Luka 13:34 - IBAYIBOLO 2024

³⁴ “Wee Yelusalemu, wee Yelusalemu! Ukughogha abalaghuzi nukubatiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana namumo inkuku yikufukatilila utwana twache muvipapande, loli utakanyitikizya.

Ulufingo Ulupya

³⁴ “Wee Yelusalemu, wee Yelusalemu! Ukughogha abalaghuzi nukubatiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana na mumo inkuku yikufukatilila utwana twache muvipapande, loli utakanyitikizya.

Luka 13:34 Iomraidhean Croise

Nehemiya 9:26

“Pope bulo batakivwilagha sona bakakusambukila nukuzisulannya indaghilo zyako. Bakabaghogha abalaghuzi bako, babo bakabasokagha ukuti banyokele kukwako. Bakakusamula pakubomba ichintu ichibibi nkani.

Nehemiya 9:30

Awe ukabafisila ilyoyo amaka aminji nkani. Ukababuzya abalaghuzi bako ukwendela mu Muzimu wako ukuti babasokaye. Pope bulo abantu bako bakaba na mapuli, po ukababika munyobe izya bantu aba inko izinji.

Masalimo 149:2

Aba Izilayeli basekelaye, pachifukwa icha Mupeli wabo, abantu aba mu Ziyoni bahobokaye pachifukwa icha Mwene wabo.

Masalimo 17:8

Unsungililaye ngati po ne mboni iya lyiso, unfisaye kusi kuvipapande vyako.

Masalimo 36:7

Ulughano lwako lwapamwanya nkani, sona abantu bako bakuvwamila kusi ku vipapande vyako.

Masalimo 57:1

Wee Chala, umpelele ichisa, sona banga ni chisa nane, pakuti nkuchimbilila kukwako. Nkwiza pakuponela kusi kuvipapande vyako, mupaka ukankungu uwakunangannya adumusannye.

Masalimo 81:13

“Nanti abantu bane bakanyivwilagha, ngali aba Izilayeli bakabomba vivyo nkavilonda.

Masalimo 91:4

Akwiza pakukuvwinka na meya ghache, muvipapande vyache ukwiza pakuponelamo, ukusubiliwa kwache yo ngulu yitu ni chakuponelamo.

Yesaya 30:15

Izi zyo zizyo U Mwene Uwamaka Ghosi Umuzelu uwa Izilayeli akuti, “Nanti mukupinduka nukuba myee mukwiza pakupokiwa, ukuba myee kwinyu nu lusubilo lwinyu gho maka ghinyu, loli amwe mutakalonda awe.

Yesaya 50:2

Nkimba choni chicho bo niza, patakabapo umuntu nayumoyumo? Nkimba choni chicho bo nitizya, patakaba nayumo umuntu uwa kwamula? Nkimba inyobe yane yikaba mpimpa pakubapoka? Nkimba inte na maka aghakubapokela? Ennya, nanti nayichemela inyanja yikukamuka, nkuzyandula isoko pakuba nkolongo, iswi zyabo zikubola, pachifukwa ichakuti zitakuba na mizi, po zikufwa ni nyota.

Yelemiya 2:30

“Nkabafunda abantu aba mu Yuda, pope batakamanyilapo nachimochimo. Mukabaghogha abalaghuzi nupanga ngati nkalamu yiyo yikalaye.

Yelemiya 26:23

Bakamulema u Uliya mu Ijiputi nukubuka nawe kwa mwene u Yehoyakimu, yuyo akamughogha nupanga, bakaghusyila umubili wache ku mapumpa agha kusyililako abantu bulo.

Yelemiya 35:14

U Yonadabu umwana uwa Lekabu akabalamula abana bache ukuti batakang'welaye u vinyo sona bakasungilila ilamulo ili. Mupaka nilelo batakung'wela u vinyo, pachifukwa ichakuti bakakonka ilamulo ilya munyenya wabo. Loli kabilikabili nanenagha namwe, loli pope bulo mutakanyivwila.

Yelemiya 35:17

“Polelo, u Mwene u Chala Uwamaka Ghosi, u Chala uwa Izilayeli akuti, ‘Teghelezya! Nkwiza pakubanangannya aba Yuda na bantu bosi babo bakwikala mu Yelusalemu, pachifukwa ichakuti batakanyivwila bo nkunena nabo, batakanyamula bo nkubitizya.’ ”

Yelemiya 6:16

U Mwene akuti, “Imilila mulubazu mumusebo nukutalankannya, lalusya izila izya kale. Lalusya kuko kuli izila inyiza sona nukwendamo mulamula, po imizimu yinyu yikwiza pakubwagha ubutuzyo. Loli amwe mukati, ‘Tutakwiza pakwendamo.’

