Daniyeli 7:13 - IBAYIBOLO 2024

¹³ “Pabusiku palapala muchisetuka nkamwennya yumo yuyo akaba ngati mwana uwa muntu akwika mu mabingu. Akapalamila papipi nu Wavula Intazi yula nukwimilila pamaso papache.

Daniyeli 7:13 Iomraidhean Croise

Masalimo 110:2

U Mwene akwiza pakonjelezyako amaka, agha bumwene bwako ukwandila ku Ziyoni, Po akwiza pakukubuzya ukuti, “Ubalaghililaye abalwani bako.”

Masalimo 2:8

Undabe wennye, nkwiza pakukupa inko pakuba mpyana yako, sona ichisu chosi ichapasi chikwiza pakuba chako.

Masalimo 47:5

U Chala akakwela bo abantu bakukolomoka pachifukwa icha buhobosu, sona u Mwene akwela kumwanya, bo abantu bakulizya amapati.

Yelemiya 49:19

“Ngati nkalamu yiyo yikufuma mumusitu uwa Yolodani, yikuyichimbizya ing'ozi, nkwiza pakumuchimbizya u Edomu, muchisu chache umwalubilolubilo. Pisinda pache nkwiza pakubimikila yuyo imusalite. Nkimba wewenu yuyo ayanite nane, sona nkimba wenu yuyo angambika pabulongi? Nkimba mudimi wenu yuyo angalwana nane?

Ezekiyeli 1:26

Pamwanya pamitu yabo pakaba chicho chikabonekagha ngati chitengo icha bumwene ubwa safile, pamwanya pachitengo icha bumwene pakikala yuyo akaboneka ngati muntu.

Daniyeli 2:44

“Pakabalilo aka bamwene banabo, u Chala uwakumwanya akwiza pakubwikazya ubumwene, bubo butakwiza pakunanganika nalumolumo pamo pakubikiwa munyobe izya bantu abanji. Bukwiza pakughanangannya amabumwene aghanji ghosi mupaka nukughazimizya, loli ubumwene bunubu bukwiza pakubangako bwila na bwila

Daniyeli 7:12

Ivinyamana ivinji vikafyuliwa ubulaghili, loli vikitikiziwa pakwikala nubumi ukwa kabalilo kamo.

Daniyeli 7:2

“Ane ne Daniyeli, pabusiku nkachennya ichisetuka icha mpepo yikuputa iyakufuma kunkuto zyosi folo, nukuyivundula inyanja inkulu nkani.

Daniyeli 7:22

Mupaka Uwavula Intazi yula akafika, po inongwa yikabendela akiza abantu abazelu aba Kumwanya Nkani. Akabalilo kakakwana akakuti abantu abazelu bala bapokele ubumwene.

Daniyeli 7:9

Bo nkwennya, ivitengo ivya bumwene vikabikiwa mubuzilo bwache, po Uwavula Intazi akikala pachitengo chache. Amenda ghache ghakaba swee ngati we kabefu, zyope isisi zyache zikaba swee ngati bo busapa. Ichitengo chache chikakagha indimi izya moto, sona ivingelengele vyache vyosi vikakagha umoto.

Daniyeli 8:15

Bo ane ne Daniyeli nkwennya ichisetuka sona bo nkuyezya pakuchivwisya, pamaso papane pakimilila yumo yuyo akaba ngati muntu.

Matayi 13:41

U Mwana uwa Muntu akwiza pakutuma abantumi bache ukwefya abantu bosi mu Bumwene bwache, babo bakupuvya abantu na babo bakubomba ivibibi.

Matayi 24:30

Po ichimanyilo ichakwiza ukwa Mwana uwa Muntu chikwiza pakuboneka kumwanya. Abantu bosi aba muchisu ichapasi bakwiza pakufwifwitila, bo bamwennya u Mwana uwa Muntu akwiza mumabingu na maka nu buchindamu ubukulu.

Matayi 25:31

“Bo u Mwana uwa Muntu akwiza pakuba we Mwene poka na bantumi bosi, akwiza pakwikala pachitengo icha bumwene icha buchindamu.

Matayi 26:64

U Yesu akamula akati, “Wanena wemwene. Loli nkubabuzya mwebosi ukuti ukwandila pakabalilo aka mukwiza pakumwennya u Mwana uwa Muntu ikaye kunyobe indilo iya Chala Uwamaka Ghosi akwiza mumabingu.”

