Luka 20:10 - IBAYIBOLO 2024

¹⁰ Bo akabalilo kakwana akakuyabila amampesya, umuntu yula akamutuma uwambombo wache ku balimi bala ukuti bamupe amampesya ghache. Loli abalimi bala bakamukoma uwambombo yula nukumubwezya nyobe zyene.

Ulufingo Ulupya

¹⁰ Bo akabalilo kakwana akakuyabila amampesya, umuntu yula akamutuma uwambombo wache ku balimi bala ukuti bamupe amampesya ghache. Loli abalimi bala bakamukoma uwambombo yula nukumubwezya nyobe zyene.

Luka 20:10 Iomraidhean Croise

1 Abamwene 22:24

Po u Zedekiya umwana uwa Kenana akapalamila nukumukoma u Mikaya nipi kumaso, po akamulalusya akati, “Nkimba umuzimu uwa Mwene wendite zila yoni, bo wepamo mumwane nukunena nawe?”

2 Abamwene 17:13

U Mwene akabasoka aba Izilayeli, naba Yuda ukwendela mu balaghuzi, sona na benelezyi bache bosi ukuti, “Muzileke imbombo zyinyu imbibi. Muzikonkaye indaghilo zyane na malamulo ghane, ghagho nkabalamula abanyenya binyu, sona ghagho nkabapa ukwendela mubabombi bane abalaghuzi.”

1 Imbili 19:4

Po Hanuni akazilema intumi zila, akazimwa indevu, nukudumula inkazo zyabo mupaka mumusana, po akazibwezya.

2 Imbili 16:10

U Asa akamukalalila nkani umulaghuzi yula pachifukwa icha mazyu ghanagha, umwakuti akamwighalila mujele. Pakabalilo kalakala u Asa akabayivya nkani abantu bamo.

Nehemiya 9:26

“Pope bulo batakivwilagha sona bakakusambukila nukuzisulannya indaghilo zyako. Bakabaghogha abalaghuzi bako, babo bakabasokagha ukuti banyokele kukwako. Bakakusamula pakubomba ichintu ichibibi nkani.

Nehemiya 9:30

Awe ukabafisila ilyoyo amaka aminji nkani. Ukababuzya abalaghuzi bako ukwendela mu Muzimu wako ukuti babasokaye. Pope bulo abantu bako bakaba na mapuli, po ukababika munyobe izya bantu aba inko izinji.

Masalimo 1:3

Umuntu yunuyu ayanite bulo nikwi ilya mulubazu ulwalusoko, lilyo likwela ivikomwa pakabalilo kache, amani ghache ghatakufoka. Vyosi vivyo akubomba vikumwendela akiza.

Yelemiya 2:30

“Nkabafunda abantu aba mu Yuda, pope batakamanyilapo nachimochimo. Mukabaghogha abalaghuzi nupanga ngati nkalamu yiyo yikalaye.

Yelemiya 20:2

po akabalamula abantu ukuti bamukome u Yelemiya umulaghuzi nukumupinya ni mpingu papipi nu Mulyango Uwapamwanya uwa Benjamini mu Nyumba iya Mwene.

Yelemiya 35:15

Kabilikabili nkabatumilagha ababombi bane abalaghuzi ukuti bize bababuzye ukuti, “Umuntu wesi mumwinyu azileke imbombo zyache imbibi. Yannya inkalo zyinyu, sona mutakabakonkaye abachala abanji nukubabombela. Po mukwiza pakwikala muchisu chicho imbapiye amwe na baghuso.” Loli pope bulo mutakanteghelezya sona mutakanyivwila.

Yelemiya 5:24

Batakunena mumoyo ghabo ukuti, ‘Zagha tumunyilaye u Mwene u Chala witu, yuyo akutupa ivula iya chizimyalupya pakabalilo kache, sona ni vula iyamaka pakabalilo kache, sona atwimikiye amasiku aghakutuzikizya nagha nyinulo.’

Luka 13:34

“Wee Yelusalemu, wee Yelusalemu! Ukughogha abalaghuzi nukubatiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana namumo inkuku yikufukatilila utwana twache muvipapande, loli utakanyitikizya.

Luka 20:11

Po umwenecho uwa mughunda yula akamutuma uwambombo uyunji, loli abalimi bala bakamukoma, sona bakamusamula akabibi nukumunyosya nyobe zyene.

Luka 20:9

Po u Yesu akabataghila abantu bala ichili ichi, “Kukabako umuntu yumo, yuyo akabyala amampesya mughunda wache. Akabazimya abalimi abanji, po umwenecho akafumapo nukwikala kulakula akabalilo akatali.

Yohani 15:16

Mute mwemwe mukansala awe, loli nene nkabasala amwe. Po nkabasala nukubimika ukuti mubuke nukupa ivikomwa ivyinji, ivikomwa vivyo vikwiza pakubangako bwila. Sona Utata akwiza pakubapa chosi chicho mukulabila mwitabwa lyane.

Aba Loma 7:4

Mwee bakamu bane, umu momumo zibeleye namwe. Ukuyana ni Ndaghilo, namwe mukafwa pakuti mwe vigaba ivya mubili uwa Kilisitu. Po ilelo muli bache mwa yuyo akazyuka kubufwe, umwakuti tumwelelaye ivikomwa u Chala.