Ivyili 2:6 - IBAYIBOLO 2024

⁶ Pakuti we Mwene yuyo akupa amahala, sona amahala nukwivwisya ivintu vyache.

Ivyili 2:6 Iomraidhean Croise

1 Abamwene 10:24

Abantu bosi aba muchisu ichapasi bakalondagha nkani ukuti bamwennye u Solomoni nukuteghelezya amahala ghache ghagho u Chala akamupa.

1 Abamwene 3:12

Po nkwiza pakukupa ichintu chicho walaba. Nkwiza pakukupa amahala aghakuvyaghanikizya ivintu aghakuti atalipo nayumo umuntu yuyo akabapo na mahala ngati ghanagha pamo yumo yuyo akwiza pakuba nagho nalumolumo.

1 Abamwene 3:9

Polelo umpe amahala aghakubalaghilila abantu bako, sona na ghakulesannya ichiza ni chibibi. Nkimba wewenu yuyo angalulaghila uluko lwako ulukulu lunulu?”

1 Abamwene 4:29

U Chala akamupa u Solomoni amahala nu bumanyi ubwapamwanya nkani, sona na kivwisizye aka vintu.

1 Imbili 22:12

U Mwene akupanje amahala na kivwisizye, bo waba we mulaghili uwa aba Izilayeli, umwakuti uzikonkaye indaghilo izya Mwene u Chala wako.

Ezila 7:25

Nawe bulo we Ezila, ubasale abalongozi na balongi, ukuyana na mahala ghagho Chala wako akupiye ukuti balongaye mubwanaloli inongwa izya bantu bosi aba kwisila ilya lusoko ulwa Yufuleti, babo bamenye indaghilo izya Chala wako. Umumanyisyanje umuntu wesi yuyo atazimenye indaghilo zinizi.

Nehemiya 7:5

Po u Chala wane akampa inyinong'ono izyakuti imbabungannye poka abalongozi na makambala sona na bantu bosi ukuti imbasimbe ukuyana ni nyumba zyabo. Nkalyagha ibuku ilya mbili lilyo mukasimbiwamo amatabwa agha bantu babo bakaba bakwanda pakunyokako kubukayidi. Ivi vyo vivyo vikasimbiwa mwibuku lilalila:

Yobu 12:13

“U Chala wemwenecho uwa mahala na maka, nu bumanyi sona nukwivwisya ivintu.”

Yobu 12:16

Ali na maka sona na mahala. Abantu babo bakuzimbuliwa sona na bope abazimbuli bosi bali munyobe zyache.

Yobu 22:22

Pokela ichimanyisyo chicho akukupa, sona sunga amazyu ghache mumoyo wako.

Yobu 32:8

Loli u Muzimu uwa Chala Uwamaka Ghosi, gho ghugho ghukwinjila mubantu, nukubapa amahala.

Masalimo 119:104

Amalamulo ghako ghakumpa amahala, polelo izibengite izila imbibi.

Masalimo 119:34

Umpe akivwisizye aka lulaghilo lwako, po nkwiza pakulusunga, sona nkwiza pakulikonka nu moyo wane ghosi.

Masalimo 119:98

Amalamulo ghako ghakumpa amahala, ukubachila abalwani bane, pakuti akabalilo kosi indi nagho.

Masalimo 19:7

Ululaghilo ulwa Mwene lwakufikapo, lukutupa sona ubumi ubupya. Amalamulo agha Mwene masubiliwa, ghagho ghakubapa amahala abantu babo bate nagho.

Masalimo 19:8

Ivimanyisyo ivya Mwene vigholosu vivyo vikughasangalusya amoyo. Amalamulo agha Mwene miza, ghagho ghakughapa amaso ulukozyo.

Masalimo 51:6

Loli umoyo uwanaloli gho ghugho ukughulonda, po umanyisyanje amahala mukasi mumwane.

Masalimo 94:10

Nkimba yuyo akuzipa amafundwe inko atakuzifunda? Nkimba yuyo akumumanyisya umuntu akusobelwa ubumanyi.

Ukufuma 31:3

Namwizuzya nu muzimu wane, sona namupa ubumanyi na mahala nu bwafundi ubwa mbombo izya nyobe

Ivyili 6:23

Pakuti amalamulo ghanagha ghali ngati yo nyale, sona ichimanyisyo ichi chili ngati lo lukozyo. Amafundwe ghanagha ghali ngati yo zila iya bumi.

Umulumbilili 2:26

Umuntu yuyo u Chala ahobokite nawe, akumupa amahala nu bumanyi sona nu buhobosu. Loli umuntu uwa mbibi akumupa imbombo iyakubungannya ubukabi nukumusungila umuntu yuyo u Chala ahobokite nawe. Vyope vinivi vite ni mbombo nayimoyimo, ko kuyimba bulo.

Yesaya 54:13

Abana bako bosi bakwiza pakumanyisiwa nu Mwene, sona bakwiza pakwikala mumutende.

Yesaya 8:20

Ululaghilo nu lusimikizyo nanti vitakunena amazyu ghanagha vite nulukozyo nalumo.

Daniyeli 1:17

U Chala akabapa abalumendo folo bala amahala na kivwisizye aka vimanyilo ivya mu mabuku aghakulekanalekana. Po u Daniyeli akavimanya ivisetuka ni vilota ivyakulekanalekana.

Daniyeli 2:21

Wee yuyo akwandula amasiku nu tubalilo, sona weyuyo akubakwezya abamwene nukubisya. Akubapa amahala abantu abamahala, sona nu bumanyi ku bantu abakwivwisya ivintu.

Daniyeli 2:23

Wee Chala uwa banyenya bane, nkukupalizya, sona nkukukwezya. Wampa amahala na maka, wanvumbulila zizyo tukakulaba, sona watuvumbulila ichilota icha mwene.”

Luka 21:15

pakuti nkwiza pakubapa amazyu na mahala aghakuti nayumo uwa balwani binyu akwiza pakukana pamo ukususya zizyo mukunena.

Yohani 6:45

Abalaghuzi bakasimba bakati, ‘Bosi bakwiza pakumanyisiwa nu Chala.’ Umuntu wesi yuyo akwivwa zizyo u Tata akunena nukumanyila kukwache, weyuyo akwiza kukwane.

Yakobo 1:17

Ichabupi chosi ichiza sona ni chakufikapo chikufuma kumwanya kwa Tata, Umupeli uwa nkozyo izya kumwanya, yuyo atakwandukakwanduka ngati gho muzyezye.

Yakobo 1:5

Nanti yumo mumwinyu akusobelwa amahala aghakubombela ichintu chimo, amulabe u Chala, po akwiza pakughapokela, pakuti u Chala akumupa umuntu wesi umwakusita ukumamilizya, sona umwakusita ukwilumbusya.