache, sona nukuti umwene abaghanite. Mubanje mwe balupazikizyo, na bachisa, na bakwiyisya, na bololo, sona na bafisalyoyo.

1 Yohani 3:17

Nanti umuntu yumo umukabi akumwennya umuntu uyunji yuyo mupina loli atakumupelela ichisa, nkimba umuntu yunuyu anganena bulibuli ukuti amughanite u Chala?