Matayi 28:18

U Yesu akapalamila nukubabuzya ukuti, “Napeghiwa ubulaghili bosi kumwanya na pasi pano.

Matayi 8:20

U Yesu akamwamula akati, “Abakambwe bali ni mpako, ni viyuni vyope vili ni vivumbo, loli u Mwana uwa Muntu ate nu buzilo ubwakughonapo nukutuzyapo.”

Maliko 13:26

Po abantu bakwiza pakumwennya u Mwana uwa Muntu, akwiza mumabingu na maka nu buchindamu.

Luka 21:27

Po abantu bakwiza pakumwennya u Mwana uwa Muntu akwiza mumabingu na maka nu buchindamu ubukulu.

Luka 21:36

Mubanje maso nukwiputa akabalilo kosi ukuti mubanje na maka aghakwipokela mwebene muvintu vyosi vivyo vikwiza pakuboneka, sona nukuti mungimilila pamaso pa Mwana uwa Muntu.”

Luka 24:27

Sona u Yesu akalingannya kukwabo zizyo zikaneniwa nizya yuyo mu Masimbo ghosi, ukwandila mu mabuku agha Mozesi mupaka na mumasimbo ghosi agha balaghuzi.

Yohani 12:34

Ichilundilo icha bantu chikamwamula chikati, “Indaghilo zyitu zikutubuzya ukuti u Kilisitu akwiza pakubangako bwila na bwila. Po, nkimba ukunena bulibuli ukuti u Mwana uwa Muntu abaghiye pakupayikiwa? U Mwana uwa Muntu yunuyu wewenu?”

Yohani 3:13

Nayumo umuntu yuyo afikiteko kumwanya, loli mwene u Mwana uwa Muntu, yuyo akika kumwanya.

Yohani 5:27

Sona amupiye nu Mwana ubulaghili ubwakulongela pakuti we Mwana uwa Muntu.

Imbombo 7:56

Akati, “Ennya, nkwennya kumwanya kwighukite, sona u Mwana uwa Muntu imiliye kunyobe indilo iya Chala.”

1 Aba Tesalonika 4:17

Pisinda pache aswe twe tuchili twe bumi, sona twe twasyala, tukwiza pakubungana poka nabo mu mabingu pakukomana nu Mwene mumwanya. Po tukwiza pakuba nu Mwene bwila na bwila.

1 Timoti 6:16

U Chala mwene bulo atakufwapo nalumo, sona akwikala mu lukozyo lulo nayumo umuntu angapalamilako. Nayumo umuntu yuyo amwenizyepo pamo angamwennya. Kukwache kubanje umuchizi na maka bwila na bwila. Ameni.

Aba Hebeli 2:14

Pakuti abana banaba bantu bulo, babo bali nu mubili ni banda, u Yesu umwenecho akanduka ngati bo babo nukugabana nabo akabele kabo ukwendela mu bufwe bwache ukuti amunangannye u Satana, yuyo ali na maka agha bufwe.

Aba Hebeli 9:24

Pakuti u Kilisitu atakinjila Mubuzilo Ubuzelu chicho chikazengiwa ni nyobe izya bantu, ubuzilo bubo bukaba chifwanikizyo bulo icha buzilo ubwenecho. Loli akinjila kumwanya ukwenecho kuko akubonekela pamaso pa Chala mubuzilo bwitu.

Ubuvumbuli 1:13

Pakasi pa nyale zila, nkennya yumo yuyo akaboneka ngati muntu. Akavwala inkazo intali yiyo yikafika kunyayo zyache, akapinya ulamba uwa golide pachifuba chache.

Ubuvumbuli 1:18

Ane ne mumi. Nkafwa, loli ilelo ne mumi bwila na bwila. Indi ni nyighulilo izya bufwe, sona ni nyighulilo izya buzilo ubwa bantu abafwe.

Ubuvumbuli 1:7

Ennya, akwiza mu mabingu! Umuntu wesi akwiza pakumwennya, sona na bope bosi babo bakamulasa. Abantu abaluko losi muchisu ichapasi bakwiza pakulila pachifukwa icha yuyo. Umu momumo kukwiza pakubela. Ameni.

Ubuvumbuli 14:14

Po nkenelezya nukwennya ibingu iswepu. Uwakwikala pibingu lila akabonekagha ngati Mwana uwa Muntu, yuyo avwalite impumpu iya golide kumutu wache. Munyobe yache akaba ni sengo yiyo yikwete nkani.