Daniyeli 4:19 - IBAYIBOLO 2024

¹⁹ U Daniyeli yuyo akitiziwanga ukuti Belitishazala akaswigha nkani ukwa kabalilo, umwakuti ubogha bukamulema. Po u mwene akati, “Wee Belitishazala ichilota ichi pamo ubusanuzyi bwache vitakakoghofyanje.” U Belitishazala akamula akati, “Wee mwene wane! Nalondagha ngali ichilota ichi sona nu busanuzyi bwache bubawile abalwani bako, loli vitakakuwile!

Daniyeli 4:19 Iomraidhean Croise

Ubwandilo 31:35

Po u Lakelo akamubuzya uwise akati, “Wee tata, utakankalalilaye, intangimilila pamaso papako pakuti indi muchakumwezi.” Po akalondelezya loli atakatwagha natumotumo utwachala.

Ubwandilo 32:18

Umwamule uti, ‘Vya mubombi wako u Yakobo. Amutumila u mwene wache u Esabu pakuba chabupi, sona u Yakobo umwenecho akwiza kwisinda.’ ”

Ubwandilo 40:12

Po u Yosefu akamwamula akati, “Ichi cho ching'anamulo icha chilota chako: Isamba zitatu zila gho masiku matatu.

1 Abamwene 18:7

Bo u Obadiya akwenda, akakomana nu Eliya. U Obadiya akamumanya, po akafughama bo icheni chache chikotamiye pasi nukumulalusya ukuti, “Fwandi naloli wewe mwene wane u Eliya?”

Ukufuma 32:32

Nalamba ubahobokele imbibi zyabo. Loli nanti utakubahokela chizapo pakuzimya itabwa lyane mwibuku mumo usimbitemo amatabwa agha bantu bako.”

Yelemiya 29:7

Mukalondelaye umutende sona nukuti ivintu vikendelaye akiza akaya akakulu nkani kuko imbasendeyeko pakuba bazya. Mukiputilaye kwa Mwene, pachifukwa ichakuti nanti akaya akakulu kala ivintu vikukendela akiza, namwe bulo ivintu vikwiza pakubendela akiza.”

Yelemiya 4:19

Mwee, intamyo! Mwee intamyo! Nkwigholola nu bubavu. Mwee umoyo wane ghukubaba, umoyo wane ghukukoma nkani, nkupotwa pakuba myee. Pakuti nivwa ukulila ukwa lipati, nivwa ichongo icha bwite.

Daniyeli 1:7

Usongo uwa makambala yula akabita abalumendo bala amatabwa aghanji. Amatabwa ghabo ghakaba gho agha: U Daniyeli akaba we Belitishazala, u Hananiya akaba we Shadilaki, u Mishayeli akaba we Meshaki, sona u Azaliya akaba we Abedinego.

Daniyeli 2:26

U mwene akamulalusya u Daniyeli yuyo bakatinji we Belitishazala akati, “Nkimba ungambuzya vivyo nkavyennya muchilota nukunsanuzizya?”

Daniyeli 2:37

Awe we mukulu nkani pakasi pa bamwene bosi, po u Chala uwakumwanya akupiye ubumwene, na maka nu bulaghili, sona nu buchindamu.

Daniyeli 4:24

“Wee mwene, ubu bo busanuzyi, sona lo lulaghilo lulo Uwakumwanya Nkani alubika umwakususannya nawe.

Daniyeli 5:12

U Daniyeli yunuyu, yuyo u mwene u Nebukadineza akamusapila itabwa ilya kuti we Belitishazala akaghiwa ukuti ali na mahala, nakivwisizye, sona nu bumanyi ubwa kusanuzizya ivilota, pakulingannya ivyili sona nukumazya intamyo impalapala nkani. Mwitizye u Daniyeli, po akwiza pakubabuzya ubusanuzyi ubwa masimbo ghanagha.”

Daniyeli 5:18

“Wee mwene, ivwa kuno, u Chala Uwakumwanya Nkani akamupela ughuso u Nebukadineza pakuba we mwene umukulu nkani, sona akamupa ubuchindamu nu bumwene.

Daniyeli 5:19

Akaba mukulu nkani umwakuti, naba inko zyosi, nuluko losi sona na baneno zyosi bakamunyilagha nkani nukutetema pamaso papache. Nanti akalondagha pakumughogha umuntu yumo, naloli akamughogha. Nanti akalondagha pakumuleka mumi umuntu yumo, naloli akamulekagha mumi. Nanti akalondagha pakumukwezya umuntu yumo, naloli akamukwezyanga. Nanti akalondagha pakumukozya isoni umuntu yumo, naloli akamukozyanga isoni.

Daniyeli 7:15

“Ane ne Daniyeli, nkatamiwa nkani mumoyo, sona nkaba nubogha nkani pachifukwa icha zizyo nkazyennya muvisetuka vyane, po zikanvulungannya nkani.

Daniyeli 7:28

“Ubu bo bumalilo ubwa fundo yiniyi. Po ane ne Daniyeli nkatamiwa nkani mumoyo wane, sona chope icheni chane chikasulumannya, loli nkavisunga bulo mumoyo wane.”

Daniyeli 8:27

Ane ne Daniyeli nkalita nkani, sona nkabinapo amasiku aminji. Po nkanyamuka nukubuka pakubomba imbombo kunyumba iya mwene. Nkaswigha nkani ni chisetuka chila sona intakachivwisyanga.

Habakuku 3:10

Amaghamba ghakakwennya nukutetema, nukusata ukufuma kumwanya, ubwibizu ubwanyanja bukazumagha ichongo, nukughakwezya amayigha ghache mumwanya.

1 Samuweli 1:15

U Hana akamwamula akati, “Wee mwene wane, awe intakolizwe. Ane nkutamiwa nkani mumoyo wane, sona namulililagha u Mwene nu moyo wane ghosi.

1 Samuweli 24:8

U Devedi wepe akepamo mumpako mula nukumwitizya u Sabuli ukuti, “Wee mwene, tata wane!” U Sabuli akaghalabuka, po u Devedi akafughama, bo icheni chache chikotamiye pasi.

1 Samuweli 26:15

U Devedi akamubuzya u Abinala akati, “Wee Abinala, nkimba te we mwanavuli? Nkimba wewenu ayanite nawe mu Izilayeli? Nkimba choni chicho ukapotwa pakumuzighilila u mwene wako? Losi ulu umuntu yumo izite kunuko ukuti amughoghe u mwene wako.

1 Samuweli 3:17

U Eli akamulalusya u Samuweli akati, “Nkimba u Mwene akakubuzya choni? Utakanvinde nachimochimo, u Chala akwiza pakukufunda nkani nanti ukunfisa zyosi zizyo akakubuzya.”