Luka 4:18 - IBAYIBOLO 2024

¹⁸ “U Muzimu uwa Mwene ali papane pachifukwa ichakuti ampakazya ukuti indumbilile amazyu amiza pakasi pabantu abapina. Antuma ukuti imfumusye ubusatuke ubwa babo bali mujele nukuti abafwamaso bennyanje sona nukubapa ubusatuke babo bakukanyililiwa.

Ulufingo Ulupya

¹⁸ “U Muzimu uwa Mwene ali papane pachifukwa chakuti ampakazya ukuti indumbilile amazyu amiza pakasi pa bantu abapina. Antuma ukuti imfumuzye ubusatuke ubwa babo bali mujele nukuti abafwamaso bennyanje sona nukubapa ubusatuke babo bakukanyililiwa.

Luka 4:18 Iomraidhean Croise

Ubwandilo 3:15

Nkwiza pakubika ubulwani pakasi papako nu mukolo; pakasi pa bana bache na bana bako. Abana bache bakwiza pakutizannya umutu wako, sona nawe ukwiza pakuluma ichitende icha mwana wache.”

2 Imbili 34:27

Pachifukwa ichakuti wapinduka nukwiyisya we mwene pamaso pa Chala, bo wivwa amazyu aghakususannya nakaya akakulu nkani kanaka, poka na bantu bache sona nukuti wiyisya pamaso papane pakuzepula inkazo yako nukulila pamaso papane, nane nivwa ulwiputo lwako. Ane ne Mwene nene nanena.

Masalimo 102:20

ukuti ivwe ukukoloma ukwa bakayidi, umwakuti po abasatule babo bali papipi pakufwa.

Masalimo 147:3

Akubapozya babo bavulaye amoyo, nukubapinya ivilonda vyabo.

Masalimo 2:2

Abamwene aba pachisu ichapasi basambukite, sona bope abalaghili babunganite poka pakumusambukila u Mwene poka nu Mupakiwa wache.

Masalimo 2:6

Akutinji, “Namwimika u mwene wane mu Ziyoni, lilyo lighamba lyane izelu.”

Masalimo 34:18

U Mwene ali papipi na babo bavulaye mumoyo, sona akubapoka babo banyokeye kwisinda.

Masalimo 45:7

Ubughanite ubugholosu sona ububengite ububibi. Polelo u Chala wako akupakazya na mafuta agha buhobosu ukubachila abamanyani bako.

Masalimo 51:17

Ivyakwiyipa vivyo vikumuhobosya u Chala, gho muzimu uwakwiyisya, po u Chala utakwiza pakughusulannya umoyo uwakwiyisya.

Yesaya 32:3

Po amaso agha babo bakwennya ghatakwiza pakwighalika, namakutu agha babo bakwivwa bakwiza pakuteghelezya.

Yesaya 35:5

Abafwamaso bakwiza pakwennya, sona abamapuli bakwiza pakwivwa.

Yesaya 42:7

pakwighula amaso agha bantu abafwamaso, pakubasatula abantu babo bali mujele, nukubafumya mujele babo bakwikala muchisi.

Yesaya 45:13

Nkwiza pakumuvundumula u Sayilasi mubugholosu bwane, Nkwiza pakuzigholosya izila zyache zyosi. Akwiza pakukazenga sona akaya kane akakulu, nukubabula abazya, loli atakwiza pakupeghiwa amalipilo, pamo umwavwalo.” Umu momumo akunenela u Mwene Uwamaka Ghosi.

Yesaya 49:9

akababuzya abakayidi akati, ‘Fuma’ akababuzya sona babo bali muchisi akati, ‘Banga myee!’ Bakwiza pakulyanga ivyakulya mulubazu ulwa musebo, nukulyagha isote iteta, pakaghamba papo patakumela isote.

