Hoseya 10:13 - IBAYIBOLO 2024

¹³ Loli mwabyala ububibi, po mwinula ubunyonganu, sona mwalya ivikomwa ivya bumyasi. Pakuti mwazisubila izila izyinyu ni zyinyu sona na basilikali binyu abinji nkani.

Hoseya 10:13 Iomraidhean Croise

Yobu 4:8

Ngati mumo nkwenezya, abantu babo bakubyala ububibi, nukupesa intamyo, bakwinula intamyo zilazila.

Masalimo 33:16

Atalipo nayumoyumo u mwene yuyo akupota pachifukwa icha basilikali bache abamaka, pamo umusilikali ukupona pachifukwa icha maka ghache amakulu.

Masalimo 52:7

“Mwennye umuntu yuyo atakumusubila u Chala pakuba lilinga lyache, loli akubusubila ubukabi bwache, sona akuba na maka pakunangannya abanji.”

Masalimo 62:10

Mutakavisubilaye ivyongo, pamo ukwituvikizya muvintu ivya bwiba. Napapo ubukabi bwinyu bwinji nkani, loli mutakabikayepo nkani umoyo.

Ivyili 1:31

po bakwiza pakulya ivikomwa ivya mbombo zyabo nukwikuta ni vintu vivyo bakabatika pakuvibomba.

Ivyili 12:19

Amazyu aghanaloli ghakubangako bwila na bwila, loli ubumyasi bukubangako pakabalilo akapimpa bulo.

Ivyili 13:2

Umuntu umwiza akulyanga ivikomwa ivya mazyu ghache amiza, loli umuzimbuli akulonda bulo ivyongo.

Ivyili 19:5

Ukaboni umumyasi akwiza pakufundiwa, sona akunena ubumyasi atangapona ulufundo.

Ivyili 22:8

Umuntu yuyo akupesa ububibi akwinula intamyo, sona indisa iya bukali bwache yikwiza pakupyoka.

Umulumbilili 9:11

Nachennya sona ichintu chimo pachisu ichapasi ichakuti: Te muntu uwalwengo akupota pakuchimbila, pamo umuntu umujivu akupota pabwite. Pamo abantu abamahala bene bo babo bakuchagha ichakulya pamo abantu abamahala bene bo babo bakuba nu bukabi. Te bamanyi bene babo abantu bakubapelela ichisa, loli ulusako ni chighune vikubawila bosi banaba.

Yesaya 17:11

napapo pisiku lilyo ukuzibyalilagha, nukuzipela ukuti zikulaye, mukazibyalagha pandabindabi nukuzipela ukuti zibazye ubwezya, loli inyinulo yitakwiza pakubangako, pisiku ilya ntamyo nukubaba kuko kutakumala nalumo.

Hoseya 11:12

U Efulayimu anzyunguliye nu bumyasi, sona bope aba Izilayeli banzyunguliye nu buzimbuli. Abantu aba mu Yuda bachili bali nu Chala, sona basubiliwa nkani ku yuyo Muzelu.

Hoseya 4:2

Muli bulo inguno nu bumyasi nukughoghana, nu bwiba, sona nu bwamalaya. Ukubomba imbibi kwafika pabwenecho, sona abantu bakughoghana kabilikabili.

Hoseya 4:8

Ichakulya chabo zyo mbibi izya bantu bane, sona ububibi yo nyanyi yabo.

Hoseya 7:3

Bakumuhobosya u mwene nu bubibi bwabo, sona bakughahobosya amakambala na mazyu aghabumyasi.

Hoseya 8:7

“Aba Izilayeli bakapesa impepo, nukwinula ukankungu. Amapelele ghatakwela nachimochimo, ghatakwiza pakubapa ubusu. Nanti ghakelagha abayeni ngali bakalya ichakulya.

1 Samuweli 24:14

Mwennye umuntu yuyo u mwene uwa Izilayeli akulonda pakumughogha. Mwennye umuntu yuyo ali pakumulondelezya. Nkimba ukulonda pakungogha ne mbwa imfwe, sona ne kapantila bulo?