Nkuto 1:16

“Ichi cho chifukwa nkulila sona amasozi ghatakukamuka mumaso ghane. Atalipo nayumoyumo uwakunsangalusya, sona nayumo umuntu uwakunkazya. Abana bane baba balanda, pachifukwa ichakuti abalwani bitu batupota.”

Nkuto 4:13

Loli chikabombiwa pachifukwa icha mbibi izya balaghuzi bache, sona pachifukwa icha kunanga ukwa baputi bache, babo bakabaghogha abantu abagholosu mulamula.

Hoseya 11:2

Napapo nkamwitizya u Izilayeli akinji bulo, loli akepaghako nkani kukwane. Bakabika ivyakwiyipa kwa Baala, sona bakafukizya utwakununkila ku vifwani.

Hoseya 11:7

Abantu bane balemezizye pakunkana, Napapo bakwitizya ku Wakumwanya Nkani, loli batakunchindika nubwanaloli.

Yoweli 2:23

Mwee bantu aba mu Ziyoni hobokagha, sona sekelagha mwa Mwene u Chala winyu, pakuti abapa ivula iyakwanda, sona abapa ivula inyinji, ivula iya chisiku niya lupepo ngati yakale.

Zekaliya 1:4

Mutakabanje ngati bo banyenya binyu, babo kale abalaghuzi bakababuzyanga amazyu ghane. Bakababuzyanga ukuti, ‘Baleke ububibi bwabo sona ni mbibi zyabo loli batakanteghelezya pamo ukunyivwila.’ U Mwene Uwamaka Ghosi anena.

Matayi 22:3

Akabatuma abambombo bache pakubabuzya abantu babo bakitiziwa ku lusekelo, loli bakakana.

Matayi 22:6

abanji bakabalema abambombo bala, bakabakoma nukubaghogha.

Luka 15:28

Bo umwana usongo yula ivwa zinizi, akakalala nkani umwakuti akakana nukwinjila munyumba mula. Po uwise akafuma kuzi nukumulaba ukuti injile.

Luka 19:44

Bakwiza pakukuzimizya poka na bantu bako bosi. Bakwiza pakumongolannya ivibumba vyosi, sona batakwiza pakulileka nalimolimo ibwe palyamwabo, pakuti utakakaghannya akabalilo kako u Chala akalondagha pakukupoka.”

Luka 23:28

U Yesu akaghalabukila kukwabo nukubabuzya ukuti, “Mwe bakolo aba mu Yelusalemu, mutakandililaye. Loli mwililile mwebene na bana binyu.

Imbombo 7:52

Nkimba kukabako umulaghuzi yumo yuyo abanyenya binyu batakamuvwimapo? Bakaghogha abantumi aba Chala, babo kale bakafumusya izya kwiza ukwa Mubombi wache Umugholosu. Po losi ulu mwamubika munyobe izya balwani nukumughogha.

Imbombo 7:59

Bo bakwendelela pakumusumba na mabwe, u Sitefani akanda pakwiputa ukuti, “Wee Mwene Yesu, pokela umuzimu wane!”

Imbombo 8:1

Po u Sabuli akaba palapala pakusimikizya nizya kughoghiwa ukwa Sitefani. Isiku lilalila ichipanga mu Yelusalemu chikanda pakuvwimiwa nkani. Abitiki bosi ukwefyako abatumiwa, bakanyampana muvigaba vyosi ivya Yudeya nu Samaliya.

Ukukumbusya Amalamulo 32:29

Nanti bakabanga na mahala ngali bakivwisya ivintu vinivi, sona ngali bakuzyaghannya intamyo zizyo zingabawila.

Ukukumbusya Amalamulo 5:29

Ane nalondagha nkani ukuti inyinong'ono zyabo ngali zili bunubu amasiku ghosi, sona nukuti ngali bakunchindika nukuzikonka indaghilo zyane zyosi, umwakuti ivintu vyosi vibendelaye akiza, poka na baluko lwabo bwila na bwila.

Ubuvumbuli 11:8

Imivimba yabo yikwiza pakulambalala mumisebo iya kaya akakulu nkani kako u Mwene wabo akakomeliwamo pachipinjika. Akaya akakulu nkani kala itabwa lyache umwachili bulo we Sodomu, pamo mu Ijiputi.

Luti 2:12

U Mwene u Chala uwa ba Izilayeli, yuyo ukuponelamo muvipapande vyache, akupe umuvwalo umukulu nkani, pachifukwa icha vyiza vyosi vivyo wabomba.”