Yesaya 50:4

U Mwene Uwamaka Ghosi amanyisya izya kunena, umwakuti imbasangalusye babo balitite. Indabi yili yosi akunyamusya, akwighula amakutu ghane, ukuti nivwanje zizyo akulonda pakumanyisya.

Yesaya 57:15

Pakuti umu momumo akunenela uwa pamwanya, yuyo wakupaliwa yuyo akubangako bwila na bwila, itabwa lyache lizelu, “Nkwikala kumwanya nkani, sona na Mubuzilo Ubuzelu, sona nkwikala na bantu abakwiyisya mubuzimu, sona nukughunyamusya umuzimu uwa muntu uwakwiyisya, nukughunyamusya umoyo uwa muntu uwakuwa amaka.

Yesaya 59:21

U Mwene akuti, “Kukwane, ulu lo lufingo lwane lulo nkufingana nabo. Umuzimu wane, ghugho ghuli papako, sona na mazyu ghane ghagho nabika mumulomo wako ghatakwiza pakwepamo mumilomo yinyu, pamo mu mamolomo agha bana binyu, pamo mumalomo agha baluko lwinyu ukwanda pakabalilo aka mupaka bwila na bwila.”

Yesaya 61:1

U Muzimu uwa Mwene Uwamaka Ghosi ali papane, pachifukwa ichakuti u Mwene ampakazizye amafuta, pakulumbilila amazyu amiza kubapina. Antumite ane pakupozya abamoyo aghakuvulala, pakufumusya ubwabuke ku bazya, nukubasatula ukufuma muchisi icha mubukayidi,

Yesaya 66:2

Ivintu vyosi nene nkavipela, po vyosi vinivi vyane.” U Mwene anena “Loli umuntu yuyo nkumulonda, we muntu yuyo akwiyisya, yuyo apindukite nukuzileka imbibi zyache, sona yuyo akunyila nukughivwila amazyu ghane.

Ezekiyeli 9:4

Akamubuzya akati, “Buka mukaya akakulu nkani mosi mu Yelusalemu nukubikapo ichimanyilo pavyeni vyabo bosi babo bali nichitima nukulila, pachifukwa icha vintu ivyamwiko vivyo vikubombiwa mulamula.”

Daniyeli 9:24

“Amaka 7 agha tubalilo aka 70 twabikiwa ukuti abantu aba mukaya akazelu, poka nakaya kako akakulu nkani akazelu babuleke ububibi bwabo sona ni mbibi. Bapepesyanje imbibi zyabo pakubomba ubugholosu ubwa bwila na bwila ichisetuka nu bulaghuzi vikwiza pakukwanilisiwa, sona Ubuzilo Ubuzelu nkani bula bupaghuliwanje.

Zefaniya 3:12

Loli nkwiza pakubaleka pakasi papinyu abololo na bakwiyisya, babo bakuchimbilila kukwane, kune Mwene.

Zekaliya 11:11

Po ulufingo lula lukamala pisiku lilalila, abantu abakughulizya ing'ozi bakanyenelezyanga, bakamanya ukuti we Mwene akunena.

Malaki 4:2

Loli amwe mwe mukunchindika ane, izuba ilya bugholosu likwiza pakubafumila nukubapozya ukwa kulama kwache. Mukwiza pakunyelanyela umwakuhoboka ngati tungwata tuto batwabula muchibagha.

Matayi 11:5

Abafwamaso bakwennya, babo bafuye ivinama bakwenda, na bamambombo bakuswepa, na bamapuli bakwivwa, na bantu abafwe bakuzyuka kubufwe, sona Amazyu Amiza ghakulumbililiwa pakasi pabantu abapina.

Matayi 12:18

“Uyu we mubombi wane, yuyo namusala imughanite, sona umoyo wane ghuhobokite nkani nawe. Nkwiza pakubika Umuzimu wane papache akwiza pakubufumusya ubwanaloli ubwa Chala pakasi pabantu aba inko zyosi.

Matayi 12:20

Ulutete lulo lunyonganite atakwiza pakulupyola, pamo ukuzimya ichikoka ichakusuka, mupaka papo ennya ukuti ubwanaloli bwabombiwa.

Matayi 4:16

Abantu babo bakwikala muchisi, bennya ulukozyo ulukulu; Abantu babo bakwikala muchisu icha bantu abafwe, ulukozyo lwabalamila.”

Matayi 5:3

“Basayiwa abantu babo bazimenye ukuti bapina mubuzimu, pakuti Ubumwene ubwa Kumwanya bwabo.

Luka 4:17

po bakamupa ibuku ilya mulaghuzi u Yesaya. Akazungulula ibuku lila nukwagha pabuzilo bubo busimbiwepo ukuti,

Luka 6:20

U Yesu akabennya abamanyili bache nukubabuzya ukuti, “Mwe basayiwa amwe mwe bapina, pakuti Ubumwene ubwa Chala bwinyu!

Luka 7:22

Akazyamula intumi izya Yohani zila akati, “Nyokela kamubuzye u Yohani zizyo mwazyennya nukwivwa. Abafwamaso bakwennya, babo bafuye ivinama bakwenda, na bamambombo bakuswepa, na bamapuli bakwivwa, na bantu abafwe bakuzyuka kubufwe, sona Amazyu Amiza ghakulumbililiwa pakasi pabantu abapina.

Yohani 1:41

Umwalubilolubilo akamwagha uwamwabo u Simoni nukumubuzya ukuti, “Twamwagha u Mesiya.” (Mesiya kokuti Kilisitu.)

Yohani 12:46

Ane nizite muchisu ichapasi ngati lo lukozyo, umwakuti umuntu wesi yuyo akunsubila atakikalaye muchisi.

Yohani 3:34

Pakuti yuyo u Chala amutumite akunena amazyu agha Chala, pachifukwa ichakuti u Chala akumupa u Muzimu Umuzelu ukusita ukumamilizya.

Imbombo 10:38

Muzimenye izya Yesu uwamu Nazaleti, sona namumo u Chala akamupakazya nu Muzimu Umuzelu na maka. Akabuka kosi na kosi, akabomba inyiza nukupozya abantu bosi babo bakaba pasi pabulaghili ubwa Satana, pakuti u Chala akaba nawe.

Imbombo 26:18

ukuti ubighule amaso, sona nukubefyamo muchisi ukuti bize mulukozyo, pakubefyako kumaka agha Satana ukuti bize kwa Chala, umwakuti imbibi zyabo zihobokeliwe, sona nukupokela ubuzilo pakasi pabantu, babo basaliwa pachifukwa icha lwitiko lwabo mumwane.’

Imbombo 4:26

Abamwene aba muchisu ichapasi bakiyannya bene sona abalaghili bakabungana poka pakumusambukila u Mwene nu Mupakiwa wache?’

Imbombo 4:27

“Naloli, u Helodi nu Pontiyo Pilati bakakomana poka mukaya akakulu nkani kanaka na bantu babo bate ba Yuda, naba Izilayeli pakumusambukila u Yesu, umubombi wako umuzelu, Umupoki yuyo ukamupakazya pakuba we Mwene.

Aba Kolosi 1:13

Pakuti akatupoka kumaka agha chisi, nukutwinjizya mubumwene ubwa Mwana wache umughaniwa.

Yakobo 2:5

Mwee bakamu bane abaghaniwa, ivwa kuno! Nkimba u Chala atakabasala abantu abapina aba muchisu ichapasi ukuti babanje bakabi mulwitiko nukupyana ubumwene, bubo akabalayizya abantu babo bamughanite?

1 Pitala 2:9

Loli amwe mwe luko ulupaghuliwa, abaputi aba bumwene, abantu abache na bache aba Chala. Akabasala ukuti mulumbilile imbombo izyakuswighisya izya Chala, yuyo akabefyamo muchisi nukubinjizya mu lukozyo lwache ulwakuswighisya nkani.